ഇടുക്കി: സ്കൂൾ ബസിറങ്ങി വീട്ടിലേയ്ക്ക് നടക്കുകയായിരുന്ന പത്തുവയസുകാരിയുടെ തലയ്ക്കടിച്ച് വീഴ്ത്തി ആഭരണങ്ങൾ കവർന്നു. ഇടുക്കി കട്ടപ്പന മേരികുളത്ത് ഇന്നലെ വൈകിട്ട് നാലിന് ശേഷമാണ് സംഭവം നടന്നത്. അഞ്ചാം ക്ളാസ് വിദ്യാർത്ഥിനിയെ തലയ്ക്കടിച്ച് വീഴ്ത്തി സ്വർണക്കമ്മലും വെള്ളിക്കൊലുസും കവർന്നതായാണ് പരാതി.
പെൺകുട്ടി സ്കൂൾ ബസിറങ്ങിയതിന് ശേഷം അരകിലോമീറ്ററോളം അകലെയുള്ള വീട്ടിലേയ്ക്ക് നടക്കുകയായിരുന്നു. ഇതിനിടെയാണ് കുട്ടിയെ ആക്രമിച്ച് ആഭരണങ്ങൾ കവർന്നത്. പിന്നിൽ നിന്ന് ആരോ തലയ്ക്കടിക്കുകയായിരുന്നെന്ന് കുട്ടി പറയുന്നു. കുട്ടിയെ കാണാതായതോടെ പിതൃമാതാവ് അന്വേഷിച്ച് എത്തിയപ്പോൾ റോഡിൽ ചെരിപ്പും സ്കൂൾ ബാഗും കിടക്കുന്നത് ശ്രദ്ധയിൽപ്പെട്ടു.
തുടർന്ന് നടത്തിയ അന്വേഷണത്തിലാണ് സമീപത്തെ തേയിലചെടികൾക്കിടയിൽ ബോധരഹിതയായി കുട്ടി കിടക്കുന്നത് കണ്ടത്. ഉടൻതന്നെ നാട്ടുകാരുടെ സഹായത്തോടെ കുട്ടിയെ ആശുപത്രിയിൽ എത്തിക്കുകയായിരുന്നു. സംഭവത്തിൽ അന്വേഷണം ആരംഭിച്ചതായി പൊലീസ് അറിയിച്ചു.