കൊച്ചി: മോഹന്ലാലിനെ നായകനാക്കി പൃഥ്വിരാജ് സുകുമാരന് സംവിധാനം ചെയ്ത എമ്പുരാന് ഈമാസം 27-ന് റിലീസിന് ഒരുങ്ങുകയാണ്. ശ്രീ ഗോകുലം മൂവീസ്, ആശീര്വാദ് സിനിമാസ്, ലൈക്ക പ്രൊഡക്ഷന്സ് എന്നിവയുടെ ബാനറില് ഗോകുലം ഗോപാലന്, ആന്റണി പെരുമ്പാവൂര്, സുഭാസ്കരന് എന്നിവര് ചേര്ന്നാണ് ചിത്രം നിര്മിച്ചിരിക്കുന്നത്. സിനിമയുടെ തടസ്സം തീര്ക്കാന് അവസാന നിമിഷമാണ് ചിത്രത്തിലേക്ക് ഗോകുലം എത്തിയത്.
ചിത്രത്തിന്റെ നിര്മാണ പങ്കാളിയായി എത്തിയതിലുള്ള സന്തോഷവും അതിനുള്ള കാരണവുംവെളിപ്പെടുത്തിയിരിക്കുകയാണ് ഗോകുലം ഗോപാലന്. സിനിമ തിരഞ്ഞെടുക്കുന്നത് ബജറ്റ് നോക്കിയല്ല കണ്ടന്റും പ്രേക്ഷക അഭിലാഷവും മാനദണ്ഡമാക്കിയാണ്. മലയാള സിനിമയിലെ ഏറ്റവും മികച്ച ചിത്രങ്ങളില് ഒന്നാണ് ഇതെന്നും, അത്ര മനോഹരമായാണ് പൃഥ്വിരാജ് ഇത് ഒരുക്കിയിരിക്കുന്നതെന്നും ഈ ചിത്രത്തിന്റെ കുറച്ചു ഭാഗങ്ങള് കണ്ടപ്പോള് തോന്നിയത്.
ഇത്രയും മികച്ച ഒരു സിനിമ, ഒരു തടസങ്ങളും കൂടാതെ പറഞ്ഞ സമയത്ത് തന്നെ പ്രേക്ഷകരുടെ മുന്നിലെത്തിക്കണം എന്ന ആഗ്രഹം ഉള്ളതു കൊണ്ടും ലാലിനോടും ആന്റണിയോടുമുള്ള സ്നേഹംകൊണ്ടും തന്നെയാണ് താന് ഇതില് പങ്കാളി ആയതെന്നും അദ്ദേഹം കൂട്ടിച്ചേര്ത്തു. റിലീസിന് മുമ്പേ തന്നെ ഇന്ത്യന് സിനിമയില് പുതിയ റെക്കോര്ഡുകള് സൃഷ്ടിച്ചു മുന്നേറുകയാണ് എമ്പുരാന്. ചിത്രത്തിന്റെ ഓള് ഇന്ത്യ അഡ്വാന്സ് ടിക്കറ്റ് ബുക്കിങ് മാര്ച്ച് 21-ന് രാവിലെ ഒമ്പതുമണിക്കാണ് ആരംഭിച്ചത്. ബുക്കിങ് ആരംഭിച്ചു ഇതിനോടകം എട്ടുലക്ഷത്തിന് മുകളില് ടിക്കറ്റുകളാണ് ബുക്ക് മൈ ഷോ വഴി മാത്രം ചിത്രത്തിന്റേതായി ഇന്ത്യയില് വിറ്റഴിഞ്ഞത്.
ഇത് ഇന്ത്യന് സിനിമയിലെ തന്നെ പുതിയ റെക്കോര്ഡ് ആണ്. ആദ്യ 48 മണിക്കൂറില് ഒരു ഇന്ത്യന് ചിത്രത്തിന് ഇത്രയധികം ടിക്കറ്റുകള് ബുക്ക് മൈ ഷോയിലൂടെ വിറ്റ് പോകുന്നത് ഇതാദ്യമായാണ്. ബുക്കിങ് ട്രെന്ഡിങ്ങില് ഒരു മണിക്കൂറില് ഒരു ലക്ഷത്തിനടുത്ത് ടിക്കറ്റുകള് വിറ്റും ചിത്രം റെക്കോര്ഡ് സൃഷ്ടിച്ചിരുന്നു.
മുരളി ഗോപി രചിച്ച ഈ ചിത്രം മലയാള സിനിമയുടെ ചരിത്രത്തിലെ ആദ്യത്തെ ഐമാക്സ് റിലീസായി എത്തുന്ന ചിത്രം കൂടിയാണ്. മാര്ച്ച് 27-ന് ഇന്ത്യന് സമയം രാവിലെ ആറ് മണി മുതല് ചിത്രത്തിന്റെ ആഗോള പ്രദര്ശനം ആരംഭിക്കും. ചിത്രത്തിന്റെ തമിഴ്നാട് ഡിസ്ട്രിബ്യൂഷന് ഗോകുലം ഗോപാലന്റെ ഉടമസ്ഥതയിലുള്ള ശ്രീ ഗോകുലം മൂവീസ് ആണ്. ദില് രാജുവിന്റെ ഉടമസ്ഥതയിലുള്ള ശ്രീ വെങ്കടേശ്വര ക്രിയേഷന്സ് ചിത്രം ആന്ധ്ര- തെലുങ്കാന സംസ്ഥാനങ്ങളില് വിതരണം ചെയ്യുമ്പോള്, അനില് തഡാനി നേതൃത്വം നല്കുന്ന എഎ ഫിലിംസാണ് ചിത്രം നോര്ത്ത് ഇന്ത്യയില് എത്തിക്കുന്നത്. കര്ണാടകയിലെ ഡിസ്ട്രിബ്യൂഷന് പാര്ട്ണര് കന്നഡയിലെ വമ്പന് സിനിമാ നിര്മാണ വിതരണ കമ്പനിയായ ഹോംബാലേ ഫിലിംസ് ആണ്.
ഇതിനോടകം 35 കോടിയോളം രൂപയാണ് പ്രീ സെയില്സ് വഴി മാത്രം ചിത്രം ആഗോളതലത്തില് നേടിയത്. കേരളത്തില് നിന്ന് 10 കോടിയോളം പ്രീ സെയില്സായി നേടിയ ചിത്രം വിദേശത്ത് നിന്നും 20 കോടിക്ക് മുകളില് നേടി. റെസ്റ്റ് ഓഫ് ഇന്ത്യ മാര്ക്കറ്റിലും വമ്പന് അഡ്വാന്സ് ബുക്കിങ് ആണ് ചിത്രത്തിന് ലഭിക്കുന്നത്. കര്ണാടകയില് ഇതിനോടകം മലയാള സിനിമയുടെ ചരിത്രത്തിലെ ഏറ്റവും വലിയ ഓപ്പണിംഗ് ഗ്രോസ് ബുക്കിങ്ങിലൂടെ മാത്രം നേടിയ ചിത്രത്തിന്റെ തമിഴ്നാട് ബുക്കിങ്ങും റെക്കോര്ഡുകള് ഭേദിക്കുകയാണ്.
മോഹന്ലാല് നായകനായി അഭിനയിക്കുന്ന ചിത്രത്തില് പൃഥ്വിരാജ്, മഞ്ജു വാര്യര്, ടൊവിനോ തോമസ്, ഇന്ദ്രജിത് സുകുമാരന്, സുരാജ് വെഞ്ഞാറമൂട്, ജെറോം ഫ്ലിന്, ബൈജു, സായ്കുമാര്, ആന്ഡ്രിയ ടിവാടര്, അഭിമന്യു സിങ്, സാനിയ അയ്യപ്പന്, ഫാസില്, സച്ചിന് ഖേഡ്കര്, നൈല ഉഷ, ജിജു ജോണ്, നന്ദു, മുരുകന് മാര്ട്ടിന്, ശിവജി ഗുരുവായൂര്, മണിക്കുട്ടന്, അനീഷ് ജി. മേനോന്, ശിവദ, അലക്സ് ഒനീല്, എറിക് എബണി, കാര്ത്തികേയ ദേവ്, മിഹയേല് നോവിക്കോവ്, കിഷോര്, സുകാന്ത്, ബെഹ്സാദ് ഖാന്, നിഖാത് ഖാന്, സത്യജിത് ശര്മ, നയന് ഭട്ട്, ശുഭാംഗി, ജൈസ് ജോസ് എന്നിവരാണ് മറ്റു താരങ്ങള്. മലയാളം, തമിഴ്, തെലുങ്ക്, ഹിന്ദി, കന്നഡ ഭാഷകളില് ചിത്രം പ്രദര്ശനത്തിനെത്തും.