വയനാട്: താമരശ്ശേരി ചുരത്തില് ഭാരവാഹനങ്ങള്ക്ക് കര്ശന നിയന്ത്രണം. കാലവര്ഷം കനക്കുന്ന സാഹചര്യത്തില് അപകടങ്ങള് ഒഴിവാക്കുന്നതിനും യാത്രക്കാരുടെ സുരക്ഷയും സുഗമമായ ഗതാഗതം ഉറപ്പാക്കുന്നതിനുമായാണ് ചുരത്തില് (ദേശീയ പാത 766) ഗതാഗത നിയന്ത്രണം ഏര്പ്പെടുത്തുന്നത്. ചുരത്തിലൂടെയയുള്ള വലിയ മള്ട്ടി ആക്സില് വാഹനങ്ങളുടെയും ഹെവി ഗുഡ്സ് വാഹനങ്ങളുടെയും ആര്ട്ടിക്കുലേറ്റഡ് ലോറികളുടെയും യാത്രയ്ക്ക് കര്ശന നിയന്ത്രണം ഏര്പ്പെടുത്തി വയനാട് ജില്ലാ കളക്ടറും ജില്ലാ ദുരന്തനിവാരണ അതോറിറ്റി അദ്ധ്യക്ഷയുമായ ഡി.ആര് മേഘശ്രീ ഉത്തരവിട്ടു. രാവിലെ ആറ് മുതല് രാത്രി എട്ട് വരെയാണ് നിയന്ത്രണം. മഴക്കാലം അവസാനിക്കുന്നത് വരെയോ അല്ലെങ്കില് മറ്റൊരു ഉത്തരവ് ഉണ്ടാകുന്നതു വരെയോ നിരോധനം നിലനില്ക്കും.
അതേസമയം കെഎസ്ആര്ടിസി ബസുകള്, സ്വകാര്യ കാറുകളും ജീപ്പുകളും ടാക്സികളും ഉള്പ്പെടുന്ന ലൈറ്റ് മോട്ടോര് വാഹനങ്ങള്, ആംബുലന്സുകള്, ആരോഗ്യ അടിയന്തര സാഹചര്യങ്ങളുമായി ബന്ധപ്പെടുന്നവ ഉള്പ്പെടെയുള്ള അവശ്യ സേവന വാഹനങ്ങള്, പൊലീസ്, ഫയര്ഫോഴ്സ്, സിവില് ഡിഫന്സ്, ദുരന്ത പ്രതികരണ വിഭാഗങ്ങള്, സൈന്യം, അര്ദ്ധസൈനിക വിഭാഗങ്ങള് തുടങ്ങിയവയ്ക്ക് നിയന്ത്രണം ബാധകമല്ല. ചുരത്തിലെ നിയന്ത്രണം ലംഘിക്കുന്നവര്ക്കെതിരെ ദുരന്ത നിവാരണ നിയമ പ്രകാരം കര്ശനമായ നടപടികള് സ്വീകരിക്കും. സാഹചര്യം പരിഗണിച്ച് ആവശ്യമായ സമയങ്ങളില് നിയന്ത്രണങ്ങളില് മാറ്റം വരുത്തുമെന്നും ജില്ലാ കളക്ടര് അറിയിച്ചു.