ആലപ്പുഴ: ഇത്തവണത്തെ വിഷു ബമ്പർ ലോട്ടറിയുടെ ഒന്നാം സമ്മാനം നേടിയയാളെ തിരിച്ചറിഞ്ഞു. ആലപ്പുഴ പഴവീട് പ്ലാം പറമ്പിൽ വിശ്വംഭരനാണ് വിഷു ബമ്പറിൻ്റെ 12 കോടി രൂപ നേടിയത്. VC 490987 എന്ന ടിക്കറ്റ് നമ്പറിനാണ് വിഷു ബമ്പർ ലഭിച്ചത്. സമ്മാനത്തുക കൊണ്ട് എന്ത് ചെയ്യണമെന്ന് അറിയില്ലെന്നും വാർത്തയറിഞ്ഞ് ആളുകൾ എത്തുമോയെന്ന പേടിയുണ്ടെന്നും വിശ്വംഭരൻ പറഞ്ഞു.
വിഷു ബമ്പറിൻ്റെ ഒന്നാം സമ്മാനം ലഭിച്ച വിവരം ആദ്യം വീട്ടുകാരോടാണ് പറഞ്ഞത്. വാർത്തയറിഞ്ഞ് ആളുകൾ എത്തുമോ എന്ന് പേടിച്ചിരുന്നു. ഇത്രയും പണം ലഭിച്ചതിൽ ടെൻഷനില്ല. തുക എന്ത് ചെയ്യണമെന്ന കാര്യത്തിൽ നിലവിൽ ഒന്നും തീരുമാനിച്ചിട്ടില്ല. വീട് ശരിയാക്കണമെന്നാണ് ചിന്തിക്കുന്നതെന്ന് വിശ്വംഭരൻ പറഞ്ഞു.
സിആർപിഎഫ് വിമുക്തഭടനാണ് വിശ്വംഭരൻ. വിശ്രമജീവിതം നയിക്കുന്ന വിശ്വംഭരൻ പതിവായി ലോട്ടറിയെടുക്കുന്നയാളാണ്. എല്ലാ വർഷവും വിഷു ബമ്പർ എടുക്കാറുണ്ട്. മുൻപ് മറ്റൊരു ടിക്കറ്റിന് 5000 രൂപ സമ്മാനം ലഭിച്ചിട്ടുണ്ടെന്ന് വിശ്വംഭരൻ പറഞ്ഞു.
ഇന്നലെയാണ് വിഷു ബമ്പർ ലോട്ടറി നറുക്കെടുപ്പ് നടന്നത്. ആലപ്പുഴയിൽ വിറ്റ ടിക്കറ്റിനാണ് ഒന്നാം സമ്മാനം ലഭിച്ചതെന്ന റിപ്പോർട്ടുകൾ പുറത്തുവന്നെങ്കിലും 12 കോടി നേടിയ ഭാഗ്യവാൻ ആരെന്ന കാര്യത്തിൽ സസ്പെൻസ് തുടരുകയായിരുന്നു. ആലപ്പുഴയിൽ അനിൽ കുമാർ എന്ന ഏജന്‍റ് വഴി വിൽപ്പന നടത്തിയ VC 490987 എന്ന ടിക്കറ്റിനാണ് ഒന്നാം സമ്മാനമായ 12 കോടി ലഭിച്ചതെന്ന് മാത്രമായിരുന്നു പുറത്തുവന്ന വിവരം