മലപ്പുറം: ലോകകപ്പ് ഫുട്‌ബോള്‍ മത്സരം കാണാന്‍ പോകുന്നതിനിടെ കിണറ്റില്‍ വീണ് വിദ്യാര്‍ഥിക്ക് ദാരുണാന്ത്യം. മലപ്പുറം പെരുവള്ളൂര്‍ സ്വദേശിയായ നാദിര്‍ (17) ആണ് മരിച്ചത്.
ഇന്നലെ രാത്രി ഒന്നരയോടെയാണ് അപകടം. ഫുട്‌ബോള്‍ മത്സരം കാണാന്‍ പോകുമ്പോള്‍ അബദ്ധത്തില്‍ കിണറ്റില്‍ വീഴുകയായിരുന്നു.
നജാത്ത് സ്‌കൂളിന് കുറച്ചകലെയുള്ള കിണറ്റിലാണ് കുട്ടി വീണത്. നാട്ടുകാര്‍ വിവരമറിയിച്ചതിനെ തുടര്‍ന്ന് മീഞ്ചന്ത നിന്ന് ഫയര്‍ ഫോഴ്സ് യൂണിറ്റ് എത്തിയാണ് മൃതദേഹം പുറത്തെടുത്തത്. പ്രദേശത്തെ സന്നദ്ധ പ്രവര്‍ത്തകര്‍ രക്ഷാ പ്രവര്‍ത്തനത്തിൽ പങ്കാളികളായി.
തേഞ്ഞിപ്പലം പോലീസ് തുടര്‍ നടപടികള്‍ സ്വീകരിച്ചു മൃതദേഹം കോഴിക്കോട് മെഡിക്കല്‍ കോളേജ് മോര്‍ച്ചറിയിലേക്ക് മാറ്റി.
കോട്ടയത്ത് കട്ടൗട്ട് സ്ഥാപിക്കുന്നതിനിടെ ഷോക്കേറ്റ യുവാവ് മരിച്ചു. കോട്ടയം ഇല്ലിക്കൽ ഇല്ലിക്കൽ അറുപുറ കൊറ്റമ്പടം ഹമീദ് കുട്ടിയുടെ മകൻ അമീൻ (22) മുഹമ്മദാണ് മരിച്ചത്. രണ്ട് ആഴ്ചയായി കോട്ടയം മെഡിക്കൽ കോളജിൽ ചികിത്സയിലായിരുന്നു.
