തിരുവനന്തപുരം : അരുവിക്കര കാച്ചാണി സ്വദേശിയായ അനുപ്രിയ (29) ജീവനൊടുക്കിയ സംഭവത്തിൽ ഭർത്താവിന്റെ അമ്മയും അച്ഛനും അറസ്റ്റിൽ. അഞ്ചൽ ഏരൂർ സ്വദേശികളായ മന്‍മഥന്‍ (78) ഭാര്യ വിജയ (71) എന്നിവരാണ് പിടിയിലായത്.
ഒന്നാം പ്രതിയായ ഭർത്താവ് മനു ഗൾഫിലാണുളളത്. സ്ത്രീധന പീഡനം, ഗാർഹിക പീഡനം, ആത്മഹത്യ പ്രേരണ എന്നിവയ്ക്കാണ് മൂവർക്കുമെതിരെ പൊലീസ് കേസെടുത്തത്.
കഴിഞ്ഞ ചൊവ്വാഴ്ചയാണ് അരുവിക്കര കാച്ചാണിയിലെ വീട്ടിൽ അനുപ്രിയ എന്ന 29കാരിയെ ജീവനൊടുക്കിയ നിലയിൽ കണ്ടെത്തിയത്. ഇരുനില വീടിന്റെ മുകളിലത്തെ നിലയിലെ ബെഡ് റൂമിലാണ് അനുപ്രിയയുടെ മൃതദേഹം കണ്ടെത്തിയത്.
ചൊവ്വാഴ്ച്ച ഉച്ചയ്ക്ക് രണ്ടരയോടെ ഉച്ചഭക്ഷണം കഴിച്ച ശേഷമാണ് മുകളിലെ മുറിയിലേക്ക് അനുപ്രിയ പോയത്. വൈകിട്ട് ഏറെ നേരമായിട്ടും അനുപ്രിയയെ താഴേയ്ക്ക് കാണാതായതോടെ മുറി തുറന്ന് നോക്കിയപ്പോഴാണ് ജീവനൊടുക്കിയ നിലയിൽ കണ്ടത്. ആറ് മാസങ്ങൾക്ക് മുമ്പായിരുന്നു അനുപ്രിയയുടെ വിവാഹം. അഞ്ചൽ ഏരൂർ സ്വദേശിയായ മനുവാണ് അനുപ്രിയയുടെ ഭർത്താവ്.
വിഷുക്കണിക്കായി കൊന്നപ്പൂക്കൾ ഒരുങ്ങി
വിദേശത്തായിരുന്നു മനുവിന് ജോലി. വിവാഹം കഴിഞ്ഞ് പതിനഞ്ച് ദിവസത്തിനുള്ളിൽ തന്നെ മനു ജോലി സ്ഥലത്തേയ്ക്ക് മടങ്ങിപ്പോയിരുന്നു. ഇതിനിടയിൽ അനുപ്രിയ ഗർഭിണിയായെങ്കിലും അബോർഷൻ ആകുകയായിരുന്നു. ഇക്കാര്യം ചൂണ്ടിക്കാട്ടി ഭർതൃവീട്ടുകാർ തന്നെ മാനസികമായി പീഡിപ്പിക്കാറുണ്ടെന്ന് അനുപ്രിയ പറഞ്ഞിരുന്നതായി ബന്ധുക്കൾ ആരോപിക്കുന്നു. ഭർത്താവും സമാനരീതിയിൽ പ്രതികരിച്ചതോടെ അനുപ്രിയ മാനസിക സമ്മർദ്ധത്തിലായിരുന്നുവെന്നും ബന്ധുക്കൾ ആരോപിക്കുന്നു.
ഭർ‌ത്താവിനേയും വീട്ടുകാരെയും കുറിച്ച് എഴുതിയിട്ടുള്ള 6 പേജുള്ള കത്ത് അനുപ്രിയയുടെ മുറിയിൽ നിന്നും കണ്ടെത്തിയിട്ടുണ്ട്. വിവാഹ ശേഷം ഒരുമാസം മാത്രമാണ് അനുപ്രിയ ഭർത്താവിന്റെ വീട്ടിൽ താമസിച്ചത്. പിന്നീട് അച്ഛന്റെയും അമ്മയുടെയും അടുത്തേയ്ക്ക് മടങ്ങിവന്നിരുന്നു. ഭർത്താവ് മനു തന്നെ നിരന്തരം കുറ്റപ്പെടുത്തുകയാണെന്ന് അനുപ്രിയ പറഞ്ഞതായി സഹോദരി അഖില ആരോപിച്ചു.
