FAKE BIRTH CERTIFICATE 🤱കളമശേരി ശിശുക്കടത്ത് കേസിൽ അന്വേഷണം നടത്താതെ ഒത്തുകളിയെന്ന് ആരോപണം,പോലീസ് സ്റ്റേഷൻ മാർച്ചിൽ സംഘർഷം,നാല് പ്രവർത്തകർക്ക് പരിക്ക്

കൊച്ചി: : എറണാകുളം ഗവൺമെന്റ് മെഡിക്കൽ കോളേജിലെ ശിശു കടത്തിലും വ്യാജ ജനന സർട്ടിഫിക്കറ്റ് കേസിലും അന്വേഷണം നടത്താതെ പോലീസ് യഥാർത്ഥ പ്രതികളെ രക്ഷപ്പെടാൻ സഹായിക്കുന്നു എന്നാരോപിച്ച് യൂത്ത് കോൺഗ്രസ് പ്രവർത്തകർ നടത്തിയ മാർച്ചിൽ സംഘർഷം. കളമശേരി പോലീസ് സ്റ്റേഷനിലേക്ക് യൂത്ത് കോൺഗ്രസ് കളമശേരി മണ്ഡലം കമ്മിറ്റിയാണ് മാർച്ച് സംഘടിപ്പിച്ചത്. മാർച്ചിന് നേരെ നടന്ന പോലീസ് അക്രമത്തിൽ നാല് യൂത്ത് കോൺഗ്രസ് പ്രവർത്തകർക്ക് പരിക്കേറ്റു. ഇതിൽ ഒരാളുടെ തലയ്ക്കാണ് പരിക്കേറ്റത്. ഇവരെ കളമശേരിയിലെ സ്വകാര്യ ആശുപത്രിയിൽ പ്രവേശിപ്പിച്ചു.

അന്വേഷണം പരമാവധി വൈകിപ്പിച്ച് കേസിൽ നിർണ്ണായകമായ തെളിവുകൾ നശിപ്പിക്കാൻ മെഡിക്കൽ സൂപ്രണ്ടടക്കമുള്ളവർക്ക് പോലീസ് സാഹചര്യം ഒരുക്കി നൽകുകയാണെന്ന് മാർച്ച് ഉദ്ഘാടനം ചെയ്ത കെപിസിസി വൈസ് പ്രസിഡന്റ് വി പി സജീന്ദ്രൻ പറഞ്ഞു. ആശുപത്രിയിൽ നടന്ന കുറ്റകൃത്യം പുറത്ത് കൊണ്ടുവന്ന നഗരസഭ ജീവനക്കാരി ഡിജിപിയ്ക്ക് വരെ പരാതി നൽകിയിട്ടും പോലീസിന്റെ മൗനം തുടരുകയാണ്.

കേസിൽ മുഖ്യ ആസൂത്രകനെന്ന് സംശയമുള്ള സൂപ്രണ്ട് ഗണേഷ് മോഹനെ സംരക്ഷിക്കുന്നത് പി രാജീവാണ്. രാജീവ് മണ്ഡലത്തിൽ നടത്തുന്ന മെഡിക്കൽ ക്യാമ്പിന് നേതൃത്വം നൽകുന്നതും ഗണേഷാണ്. അന്വേഷണം നടത്താതിരിക്കാൻ മന്ത്രി രാജീവിന്റെ നിർദേശമുണ്ടെന്നും സജീന്ദ്രൻ പറഞ്ഞു.

രാവിലെ പതിനൊന്നരയോടെ സൗത്ത് കളമശേരിയിൽ നിന്നാണ് മാർച്ച് ആരംഭിച്ചത്. പോലീസ് സ്റ്റേഷന് നൂറ് മീറ്റർ മുന്നിലായി റെയിൽവേ മേൽപ്പാലത്തിന് അരികിൽ റോഡിൽ ബാരിക്കേഡ് വച്ച് പോലീസ് മാർച്ച് തടഞ്ഞു. തുടർന്ന് പ്രവർത്തകർക്ക് നേരെ നിരവധി തവണ ജലപീരങ്കി പ്രയോഗിച്ചു. പ്രവർത്തകർ പിരിഞ്ഞ് പോകാതെ മുദ്രാവാക്യം വിളികളോടെ നിന്നതോടെ പോലീസ് അക്രമം അഴിച്ച് വിടുകയായിരുന്നു.

അവിടെ ഉണ്ടായിരുന്നവരുടെ എല്ലാം നേരെ ലാത്തി വീശി. ബാരിക്കേഡിന് അപ്പുറത്ത് വന്നാണ് പോലീസ് ലാത്തിച്ചാർജ് നടത്തിയത്. സി ഐ തടഞ്ഞിട്ടും അത് അവഗണിച്ച് ചില സായുധ പോലീസുകാരാണ് അക്രമം അഴിച്ച് വിട്ടത്. യൂത്ത് കോൺഗ്രസ് പ്രവർത്തകൻ അരുണിന്റെ തല തല്ലി തകർത്തു. അരുണിനൊപ്പം പരിക്കറ്റ മറ്റു മൂന്ന് പേരെയും ആശുപത്രിയിൽ പ്രവേശിപ്പിച്ചു. കോൺഗ്രസ് മണ്ഡലം പ്രസിഡന്റ് പി എം നജീബ്, എം എ വഹാബ്, ഷംസു തലക്കോട്ടിൽ എന്നിവർക്കാണ് പരിക്കേറ്റത്.

യൂത്ത് കോൺഗ്രസ് കളമശേരി മണ്ഡലം പ്രസിഡന്റ് റസീഫ് അടമ്പയിൽ, കോൺഗ്രസ് ബ്ലോക്ക് പ്രസിഡന്റ് വി കെ ഷാനവാസ്, അഷ്കർ പനയപ്പിള്ളി, മധു പുറക്കാട്ട്, അൻവർ ഞാക്കട, അൻസാർ തോരേത്ത്, അനസ് കെ എം, ബിന്ദു രാജീവ്, ഷൈജ ബെന്നി, നാസർ എടയാർ, വി ജി ജയകുമാർ, മനോജ് മണി തുടങ്ങിയവർ മാർച്ചിന് നേതൃത്വം നൽകി.

ചിത്രം : ശിശുക്കടത്ത് കേസിലെ യഥാർത്ഥ പ്രതികളെ രക്ഷപ്പെടുത്താൻ പോലീസ് ശ്രമിക്കുന്നു എന്നാരോപിച്ച് യൂത്ത് കോൺഗ്രസ് നടത്തിയ മാർച്ച് വിപി സജീന്ദ്രൻ ഉദ്ഘാടനം ചെയ്യുന്നു