ജോർജിയ: അണ്ടർ 21 ലോകകപ്പ് ഫുട്ബോളിൽ ഇംഗ്ലണ്ടിന് കിരീടം. ഫൈനലിൽ സ്പെയ്നിനെ ഏകപക്ഷീയമായ ഒരു ഗോളിന് തോൽപ്പിച്ചാണ് ഇംഗ്ലണ്ട് കിരീടം സ്വന്തമാക്കിയത്. ആദ്യ പകുതിയിലെ ഇഞ്ചുറി ടൈമിൻ്റെ അവസാന മിനിറ്റിലാണ് ഇംഗ്ലണ്ടിൻ്റെ വിജയഗോൾ പിറന്നത്. കർട്ടിസ് ജോൺസായിരുന്നു ഇംഗ്ലണ്ടിനായി ഗോൾ നേടിയത്.
രണ്ടാം പകുതിയിലെ ഇഞ്ചുറി ടൈമിൻ്റെ അവസാന മിനിറ്റിൽ സ്പെയ്നിന് ലഭിച്ച പെനാൽറ്റി ഗോളാക്കാൻ കഴിയാതെ പോയതോടെയാണ് ഇംഗ്ലണ്ട് വിജയം ആഘോഷിച്ചത്. ഇംഗ്ലണ്ട് ഗോൾകീപ്പർ ജെയിംസ് ട്രാഫോർഡ് ഒരു മികച്ച സേവിലൂടെയാണ് സ്പെയ്നിൻ്റെ പെനാൽറ്റി തടഞ്ഞത്. ഇത് മൂന്നാം തവണയാണ് ഇംഗ്ലണ്ട് അണ്ടർ 21 ലോകകിരീടം സ്വന്തമാക്കുന്നത്.
ലോകകപ്പിൽ തോൽവി അറിയാതെ ആയിരുന്നു ഇംഗ്ലണ്ടിൻ്റെ മുന്നേറ്റം. കളിച്ച ആറ് മത്സരങ്ങളിലും ഇംഗ്ലണ്ട് ജയിച്ചു. ലോകകപ്പ് ചരിത്രത്തിൽ ഇതാദ്യമായി ഒരു ഗോൾ പോലും വഴങ്ങാതെയാണ് ഒരു ടീം ലോകകപ്പ് ജയിക്കുന്നത്. ഫൈനൽ ഇംഗ്ലണ്ട് ജയിച്ചെങ്കിലും 65 ശതമാനം സമയത്തും പന്ത് കൈവശം വെച്ചത് സ്പെയിൻ ആയിരുന്നു.
