കോട്ടയം: കുപ്രസിദ്ധ ഗുണ്ട അമ്മഞ്ചേരി സിബിയെ മരിച്ച നിലയില്‍ കണ്ടെത്തി. അതിരമ്പുഴ വില്ലേജില്‍ മാന്നാനം കരയില്‍ അമലഗിരി ഗ്രേസ് കോട്ടേജില്‍ ജോണ്‍ മകന്‍ അമ്മഞ്ചേരി സിബി എന്നു വിളിക്കുന്ന സിബി ജി. ജോണി(38)നെയാണ് തൂങ്ങി മരിച്ച നിലയില്‍ കണ്ടെത്തിയത്.
അമ്മഞ്ചേരി ഗാന്ധിനഗര്‍ ഹൗസിംഗ് കോളനിയിലെ വാടക വീട്ടിനു പുറകുവശത്താണ് രാവിലെ മൃതദേഹം കണ്ടത്. വിവരമറിഞ്ഞെത്തിയ ഗാന്ധിനഗര്‍ പോലീസ് സ്ഥലത്ത് പരിശോധന നടത്തി. അടുക്കള വശത്ത് ഗ്രില്ലിനോടു ചേര്‍ന്നാണ് മൃതദേഹം കണ്ടെത്തിയത്. സംഭവ സ്ഥലത്ത് ടെറസില്‍ കയറാന്‍ ഉപയോഗിച്ച ഏണിയും ഒഴിഞ്ഞ മദ്യക്കുപ്പിയും വെള്ളക്കുപ്പിയും കണ്ടെത്തിയിട്ടുണ്ട്. പുതിയ പ്ലാസ്റ്റിക് കയര്‍ കഴുത്തില്‍ കെട്ടി ടെറസില്‍ നിന്നും താഴേക്കു ചാടുകയായിരുന്നു എന്നാണ് പ്രഥമിക നിഗമനം.
ജില്ലയിലെ വിവിധ പോലീസ് സ്റ്റേഷനുകളിലായി നിരവധി കേസുകളില്‍ പ്രതിയായിരുന്നു സിബി. കോട്ടയം ജില്ലയിലെ ഗാന്ധിനഗര്‍ പോലീസ് സ്റ്റേഷനിലും സമീപ സ്റ്റേഷനുകളിലും രജിസ്റ്റര്‍ ചെയ്തിട്ടുള്ള പിടിച്ചുപറി, ദേഹോപദ്രവം, കൊലപാതകശ്രമം, ആയുധങ്ങളുമായി സംഘം ചേര്‍ന്ന് ആക്രമിച്ച് പരിക്കേല്‍പ്പിക്കുക, പോലീസ് ഉദ്യോഗസ്ഥരെ ആക്രമിക്കുക, പോലീസ് വാഹനത്തിന് കേടുപാടുകള്‍ വരുത്തുക തുടങ്ങിയ ക്രിമിനല്‍ കേസുകളില്‍ പ്രതികയായ ഇയാളം നേരത്തെ കാപ്പാ ചുമത്തി നാടുകടത്തിയിരുന്നു.
ബ്ലേഡ് പലിശയ്ക്ക് പണമിടപാട് നടത്തി വന്നിരുന്നതും മണര്‍കാട് ക്രൗണ്‍ ക്ലബ്ബില്‍ 2020 ജൂലൈയില്‍ നടന്ന 18 ലക്ഷത്തില്‍പ്പരം രൂപയുടെ ചീട്ടുകളി നടത്തിയ കേസിലും പ്രതിയുമാണ്.
