തിരുവനന്തപുരം: യുവാവിന്റെ മൃതദേഹം കത്തിക്കരിഞ്ഞ നിലയില്‍ വീട്ടിനുള്ളില്‍ കണ്ടെത്തിയ സംഭവം കൊലപാതകമെന്ന് പോലീസ്. കല്ലറ, പാങ്ങോട് പുലിപ്പാറ പരയ്ക്കാടിനു സമീപം കരിമ്പുലി ഷിബു എന്ന് സ്വയം വിശേഷിപ്പിച്ചിരുന്ന ഷിബുവിന്റെ മൃതദേഹമാണ് കഴിഞ്ഞയാഴ്ച വീട്ടിനുള്ളില്‍ കട്ടിലിനോട് ചേര്‍ന്ന് കത്തിക്കരിഞ്ഞ നിലയില്‍ കണ്ടെത്തിയത്. നിരവധി ക്രിമിനല്‍ കേസുകളില്‍ പ്രതിയായിരുന്ന ഇയാള്‍ നാട്ടില്‍ നിരന്തരം അക്രമങ്ങള്‍ നടത്തിയിരുന്നു .
കൊലപാതകവുമായി ബന്ധപ്പെട്ട് ഷിബുവിന്റെ സുഹൃത്ത് പാങ്ങോട് ചന്തക്കുന്ന് നൗഫിയ മന്‍സിലില്‍ നവാസ് (40) ആണ് അറസ്റ്റിലായത്. ഇക്കഴിഞ്ഞ ബുധനാഴ്ചയാണ് മനുഷ്യന്റെ കാല്‍ തെരുവ് നായ്ക്കള്‍ കടിച്ചു കൊണ്ടു പോകുന്നത് നാട്ടുകാരുടെ ശ്രദ്ധയില്‍ പെട്ടത് തുടര്‍ന്ന് പോലീസ് നടത്തിയ അന്വേഷണത്തിലാണ് മൃതദേഹം കണ്ടെത്തിയത്.
സാഹചര്യത്തെളിവുകളുടെയും കൈയില്‍ കെട്ടിയിരുന്ന ചരടിന്റെയും അടിസ്ഥാനത്തിലാണ് മരിച്ചത് ഷിബുവാണെന്ന നിഗമനത്തില്‍ പോലീസ് എത്തിയത്. കൊല്ലപ്പെട്ട ഷിബുവും നവാസും വര്‍ഷങ്ങളായി സുഹൃത്തുക്കളായിരുന്നു. ഇതിനിടെയുണ്ടായ വാക്കു തര്‍ക്കത്തെ തടുര്‍ന്ന് പത്തനാപുരത്ത് വച്ച് ഷിബു നവാസിനെ വെട്ടിക്കൊലപ്പെടുത്താന്‍ ശ്രമിച്ചിരുന്നു. തുടര്‍ന്ന് വിവിധ കേസുകളില്‍പ്പെട്ട് ജയിലിലായ ഷിബു രണ്ടു മാസം മുന്‍പാണ് പുറത്തിറങ്ങിയത്. തുടര്‍ന്ന് വീണ്ടും നവാസുമായി സൗഹൃദത്തിലായി.
കഴിഞ്ഞ ഞായറാഴ്ച ഇരുവരും ജോലിക്ക് പോയി മടങ്ങി വരവെ മദ്യവുമായി ഷിബുവിന്റെ വീട്ടിലെത്തി. ഇതിനിടെയുണ്ടായ വാക്കു തര്‍ക്കത്തില്‍ ഷിബു നവാസിനെ പട്ടിക കൊണ്ട് മര്‍ദിച്ചു. തുടര്‍ന്ന് നവാസ് അതേ പട്ടിക പിടിച്ചു വാങ്ങി ഷിബുവിന്റെ തലയ്ക്കടിച്ചു വീഴ്ത്തുകയായിരുന്നു. തുടര്‍ന്ന് വെട്ടുകത്തി കൊണ്ട് വെട്ടിക്കൊലപ്പെടുത്തി. മൃതദേഹത്തിന് മുകളില്‍ ടാര്‍പ്പോളിനും തുണിയും കൂട്ടിയിട്ട് പ്ലാസ്റ്റിക് കട്ടില്‍ കമിഴ്ത്തിയിട്ട് അതിന് മുകളില്‍ മദ്യം ഒഴിച്ചു കത്തിച്ചു.
അന്വേഷണത്തിനിടെ സംഭവ ദിവസം നവാസും ഷിബുവും പാങ്ങോട് ജംഗ്ഷനില്‍ വച്ചും വഴക്കിട്ടിരുന്നതായി പോലീസിന് വിവരം ലഭിച്ചിരുന്നു. ഇവര്‍ ഞായറാഴ്ച ഓട്ടോറിക്ഷയില്‍ വന്നിറങ്ങിയതു സംബന്ധിച്ച് നാട്ടുകാരുടെയും ഓട്ടോറിക്ഷ ഡ്രൈവറുടെയും മൊഴിയും ലഭിച്ചു. ഇതിന്റെ അടിസ്ഥാനത്തിലാണ് നവാസിനെ കസ്റ്റഡിയില്‍ എടുത്ത് ചോദ്യം ചെയ്തത്. ചോദ്യം ചെയ്യലില്‍ പ്രതി കുറ്റം സമ്മതിച്ചെന്ന് പോലീസ് അറിയിച്ചു.
