വാഷിങ്ടണ്/ടെഹ്റാന്: തന്ത്രപ്രധാനമായ ഹോര്മുസ് കടലിടുക്കിന്റെ പൂര്ണ്ണ നിയന്ത്രണം വൈകാതെ അമേരിക്കയുടെ കൈകളിലാകുമെന്ന് യു.എസ്. പ്രസിഡന്റ് ഡൊണാള്ഡ് ട്രംപ്. മേഖലയില് ഇറാന് മേലുള്ള ഉപരോധം പുനരാരംഭിച്ചതിന് തൊട്ടുപിന്നാലെയാണ് ഇറാന്റെ സൈനിക താവളങ്ങള് ലക്ഷ്യമിട്ട് അമേരിക്കന് സേന വീണ്ടും കനത്ത വ്യോമാക്രമണം നടത്തിയത്.
കടലിടുക്കില് ഇറാന്റെ എല്ലാത്തരം ആക്രമണ ശേഷികളും പൂര്ണ്ണമായും തകര്ക്കുകയാണ് തങ്ങളുടെ ലക്ഷ്യമെന്ന് അമേരിക്കന് സെന്ട്രല് കമാന്ഡ് (സെന്റകോം) വക്താവ് അറിയിച്ചു. തുടര്ച്ചയായ മൂന്നാം രാത്രിയിലും യു.എസ്. വ്യോമസേനയും നാവികസേനയും ഇറാന്റെ മിസൈല്-ഡ്രോണ് കേന്ദ്രങ്ങള്ക്കും കമ്മ്യൂണിക്കേഷന് ശൃംഖലകള്ക്കും നേരെ ബോംബാക്രമണം തുടരുകയാണ്.ഹോര്മുസ് കടലിടുക്കിലൂടെ സഞ്ചരിക്കുന്ന വാണിജ്യ ചരക്കുകപ്പലുകള്ക്ക് സുരക്ഷയൊരുക്കുന്നതിന് പകരമായി 20 ശതമാനം സര്ചാര്ജ് (ഫീസ്) ഈടാക്കുമെന്നും ട്രംപ് പ്രഖ്യാപിച്ചു. ഇനി മുതല് ‘ദി ഗാര്ഡിയന് ഓഫ് ദി ഹോര്മുസ് സ്ട്രെയിറ്റ്’ എന്നാണ് അമേരിക്ക അറിയപ്പെടുകയെന്ന് ട്രംപ് തന്റെ ട്രൂത്ത് സോഷ്യല് അക്കൗണ്ടിലൂടെ വ്യക്തമാക്കി.
അതേസമയം, ട്രംപിന്റെ പ്രഖ്യാപനങ്ങളെ പൂര്ണ്ണമായി തള്ളി ഇറാനും രംഗത്തെത്തിയിട്ടുണ്ട്. ഹോര്മുസ് കടലിടുക്കിന്റെ പൂര്ണ്ണ അവകാശവും നിയന്ത്രണവും തങ്ങള്ക്കാണെന്ന് ഇസ്ലാമിക് റവല്യൂഷണറി ഗാര്ഡ് കോര്പ്സ് (ഐ.ആര്.ജി.സി.) ആവര്ത്തിച്ചു വ്യക്തമാക്കി. അമേരിക്കന് ഇടപെടല് അവസാനിപ്പിക്കാതെ ഒരു കപ്പലിനെയും പ്രദേശത്തുകൂടി കടന്നുപോകാന് അനുവദിക്കില്ലെന്നാണ് ഇറാന്റെ മുന്നറിയിപ്പ്.അന്താരാഷ്ട്ര ജലപാതകളിലൂടെയുള്ള സഞ്ചാരത്തിന് അനാവശ്യമായി സര്ചാര്ജ് ഈടാക്കാനുള്ള ട്രംപിന്റെ നീക്കം ആഗോള സമുദ്ര നിയമങ്ങളുടെ ലംഘനമാണെന്ന വിലയിരുത്തലുമുണ്ട്. അമേരിക്കയും ഇറാനും തമ്മിലുള്ള ഈ ശാഠ്യം ആഗോളതലത്തില് വലിയ രീതിയിലുള്ള സാമ്പത്തിക പ്രത്യാഘാതങ്ങള് ഉണ്ടാക്കുമെന്ന് സാമ്പത്തിക വിദഗ്ധര് ചൂണ്ടിക്കാണിക്കുന്നു.
സംഘര്ഷം കൂടുതല് പ്രദേശങ്ങളിലേക്ക് പടരുന്നതിന്റെ ഭാഗമായി യെമനിലും പുതിയ പോര്മുഖം തുറന്നിട്ടുണ്ട്. തലസ്ഥാനമായ സനയിലെ അന്താരാഷ്ട്ര വിമാനത്താവളത്തില് ഇറാനിയന് വിമാനം ഇറങ്ങുന്നത് തടയാന് സൗദി സഖ്യസേന ശക്തമായ ബോംബാക്രമണം നടത്തി.ഇതിന് പ്രത്യാക്രമണമായി സൗദി അറേബ്യയ്ക്കുനേരെ ഹൂതി വിമതര് ബാലിസ്റ്റിക് മിസൈലുകള് തൊടുത്തുവിട്ടെങ്കിലും സൗദി വ്യോമപ്രതിരോധ സേന അവ വിജയകരമായി തടഞ്ഞു. നിലവിലുണ്ടായിരുന്ന വെടിനിര്ത്തല് സന്ധി അവസാനിച്ചതായി ഇതോടെ ഹൂതി വക്താക്കള് പ്രഖ്യാപിച്ചു.
ഖത്തര്, ബഹ്റൈന്, കുവൈറ്റ്, ജോര്ദാന് തുടങ്ങിയ രാജ്യങ്ങളിലെ യു.എസ്. സൈനിക താവളങ്ങള് ലക്ഷ്യമിട്ടും ഇറാന് ആക്രമണം ശക്തമാക്കിയിട്ടുണ്ട്. ജോര്ദാനിലെ പ്രിന്സ് ഹസ്സന് എയര് ബേസിലെ യു.എസ്. കേന്ദ്രങ്ങള് തകര്ത്തതായി ഇറാന് അവകാശപ്പെട്ടെങ്കിലും നിസ്സാര നാശനഷ്ടങ്ങള് മാത്രമേ ഉണ്ടായിട്ടുള്ളൂവെന്ന് യു.എസ്. മറുപടി നല്കി.മേഖലയിലെ സംഘര്ഷവും ഉപരോധവും കാരണം ആഗോള വിപണിയില് എണ്ണവില കുതിച്ചുയരുകയാണ്. അന്താരാഷ്ട്ര വിപണിയില് ക്രൂഡ് ഓയില് വില അഞ്ച് ശതമാനം വര്ധിച്ച് ബ്രെന്റ് ക്രൂഡ് ബാരലിന് 79.93 ഡോളറിലെത്തി.
ഇരുരാജ്യങ്ങളും തമ്മില് മുന്പുണ്ടാക്കിയ സമാധാന കരാറുകള് പൂര്ണ്ണമായും തകര്ന്നതോടെ പശ്ചിമേഷ്യ കടുത്ത യുദ്ധത്തിലേക്ക് നീങ്ങുകയാണെന്ന ഭീതിയിലാണ് ലോകരാഷ്ട്രങ്ങള്. സമവായ ചര്ച്ചകള് പ്രതിസന്ധിയിലായതും സ്ഥിതിഗതികള് കൂടുതല് സങ്കീര്ണ്ണമാക്കുന്നു.
English Summary
The United States has declared its ultimate objective to entirely dismantle all offensive military capabilities of Iran in the strategic Strait of Hormuz. For the third consecutive night, the US Air Force and Navy launched heavy airstrikes targeting Iranian missile-drone launching pads and communication networks. US President Donald Trump confidently claimed that the United States would soon take full military control of the vital maritime trade route, a claim that Iran immediately and strongly rejected, warning of severe retaliation. The escalation follows the total collapse of recent diplomatic peace efforts, threatening global oil supplies and destabilizing the Middle East further.