ചെന്നൈ: തമിഴ്നാട് മുഖ്യമന്ത്രിയും പ്രമുഖ നടനുമായ വിജയ്യും ഭാര്യ സംഗീത സ്വർണലിംഗവും തമ്മിലുള്ള വിവാഹമോചനക്കേസ് തികച്ചും അപ്രതീക്ഷിതമായ പുതിയ വഴിത്തിരിവിലേക്ക് നീങ്ങുന്നതായി റിപ്പോർട്ടുകൾ. ഏറെ നാളുകളായി അകന്നു കഴിയുകയായിരുന്ന ഇരുവരും തങ്ങൾക്കിടയിലെ ഭിന്നതകൾ മറന്ന് വീണ്ടും ഒരുമിച്ച് ജീവിക്കാൻ തീരുമാനിച്ചതായാണ് പുതിയ അഭ്യൂഹങ്ങൾ പരക്കുന്നത്. ഇതുസംബന്ധിച്ച് തമിഴ് സിനിമാ ലോകത്തും സോഷ്യൽ മീഡിയയിലും ഇപ്പോൾ വലിയ രീതിയിലുള്ള ചർച്ചകളാണ് നടക്കുന്നത്.
വിജയ്യുടെ അമ്മ ശോഭ ചന്ദ്രശേഖർ ഉൾപ്പടെയുള്ള അടുത്ത കുടുംബാംഗങ്ങൾ ഇരുവർക്കുമിടയിൽ നടത്തിയ ശക്തമായ മധ്യസ്ഥശ്രമങ്ങളും ഇടപെടലുകളുമാണ് ഈ ഒത്തുതീർപ്പിലേക്ക് വഴിതെളിച്ചതെന്നാണ് ചില പ്രമുഖ തമിഴ് മാധ്യമങ്ങൾ റിപ്പോർട്ട് ചെയ്യുന്നത്. ഇതിന്റെ ഭാഗമായി കഴിഞ്ഞ കുറച്ചുകാലമായി ലണ്ടനിലായിരുന്ന സംഗീത കഴിഞ്ഞ ദിവസം അതീവ രഹസ്യമായി ചെന്നൈയിൽ തിരിച്ചെത്തിയതായും സൂചനകളുണ്ട്. വരാനിരിക്കുന്ന ജൂൺ 22-ന് വിജയ്യുടെ ജന്മദിനത്തോട് അനുബന്ധിച്ച് ആരാധകരെയും രാഷ്ട്രീയ അണികളെയും സന്തോഷിപ്പിക്കുന്ന ഈ ഔദ്യോഗിക പ്രഖ്യാപനം ഉണ്ടാകുമെന്നാണ് ചെന്നൈയിൽ നിന്നുള്ള വിവരങ്ങൾ. എന്നാൽ ഇപ്പോൾ പ്രചരിക്കുന്ന ഈ വാർത്തകളോട് ഇതുവരെ വിജയ്യോ സംഗീതയോ അവരുടെ അടുത്ത വൃത്തങ്ങളോ ഔദ്യോഗികമായി പ്രതികരിച്ചിട്ടില്ല.
തമിഴ്നാട് രാഷ്ട്രീയത്തെപ്പോലും ഉലച്ചുകൊണ്ട് മാസങ്ങൾക്ക് മുൻപാണ് വിവാഹമോചനം തേടി സംഗീത സ്വർണലിംഗം ചെങ്കൽപേട്ട് കുടുംബ കോടതിയിൽ ഔദ്യോഗികമായി ഹർജി സമർപ്പിച്ചത്. സിനിമാ രംഗത്തെ ഒരു പ്രമുഖ നടിയുമായി വിജയ്ക്കുള്ള സൌഹൃദത്തെച്ചൊല്ലി ഉണ്ടായ തർക്കങ്ങളാണ് സംഗീതയെ വിവാഹമോചന ഹർജി ഫയൽ ചെയ്യാൻ പ്രേരിപ്പിച്ചതെന്നായിരുന്നു അന്ന് പുറത്തുവന്ന റിപ്പോർട്ടുകൾ. ഏകദേശം 2021 മുതൽ തന്നെ ഇവരുടെ ദാമ്പത്യജീവിതത്തിൽ ഗുരുതരമായ പ്രശ്നങ്ങൾ തുടങ്ങിയിരുന്നതായാണ് വിവരം. പരസ്പര സമ്മതത്തോടെയുള്ള വേർപിരിയലിന് സംഗീത ആഗ്രഹിച്ചിരുന്നെങ്കിലും വിജയ് ആദ്യം അതിന് ഒട്ടും തയ്യാറായിരുന്നില്ല.
തന്റെ രാഷ്ട്രീയ പാർട്ടിയായ തമിഴക വെട്രി കഴകത്തിന്റെ (TVK) മുന്നേറ്റത്തെയും സ്വന്തം രാഷ്ട്രീയ ഭാവിയെയും ഈ വിവാഹമോചന വാർത്തകൾ ദോഷകരമായി ബാധിക്കുമെന്ന് ഭയന്നാണ് വിജയ് തുടക്കത്തിൽ വിവാഹബന്ധം വേർപെടുത്താൻ വിസമ്മതിച്ചതെന്നാണ് വിവരം. വിജയ് ഒഴിഞ്ഞുമാറിയതിനെ തുടർന്നാണ് സംഗീത നേരിട്ട് ചെന്നൈയിലെ കുടുംബ കോടതിയെ സമീപിച്ചതും കേസ് വാർത്തകളിൽ നിറഞ്ഞതും. മുഖ്യമന്ത്രി പദവിയിൽ ഇരിക്കെ ഇത്തരമൊരു കുടുംബ കേസ് പ്രതിപക്ഷ പാർട്ടികൾ വലിയ ആയുധമാക്കാൻ തുടങ്ങിയതോടെയാണ് മാതാപിതാക്കൾ നേരിട്ട് വിഷയത്തിൽ ഇടപെട്ടത്.
ഒരു കടുത്ത ആരാധകയും പ്രണയവും ഒടുവിൽ വിവാഹവുമെന്ന രീതിയിൽ തമിഴ് സിനിമയിലെ തന്നെ ഏറ്റവും മാതൃകാ ദമ്പതികളായിരുന്നു വിജയ്യും സംഗീതയും. 1996-ൽ പുറത്തിറങ്ങിയ വിജയ്യുടെ കരിയർ ബ്രേക്ക് ചിത്രം ‘പൂവേ ഉനക്കാകെ’ കണ്ടാണ് ലണ്ടനിലെ ബിസിനസുകാരന്റെ മകളായ സംഗീത വിജയ്യുടെ വലിയ ആരാധികയായി മാറുന്നത്. അന്ന് ലണ്ടനിൽനിന്ന് വിജയ്യെ നേരിൽ കാണാനായി മാത്രം സംഗീത ചെന്നൈയിലെത്തുകയായിരുന്നു. തുടർന്ന് ലണ്ടൻ യൂണിവേഴ്സിറ്റിയിലെ പഠനകാലത്ത് വിജയ്ക്ക് സംഗീത സ്ഥിരമായി കത്തുകളെഴുതുമായിരുന്നു. ഈ സൗഹൃദം പിന്നീട് പ്രണയമായി വളരുകയും ഇരുവീട്ടുകാരുടെയും പൂർണ്ണ സമ്മതത്തോടെ 1999 ഓഗസ്റ്റിൽ ഇരുവരും പ്രൗഢഗംഭീരമായ ചടങ്ങുകളോടെ വിവാഹിതരാവുകയും ചെയ്തു.
സിനിമാ ഓഡിയോ ലോഞ്ചുകളിലും മറ്റ് പ്രധാന പൊതുപരിപാടികളിലും എപ്പോഴും വിജയ്ക്കൊപ്പം നിഴലായി പ്രത്യക്ഷപ്പെട്ടിരുന്ന സംഗീത കഴിഞ്ഞ കുറച്ചുകാലമായി പൊതുവേദികളിൽ ഒരിടത്തും എത്തിയിരുന്നില്ല. ഇതിനെത്തുടർന്നാണ് ഇരുവരും തമ്മിൽ അസ്വാരസ്യങ്ങളുണ്ടെന്ന വാർത്തകൾ ആദ്യമായി മാധ്യമങ്ങളിൽ പ്രചരിച്ചു തുടങ്ങിയത്. വിജയ്യുടെ രാഷ്ട്രീയ പ്രവേശനവുമായി ബന്ധപ്പെട്ട് നടന്ന വലിയ ടി.വി.കെ (TVK) റാലികളിലും സമ്മേളനങ്ങളിലും വിജയ്യുടെ മാതാപിതാക്കളായ എസ്.എ. ചന്ദ്രശേഖറും ശോഭയും മുൻനിരയിൽ എത്തിയപ്പോഴും സംഗീതയോ മക്കളായ സഞ്ജയോ ദിവ്യയോ എത്തിയിരുന്നില്ല എന്നത് ഈ അകൽച്ചയുടെ ആഴം കൂട്ടുന്നതായിരുന്നു.
എന്നാൽ രാഷ്ട്രീയ ലക്ഷ്യങ്ങൾ മുൻനിർത്തിയായാലും കുടുംബത്തിന്റെ സമാധാനത്തിനായാലും ഇരുവരും വീണ്ടും ഒന്നിക്കാൻ തീരുമാനിച്ചത് വിജയ് ആരാധകർക്ക് വലിയ ആശ്വാസമാണ് നൽകുന്നത്. അടുത്ത ആഴ്ച നടക്കാനിരിക്കുന്ന വിജയ്യുടെ പിറന്നാൾ ദിനത്തിൽ പാർട്ടിയുടെ പുതിയ പ്രഖ്യാപനങ്ങൾക്ക് ഒപ്പം ഈ കുടുംബ വാർത്തയും തമിഴകം കാതോർത്തിരിക്കുകയാണ്. ഒത്തുതീർപ്പ് വാർത്തകൾ ശരിയാണെങ്കിൽ കോടതിയിലെ വിവാഹമോചന ഹർജി സംഗീത ഉടൻ തന്നെ പിൻവലിച്ചേക്കും.
English Summary
Speculations are rife on social media that Tamil Nadu Chief Minister and actor Vijay and his wife Sangeetha Sornalingam are considering a reconciliation, bringing a major twist to their ongoing divorce case. Reports suggest that intervention from Vijay’s mother, Shoba Chandrasekhar, and other family members led to the compromise. Sangeetha, who was residing in London after filing a divorce petition at the Chengalpattu Family Court over differences that began in 2021, has reportedly returned to Chennai. An official announcement regarding their reunion is expected on June 22, coinciding with Vijay’s birthday, though neither party has officially responded yet.