ആലപ്പുഴ: അമ്പലപ്പുഴ ശ്രീകൃഷ്ണ സ്വാമി ക്ഷേത്രത്തിലെ പായസ വിൽപന കൗണ്ടറിൽ വിജിലൻസ് റെയ്ഡ്. വഴിപാട് കൗണ്ടർ വഴി ദേവസ്വം ബോർഡ് അനുവദിച്ചിരിക്കുന്ന അളവിൽ കൂടുതൽ പായസം രസീത് ഇല്ലാതെ കൂടിയ വിലയ്ക്ക് വിൽപന നടത്തുന്നുവെന്ന ആക്ഷേപത്തെ തുടർന്നാണ് റെയ്ഡ് നടത്തിയത്.
ദേവസ്വം അസിസ്റ്റന്റ് കമ്മീഷണറുടെ ഒത്താശയോടെയായിരുന്നു അനധികൃത വിൽപനയെന്നായിരുന്നു ആക്ഷേപം. കോട്ടയം വിജിലൻസ് റേഞ്ച് ഡിവൈഎസ്പി മനോജ് കുമാർ പിവിയുടെ നേതൃത്വത്തിൽ കോട്ടയത്ത് നിന്നുള്ള വിജിലൻസ് സംഘമാണ് പരിശോധന നടത്തിയത്.
വിജിലൻസ് പരിശോധനയിൽ ഷിജു, സുന്ദരേശൻ എന്നീ ഏജൻ്റുമാർ ഓൺലൈൻ മുഖാന്തരം അപേക്ഷിക്കുന്നവർക്ക് നൽകുന്ന 160 രൂപയുടെ പാസ് പല ആളുകളുടെ പേരിൽ ബുക്ക് ചെയ്ത ശേഷം വിൽപന കൗണ്ടറിൽനിന്നു നേരിട്ട് കൈപ്പറ്റി കൂടിയ വിലയ്ക്ക് അഡ്മിനിസ്ട്രേറ്റീവ് ഓഫീസിന് മുൻവശത്തുവെച്ചു പ്രസാദം വാങ്ങാനെത്തുന്നവർക്ക് വിൽപന നടത്തുന്നതായി കണ്ടെത്തി.
കരിഞ്ചന്തയിൽ പ്രസാദം വിൽപന നടത്തുന്ന ഏജൻ്റുമാരുടെ പ്രവൃത്തി തടയേണ്ട ദേവസ്വം അസിസ്റ്റൻ്റ് കമ്മീഷണർ, കൗണ്ടർ ജീവനക്കാർ എന്നിവർ യാതൊരു നടപടിയും സ്വീകരിച്ചില്ലെന്ന് വിജിലൻസ് കണ്ടെത്തിയിട്ടുണ്ട്. ഏജൻ്റുമാർക്ക് അനുകൂല മനോഭാവം സ്വീകരിക്കുന്നതും അളവിൽ കൂടുതലും കൂടിയ വിലയ്ക്ക് വിൽപനയ്ക്ക് നടത്തുന്നതും ഏജൻ്റുമാരിൽനിന്നു പണം കൈപ്പറ്റിയാണെന്നും കണ്ടെത്തി. പ്രതിദിനം 246 ലിറ്റർ പാൽപ്പായസം വിൽപ്പന നടത്താനാണ് അനുമതി.