കൊച്ചി: കേരളത്തിന്റെ തലസ്ഥാനം കൊച്ചിയിലേക്ക് മാറ്റണമെന്ന് ഹൈബി ഈഡൻ എംപിയുടെ ആവശ്യത്തിനെതിരെ യുഡിഎഫ് നേതാക്കൾ രംഗത്ത്. ഹൈബിയുടെ സ്വകാര്യ ബില്ലിനെതിരെ കോൺഗ്രസ് നേതാവും മുൻ എംഎൽഎയുമായ ശബരിനാഥൻ, ആർഎസ്പി നേതാവും എംപിയുമായ എൻകെ പ്രേമചന്ദ്രൻ, ആർഎസ്പി സംസ്ഥാന സെക്രട്ടറി ഷിബു ബേബി ജോൺ എന്നിവർ രംഗത്തെത്തി. ഒരു ചെറുപ്പക്കാരന്റെ തോന്നല് മാത്രമാണെന്നായിരുന്നു ഷിബു ബേബി ജോണിന്റെ പ്രതികരണം.
തലസ്ഥാനത്തെ സംബന്ധിക്കുന്ന ചർച്ച ഇപ്പോൾ അനാവശ്യമാണ്. തിരുവനന്തപുരം കേരളത്തിന്റെ തലസ്ഥാനമായതിനു പിന്നിൽ നിരവധി ഘടകങ്ങളുണ്ട്. ഗൗരവമുള്ള മറ്റു ഒട്ടേറെ വിഷയങ്ങളിൽ നിന്ന് ശ്രദ്ധ തിരിക്കാൻ മാത്രമേ ഈ ചർച്ച ഉപകരിക്കൂവെന്നാണ് കെഎസ് ശബരീനാഥന്റെ പ്രതികരണം. ഫേസ്ബുക്ക് പോസ്റ്റിലൂടെയാണ് പ്രതികരണം.
ഒരു ചെറുപ്പക്കാരന്റെ തോന്നല് മാത്രമാണെന്നാണ് ആർഎസ്പി സംസ്ഥാന സെക്രട്ടറി ഷിബു ബേബി ജോണിന്റെ പ്രതികരണം. ഇത്തരം കാര്യങ്ങൾ പാർട്ടിയിലും മുന്നണിയിലും ചർച്ച ചെയ്യുന്നതാണ് മര്യാദയെന്നും ഷിബു ബേബി ജോണ് പറഞ്ഞു. ഇത്തരം ചർച്ച തന്നെ ഗുണകരമല്ലെന്നാണ് എൻ കെ പ്രേമചന്ദ്രൻ എംപിയുടെ പ്രതികരണം.
ഹൈബിയുടെ നിർദേശത്തെ സർക്കാർ എതിർത്തെന്ന റിപ്പോർട്ടുകളും ഇതിനോടകം പുറത്ത് വന്നിട്ടുണ്ട്. നിർദേശം അപ്രായോഗികമാണെന്നാണ് മുഖ്യമന്ത്രിയുടെ നിലപാട്. സംസ്ഥാന രൂപീകരണം മുതൽ തിരുവനന്തപുരമാണ് തലസ്ഥാനം, ആവശ്യമായ എല്ലാ അടിസ്ഥാന സൗകര്യങ്ങളും ഇവിടെയുണ്ടെന്നാണ് സർക്കാർ പറയുന്നത്. ഒരു കാരണവുമില്ലാതെ തലസ്ഥാന നഗരം മാറ്റുമ്പോൾ സാമ്പത്തിക ബാധ്യത സംസ്ഥാന സർക്കാരിന് ഉണ്ടാക്കുമെന്നും സർക്കാർ വിലയിരുത്തുന്നു.