ടെഹ്റാൻ : ഇസ്രായേലും അമേരിക്കയും സംയുക്തമായി ഇറാനെതിരെ ശക്തമായ സൈനിക നീക്കം ആരംഭിച്ചതോടെ മിഡിൽ ഈസ്റ്റ് മേഖലയിൽ അതീവ ഗുരുതരമായ സാഹചര്യമാണ് നിലനിൽക്കുന്നത്. ടെഹ്റാൻ ഉൾപ്പെടെയുള്ള പ്രധാന ഇറാനിയൻ നഗരങ്ങളെ ലക്ഷ്യമിട്ട് ശനിയാഴ്ച ഉച്ചയോടെയാണ് (2026 ഫെബ്രുവരി 28) ഈ സംയുക്ത ആക്രമണം ഉണ്ടായതെന്ന് അന്താരാഷ്ട്ര മാധ്യമങ്ങൾ റിപ്പോർട്ട് ചെയ്യുന്നു. ഇറാന്റെ ആണവ പദ്ധതികളും മിസൈൽ താവളങ്ങളും തകർക്കുക എന്ന ലക്ഷ്യത്തോടെ ‘ഓപ്പറേഷൻ ഷീൽഡ് ഓഫ് യൂദാ’ (Operation Shield of Judah) എന്ന പേരിലാണ് ഈ നീക്കം നടക്കുന്നത്.
ആക്രമണത്തിന് പിന്നാലെ പശ്ചിമേഷ്യയിലെ വ്യോമഗതാഗതം പൂർണ്ണമായും സ്തംഭിക്കുകയും പ്രധാന വ്യോമപാതകൾ അടയ്ക്കുകയും ചെയ്തിട്ടുണ്ട്.യുദ്ധം പൊട്ടിപ്പുറപ്പെട്ടതിന് തൊട്ടുപിന്നാലെ സുരക്ഷാ കാരണങ്ങൾ മുൻനിർത്തി ഇറാൻ തങ്ങളുടെ ആകാശപരിധി പൂർണ്ണമായും അടച്ചതായി പ്രഖ്യാപിച്ചു. പ്രത്യാക്രമണ സാധ്യത കണക്കിലെടുത്ത് ഇസ്രയേലും തങ്ങളുടെ വ്യോമപാതയിൽ സിവിലിയൻ വിമാനങ്ങൾക്ക് വിലക്കേർപ്പെടുത്തിയിട്ടുണ്ട്. യുദ്ധം പടരാൻ സാധ്യതയുള്ളതിനാൽ അയൽരാജ്യമായ ഇറാഖും വ്യോമാതിർത്തി അടയ്ക്കാൻ തീരുമാനിച്ചു.
മേഖലയിലെ പ്രധാന വിമാനത്താവളങ്ങളായ ടെൽ അവീവിലെ ബെൻ ഗുറിയോൺ, ടെഹ്റാൻ വിമാനത്താവളം എന്നിവിടങ്ങളിൽ നിന്നുള്ള സർവീസുകൾ നിർത്തിവച്ചു. നിലവിൽ വിദേശ രാജ്യങ്ങളിൽ നിന്നുള്ള യാത്രക്കാർ അതത് രാജ്യങ്ങളിൽ തന്നെ തുടരാൻ നിർദ്ദേശം നൽകിയിട്ടുണ്ട്.വ്യോമാതിർത്തികൾ അടച്ചതോടെ യൂറോപ്പിനും ഏഷ്യയ്ക്കും ഇടയിലുള്ള ആഗോള വിമാന സർവീസുകളെ ഇത് സാരമായി ബാധിച്ചു. ഫ്ളൈറ്റ് ട്രാക്കിങ് വെബ്സൈറ്റായ ഫ്ളൈറ്റ് റഡാർ 24 (Flightradar24) പുറത്തുവിട്ട വിവരങ്ങൾ പ്രകാരം ഇറാന്റെയും ഇറാഖിന്റെയും ആകാശം ഇപ്പോൾ പൂർണ്ണമായും വിജനമാണ്.
ആകാശപാതയിലുണ്ടായിരുന്ന നിരവധി വിമാനങ്ങൾ സുരക്ഷിത സ്ഥാനങ്ങളിലേക്ക് വഴിതിരിച്ചുവിട്ടു. മിഡിൽ ഈസ്റ്റ് കടന്നുപോകേണ്ട വിമാനങ്ങൾ ഇപ്പോൾ സൗദി അറേബ്യ വഴിയോ മധ്യേഷ്യൻ രാജ്യങ്ങൾ വഴിയോ ചുറ്റിക്കറങ്ങിയാണ് സർവീസ് നടത്തുന്നത്. ഇത് യാത്രാസമയവും ഇന്ധനച്ചെലവും വൻതോതിൽ വർദ്ധിപ്പിക്കാൻ കാരണമായി.ഇന്ത്യ ഉൾപ്പെടെയുള്ള രാജ്യങ്ങളിൽ നിന്നുള്ള വിമാന സർവീസുകളെ ഈ സാഹചര്യം നേരിട്ട് ബാധിച്ചിട്ടുണ്ട്. ഡൽഹിയിൽ നിന്നും ടെൽ അവീവിലേക്ക് പുറപ്പെട്ട എയർ ഇന്ത്യയുടെ AI139 വിമാനം ആകാശമധ്യേ വച്ച് തിരികെ ഡൽഹിയിലേക്ക് തന്നെ മടങ്ങിയതായി അധികൃതർ അറിയിച്ചു.
സുരക്ഷ മുൻനിർത്തി ഇസ്രയേലിലേക്കുള്ള എല്ലാ സർവീസുകളും താൽക്കാലികമായി നിർത്തിവയ്ക്കാൻ എയർ ഇന്ത്യ തീരുമാനിച്ചിട്ടുണ്ട്. ഇൻഡിഗോ ഉൾപ്പെടെയുള്ള മറ്റ് ആഭ്യന്തര വിമാനക്കമ്പനികളും സാഹചര്യം സൂക്ഷ്മമായി നിരീക്ഷിച്ചു വരികയാണ്. മിഡിൽ ഈസ്റ്റിലേക്കുള്ള വിമാനങ്ങൾ വൈകാനും ടിക്കറ്റ് നിരക്ക് വർദ്ധിക്കാനും ഈ നീക്കം ഇടയാക്കും.അമേരിക്കൻ പ്രസിഡന്റ് ഡൊണാൾഡ് ട്രംപ് ഇറാനെതിരെയുള്ള ഈ സൈനിക നീക്കത്തെ ‘ബൃഹത്തായ പോരാട്ടം’ എന്നാണ് വിശേഷിപ്പിച്ചത്. ഇറാന്റെ സൈനിക ശേഷി പൂർണ്ണമായും തകർക്കാനാണ് തങ്ങൾ ലക്ഷ്യമിടുന്നതെന്ന് അദ്ദേഹം വ്യക്തമാക്കി.
ഇറാന്റെ ആഭ്യന്തര പ്രക്ഷോഭങ്ങളും സാമ്പത്തിക തകർച്ചയും മുതലെടുത്താണ് ഈ ആക്രമണം ആസൂത്രണം ചെയ്തിരിക്കുന്നത്. അതേസമയം ഇറാന്റെ റെവല്യൂഷണറി ഗാർഡ് (IRGC) ഇതിനോടകം തന്നെ ഇസ്രയേലിന് നേരെ മിസൈൽ ആക്രമണങ്ങൾ ആരംഭിച്ചതായും വാർത്തകളുണ്ട്. മേഖലയിലെ ഇസ്രയേലിന്റെയും അമേരിക്കയുടെയും സഖ്യരാജ്യങ്ങൾ അതീവ ജാഗ്രതയിലാണ്.ഇറാനിലെ വിവിധ നഗരങ്ങളിൽ സ്ഫോടന ശബ്ദങ്ങൾ കേട്ടതായും ടെഹ്റാനിലെ ഖമേനിയുടെ ഓഫീസിന് സമീപം ആക്രമണം നടന്നതായും റിപ്പോർട്ടുകളുണ്ട്. സുരക്ഷാ ഭീഷണി കണക്കിലെടുത്ത് ഇറാനിയൻ പരമാധികാരി ആയത്തുള്ള അലി ഖമേനിയെ രഹസ്യ കേന്ദ്രത്തിലേക്ക് മാറ്റിയതായി സൂചനയുണ്ട്.
ഇറാഖിലെയും സിറിയയിലെയും ഇറാന്റെ പോഷക സംഘടനകൾ തിരിച്ചടിക്ക് തയ്യാറെടുക്കുന്നതോടെ യുദ്ധം ഒരു വലിയ പ്രാദേശിക സംഘർഷമായി മാറാൻ സാധ്യതയുണ്ട്. നിലവിൽ മൊബൈൽ ഫോൺ, ഇന്റർനെറ്റ് സേവനങ്ങൾ ഇറാനിൽ ഭാഗികമായി തടസ്സപ്പെട്ടിരിക്കുകയാണ്. ഇത് വിവരങ്ങൾ പുറംലോകമറിയുന്നത് പ്രയാസകരമാക്കുന്നു.ലോകത്തെമ്പാടുമുള്ള മലയാളി പ്രവാസികളെ ഈ സാഹചര്യം വലിയ ആശങ്കയിലാക്കിയിട്ടുണ്ട്. ഗൾഫ് മേഖലയിലെ മറ്റ് വിമാനത്താവളങ്ങൾ നിലവിൽ പ്രവർത്തിക്കുന്നുണ്ടെങ്കിലും ഏത് നിമിഷവും മാറ്റങ്ങൾ ഉണ്ടാകാം.
വിദേശത്തുള്ള ഇന്ത്യക്കാർ അനാവശ്യ യാത്രകൾ ഒഴിവാക്കണമെന്നും വീടുകൾക്കുള്ളിൽ തന്നെ കഴിയണമെന്നും ഇന്ത്യൻ എംബസികൾ നിർദ്ദേശം നൽകി. എണ്ണവിലയിൽ വൻ വർദ്ധനവുണ്ടാകാനുള്ള സാധ്യതയും സാമ്പത്തിക വിദഗ്ധർ പ്രവചിക്കുന്നുണ്ട്. വരും ദിവസങ്ങളിൽ സംഘർഷം ലഘൂകരിക്കപ്പെട്ടില്ലെങ്കിൽ ആഗോള സമ്പദ്വ്യവസ്ഥയ്ക്കും ഗതാഗതത്തിനും ഇത് വലിയ തിരിച്ചടിയാകും.
A major military conflict has erupted in the Middle East as the United States and Israel launched a joint operation, “Shield of Judah,” targeting Iran’s nuclear and missile facilities on February 28, 2026. In response to the strikes, Iran, Israel, and Iraq have completely closed their airspaces, leading to a total suspension of regional air traffic. Flight tracking data shows a complete absence of civilian aircraft over Iran and Iraq, with many international flights, including those from Air India, being diverted or canceled. This escalation has sparked global concerns over rising oil prices and a potential regional war involving various proxy groups.