ദുബായ്: ആരോഗ്യരംഗത്തെ നഴ്സിങ് മേഖലയിൽ സ്വദേശികളായ പൗരന്മാരുടെ പങ്കാളിത്തം വർദ്ധിപ്പിക്കുന്നതിനായി വൻ പദ്ധതികളുമായി യുഎഇ. മികച്ച ആനുകൂല്യങ്ങൾ പ്രഖ്യാപിച്ചും പ്രൊഫഷൻ കൂടുതൽ ആകർഷകമാക്കിയും കൂടുതൽ സ്വദേശികളെ ഈ രംഗത്തേക്ക് എത്തിക്കാനാണ് യുഎഇ ആരോഗ്യ-പ്രതിരോധ മന്ത്രാലയം ലക്ഷ്യമിടുന്നത്. ഇതിന്റെ ഭാഗമായി വരും ദിവസങ്ങളിൽ വിദേശികളായ നഴ്സിങ്, മിഡ്വൈഫറി പ്രഫഷനലുകളുടെ എണ്ണത്തിൽ നിയന്ത്രണം കൊണ്ടുവരുന്നതിനെക്കുറിച്ചും രാജ്യം ആലോചിക്കുന്നുണ്ട്.
കഴിഞ്ഞ രണ്ട് വർഷത്തിനിടയിൽ 1,897 സ്വദേശികളാണ് നഴ്സിങ് ജോലി തിരഞ്ഞെടുത്തത്. എങ്കിലും നിലവിൽ രാജ്യത്തെ ആകെ നഴ്സുമാരിൽ വെറും 2.8 ശതമാനം മാത്രമാണ് യുഎഇ പൗരന്മാർ (സ്വദേശികൾ) ഉള്ളത്. മുൻപും ഈ മേഖലയിലേക്ക് ആളുകളെ ആകർഷിക്കാൻ വിവിധ പദ്ധതികൾ ആവിഷ്കരിച്ചിരുന്നെങ്കിലും ലക്ഷ്യമിട്ട രീതിയിൽ സ്വദേശിവൽക്കരണം പൂർണ്ണമാക്കാൻ സാധിച്ചിരുന്നില്ല. ഈ സാഹചര്യത്തിലാണ് കൂടുതൽ ശക്തമായ പ്രചാരണ പരിപാടികളിലേക്കും നയങ്ങളിലേക്കും മന്ത്രാലയം കടക്കുന്നത്.
നിലവിൽ 2,500 സ്വദേശി നഴ്സിങ് വിദ്യാർത്ഥികൾ രാജ്യത്തെ വിവിധ പ്രമുഖ സ്ഥാപനങ്ങളിൽ പഠനം നടത്തുന്നുണ്ട്. ഈ മേഖലയിലേക്ക് യുഎഇയിലെ ആൺകുട്ടികൾ കടന്നുവരുന്നത് വലിയ പ്രതീക്ഷയോടെയാണ് മന്ത്രാലയം കാണുന്നത്. തുടക്കത്തിൽ വെറും രണ്ട് ആൺകുട്ടികൾ മാത്രമുണ്ടായിരുന്ന നഴ്സിങ് ക്ലാസുകളിൽ ഇപ്പോൾ 300-ലധികം ആൺകുട്ടികൾ പഠിക്കുന്നുണ്ട്. വരും വർഷങ്ങളിൽ സംയോജിത സംരംഭങ്ങളിലൂടെ ഇവരുടെ എണ്ണം ഗണ്യമായി കൂട്ടാനാണ് മന്ത്രാലയത്തിന്റെ നീക്കം.
കൂടുതൽ സ്വദേശി യുവാക്കളെ ഈ രംഗത്തേക്ക് കൊണ്ടുവരുന്നതിനായി, യുഎഇ പൗരന്മാർക്ക് തൊഴിൽ പരിശീലനവും നിയമനവും നൽകുന്ന പ്രശസ്ത സർക്കാർ സംവിധാനമായ ‘നാഫിസു’മായി (Nafis) സഹകരിച്ചാണ് മന്ത്രാലയം പുതിയ പദ്ധതികൾ ആവിഷ്കരിക്കുക. നാഫിസ്, വിവിധ അക്കാദമിക്-ആരോഗ്യ സ്ഥാപനങ്ങൾ, എമിറേറ്റ്സ് നഴ്സിങ് അസോസിയേഷൻ എന്നിവയുമായി കൈകോർത്ത് ദേശീയ തലത്തിലാണ് ഈ പരിപാടികൾ നടപ്പാക്കുക.
ആരോഗ്യമേഖലയുടെ ഗുണനിലവാരം ഉയർത്തുന്നതിനായി പുതിയ ചില ദേശീയ മാനദണ്ഡങ്ങളും യുഎഇ നടപ്പിലാക്കും. ആശുപത്രികളിലെ കിടക്കകളുടെയും രോഗികളുടെയും കൃത്യമായ എണ്ണത്തിന് അനുസരിച്ച് നഴ്സിങ് സ്റ്റാഫിന്റെ അനുപാതം നിശ്ചയിക്കാനുള്ള ദേശീയ മാനദണ്ഡങ്ങൾ ഉടൻ നിലവിൽ വരും. ഇതിനൊപ്പം, രാജ്യാന്തര നിയമങ്ങൾ പൂർണ്ണമായി അനുസരിച്ച് നഴ്സിങ്, മിഡ്വൈഫറി വിഭാഗങ്ങളിലെ പ്രഫഷനലുകൾക്ക് ലൈസൻസ് നൽകുന്നതിനുള്ള ഏകീകൃത മാനദണ്ഡങ്ങളും മന്ത്രാലയത്തിന്റെ സജീവ പരിഗണനയിലാണ്.
The UAE Ministry of Health is rolling out major initiatives to boost Emiratisation in the nursing and midwifery sectors by offering better incentives and making the profession more attractive. Over the past two years, 1,897 citizens joined the profession, but UAE nationals currently comprise only 2.8% of the total nursing workforce. To change this, the ministry is partnering with ‘Nafis’ to train and recruit locals. Notably, male enrollment has jumped from just two students initially to over 300 now. Furthermore, the government is considering capping the number of foreign nursing professionals and introducing unified international licensing criteria and staff-to-patient ratio standards.