കൂട്ടുകാർക്കൊപ്പം കളിച്ചുകൊണ്ടിരിക്കവേ കാട്ടുപന്നിയുടെ ആക്രമണം; പത്തുവയസ്സുകാരന്റെ കൈക്ക് പരിക്ക്; സംഭവം കോഴിക്കോട്

കോഴിക്കോട്: വീടിന് സമീപത്തെ പറമ്പില്‍ കളിക്കുകയായിരുന്ന പത്തുവയസ്സുകാരനെ കാട്ടുപന്നി ആക്രമിച്ചു. കോഴിക്കോട് നാദാപുരത്താണ് സംഭവം. വാണിമേല്‍ വയല്‍പീടികയില്‍ താമസിക്കുന്ന പറമ്പത്ത് ഗഫൂറിന്റെ മകന്‍ ജസ്ലനാണ് കൈക്ക് പരിക്കേറ്റത്. ജസ്ലന്‍ ആശുപത്രിയില്‍ ചികിത്സ തേടി.

രാവിലെ വീടിന് സമീപത്തെ പറമ്പില്‍ സുഹൃത്തുക്കളോടൊപ്പം കളിച്ചുകൊണ്ടിരിക്കവേയാണ് പൊടുന്നനെ കാട്ടുപന്നി പാഞ്ഞടുത്ത് ആക്രമിച്ചത്. ജനസാന്ദ്രതയുള്ള സ്ഥലങ്ങളില്‍ പോലും കാട്ടുപന്നിയുടെ ആക്രമണം നടക്കുന്നതില്‍ ജനങ്ങള്‍ ആശങ്കയിലാണ്. കഴിഞ്ഞ ദിവസം സമീപ പ്രദേശമായ അരൂരില്‍ കാട്ടുപന്നിയുടെ ആക്രമണത്തില്‍ രണ്ട് പേര്‍ക്ക് സാരമായി പരിക്ക് പറ്റിയിരുന്നു.