IPL Live:🏏ഔട്ടായതു വിശ്വസിക്കാനാകാതെ കോലി, ഞെട്ടി അനുഷ്ക; മോശം പെരുമാറ്റത്തിന് പിഴയും

ബെംഗളൂരു: ചെന്നൈ സൂപ്പർ കിങ്സിനെതിരായ മത്സരത്തിൽ ചെറിയ സ്കോറില്‍ പുറത്തായതിനു പിന്നാലെ സൂപ്പർ താരം വിരാട് കോലിക്ക് മോശം പെരുമാറ്റത്തിന്റെ പേരിൽ പിഴയും. ചെന്നൈയ്ക്കെതിരായ മത്സരത്തിനിടെ കോലി അച്ചടക്കം ലംഘിച്ചതായി കണ്ടെത്തിയാണു നടപടിയെടുത്തത്. ആർസിബിയുടെ ഹോം ഗ്രൗണ്ടായ ബെംഗളൂരു ചിന്നസ്വാമി സ്റ്റേ‍ഡിയത്തിൽ നടന്ന മത്സരത്തിൽ വിരാട് കോലിക്കു ബാറ്റിങ്ങില്‍ തിളങ്ങാൻ സാധിച്ചിരുന്നില്ല.

നാലു പന്തുകൾ നേരിട്ട കോലി ആറു റൺസ് മാത്രമെടുത്തു പുറത്താകുകയായിരുന്നു. ഇന്ത്യൻ താരം ആകാശ് സിങ്ങിന്റെ പന്തിലാണ് കോലിയുടെ പുറത്താകൽ. കോലിയുടെ ബാറ്റിലും പാഡിലും തട്ടിയ പന്ത് ഒടുവിൽ വിക്കറ്റിൽ ഇടിക്കുകയായിരുന്നു.

അപ്രതീക്ഷിതമായ പുറത്താകല്‍ വിശ്വസിക്കാനാകാതെയാണ് കോലി ഗ്രൗണ്ട് വിട്ടത്. ബാംഗ്ലൂർ ഇന്നിങ്സിലെ ആദ്യ ഓവറിൽ തന്നെ കോലി പുറത്തായതുകണ്ട് ഭാര്യയും നടിയുമായ അനുഷ്ക ശർമയും ഞെട്ടി. 

കോലി പുറത്തായപ്പോൾ ഗാലറിയിൽ നിരാശയോടെ നിൽക്കുന്ന അനുഷ്കയുടെ വി‍ഡിയോ സമൂഹമാധ്യമങ്ങളിൽ വൈറലാണ്. അച്ചടക്ക നടപടി നേരിട്ട കോലി മാച്ച് ഫീസിന്റെ പത്ത് ശതമാനം പിഴയായി അടയ്ക്കേണ്ടിവരും. കോലിക്കെതിരെ നടപടിയുണ്ടാകുമെന്ന് ഐപിഎൽ അധികൃതർ അറിയിച്ചെങ്കിലും, എപ്പോഴാണ് കോലി അച്ചടക്കം ലംഘിച്ചതെന്നു വ്യക്തമല്ല. ചെന്നൈ സൂപ്പർ കിങ്സ് താരം ശിവം ദുബെയെ പുറത്താക്കിയതിന്റെ ആഘോഷം അതിരുവിട്ടതാകാം നടപടിക്കു കാരണമെന്നാണു കരുതുന്നത്. 

മത്സരത്തിൽ റോയൽ ചാലഞ്ചേഴ്സിനെ തകർത്ത് എട്ട് റൺസിന് ചെന്നൈ വിജയിച്ചിരുന്നു. 227 റൺസ് വിജയ ലക്ഷ്യവുമായി ഇറങ്ങിയ ബാംഗ്ലൂരിന് എട്ട് വിക്കറ്റ് നഷ്ടത്തിൽ 218 റൺസെടുക്കാനേ സാധിച്ചുള്ളൂ. ആറു പോയിന്റുള്ള ചെന്നൈ പട്ടികയിൽ മൂന്നാം സ്ഥാനത്താണ്. മൂന്നാം തോൽവി വഴങ്ങിയ ബാംഗ്ലൂര്‍ ഏഴാമതാണ്.