പന്തളം: എം.സി റോഡില് പന്തളം തോന്നല്ലൂര് കാണിക്കവഞ്ചി കവലയ്ക്കു സമീപം കെഎസ്ആര്ടിസി സൂപ്പര് ഫാസ്റ്റ് ബസിടിച്ച് ഭര്ത്താവിനൊപ്പം സ്കൂട്ടറില് സഞ്ചരിച്ച യുവതി മരിച്ചു. എറണാകുളം മൂവാറ്റുപുഴ ഊരമന വള്ളുക്കാട്ടില് എല്ദോസ് ബി.വര്ഗീസിന്റെ ഭാര്യ ലീനു എല്ദോസ്(35)ആണ് മരിച്ചത്. ശനിയാഴ്ച രാവിലെ പത്തുമണിയോടെയാണ് അപകടം. തൊടുപുഴയില് നിന്നു തിരുവനന്തപുരത്തേക്ക് വന്ന ബസാണ് അപകടത്തിനിടയാക്കിയത്.
തിങ്കളാഴ്ച യുകെയിലേക്ക് പോകുന്ന ലീനുവിന്റെ സഹോദരിയെ യാത്രയാക്കാന് ഭര്ത്താവുമൊത്ത് പട്ടാഴിയിലെ കുടുംബ വീട്ടിലേക്ക് വരുന്ന വഴിക്കായിരുന്നു അപകടം.
സ്കൂട്ടറിനെ മറികടന്നു വന്ന ബസിന്റെ പിന്ഭാഗം തട്ടി ലീനു ബസിനടിയിലേക്ക് വീഴുകയായിരുന്നു. ഗുരുതരമായ പരുക്കുകളോടെ പന്തളത്തെ സ്വകാര്യ ആശുപത്രിയിലെത്തിച്ചെങ്കിലും മരിച്ചു. എല്ദോസിന് നിസ്സാര പരുക്കേറ്റു. മസ്കറ്റില് നഴ്സായി ജോലി ചെയ്യുന്ന ഇരുവരും രണ്ടാഴ്ച മുന്പാണ് അവധിക്ക് നാട്ടില് വന്നത്. പട്ടാഴി മീനം സ്വാമി നഗറില് സായകത്തില് ജയകുമാറിന്റെയും ലീലാമണിയുടെയും മകളാണ് ലീനു.