മലപ്പുറം: പെരിന്തൽമണ്ണ ജില്ലാ ആശുപത്രിയിലെ സർജിക്കൽ വാർഡിൽ നിന്ന് വീണ്ടും
പാമ്പുകളെ കണ്ടെത്തി. ഈ പരിസരത്ത് വിവിധ ഇടങ്ങളിലായി ആശുപത്രി ജീവനക്കാരാണ് പാമ്പുകുഞ്ഞുങ്ങളെ കണ്ടെത്തിയത്. ഇതോടെ ജീവനക്കാരും വാർഡിൽ ഉണ്ടായിരുന്ന രോഗികളും വലിയ ആശങ്കയിലായി.
ഉടൻതന്നെ ട്രോമാകെയർ അംഗങ്ങളെ വിവരം അറിയിക്കുകയായിരുന്നു .
ഇവർ സംഭവസ്ഥലത്തെത്തി ഉടൻതന്നെ പാമ്പുകളെ പിടികൂടാനുള്ള ശ്രമം ആരംഭിക്കുകയായിരുന്നു.
തുടർന്ന് നടത്തിയ പരിശ്രമത്തിനൊടുവിലാണ് മൂർഖൻ കുഞ്ഞുങ്ങളെ പിടികൂടിയത്.
ഇതോടെ മൂന്ന് ദിവസത്തിനുള്ളിൽ പെരിന്തൽമണ്ണ ജില്ലാ ആശുപത്രിയിലെ സർജിക്കൽ വാർഡിൽ നിന്ന് ലഭിച്ചത് 10 പാമ്പുകളെയാണ്. ഇതിനുമുമ്പും സമാനമായ രീതിയിൽ ഈ ഭാഗത്ത് പാമ്പുകളെ കണ്ടെത്തി പിടികൂടിയിട്ടുണ്ട്. ആശുപത്രിയുടെ ഈ സർജിക്കൽ വാർഡിന്റെ പരിസരത്ത് കാടുണ്ട്.
ഇതാണ് പാമ്പുകൾ ഇത്തരത്തിൽ ഹോസ്പിറ്റലിലേക്ക് എത്താൻ ഇടയാക്കുന്നത് എന്നാണ് ആരോപണം. പാമ്പുകളെ കണ്ടെത്തിയ സാഹചര്യത്തിൽ ഈ വാർഡിൽ ഉള്ളവരെ മറ്റു വാർഡുകളിലേക്ക് മാറ്റി. പാമ്പുകളെ തുടർച്ചയായി കണ്ടെത്തിയ സാഹചര്യത്തിൽ വാർഡിന്റെ സമീപത്തെ കാടുകൾ ഉടൻ തന്നെ വെട്ടി മാറ്റി ശുചീകരണം നടത്തുമെന്ന് ആശുപത്രി അധികൃതർ അറിയിച്ചു.
ആശുപത്രിയിലെ സർജിക്കൽ വാർഡ് താത്കാലികമായി അടച്ചു. എട്ടു രോഗികളാണ് ഇവിടെ ഉണ്ടായിരുന്നത്. കഴിഞ്ഞ മൂന്നു ദിവസങ്ങളിലായി തുടർച്ചയായി വിവിധ ഇടങ്ങളിൽ നിന്നാണ് പാമ്പുകളെ കണ്ടെത്തിയത്. അടഞ്ഞുകിടക്കുന്ന എമർജൻസി ഓപ്പറേഷൻ തിയേറ്ററിൽ പാമ്പുകളെ കണ്ടെത്തി. നാലു പാമ്പുകളെ ആശുപത്രി ജീവനക്കാരും ആറു പാമ്പുകളെ ആ പാമ്പുകളെ ട്രോമാക്കാർ വളണ്ടിയർമാരുമാണ് കണ്ടെത്തിയത്.