വാഷിങ്ടൺ: ഇറാനുമായുള്ള രണ്ടാം ഘട്ട ചർച്ചകൾക്കായി അമേരിക്കൻ പ്രതിനിധിസംഘം പാകിസ്താനിലെ ഇസ്ലാമാബാദിലേക്ക് തിരിക്കുന്നതിന് പിന്നാലെ, ഇറാനെതിരെ അതിരൂക്ഷമായ ഭീഷണിയുമായി യുഎസ് പ്രസിഡന്റ് ഡൊണാൾഡ് ട്രംപ്. അമേരിക്ക മുന്നോട്ടുവെക്കുന്ന കരാർ അംഗീകരിച്ചില്ലെങ്കിൽ ഇറാനിലെ സകല ഊർജ്ജ നിലയങ്ങളും പാലങ്ങളും തകർക്കുമെന്നാണ് ട്രംപിന്റെ മുന്നറിയിപ്പ്. തന്റെ സോഷ്യൽ മീഡിയ പ്ലാറ്റ്ഫോമായ ‘ട്രൂത്ത് സോഷ്യലിലൂടെയാണ്’ ട്രംപ് നിലപാട് വ്യക്തമാക്കിയത്. ഹോർമുസ് കടലിടുക്കിൽ ഇറാൻ വെടിയുതിർത്തത് നിലവിലെ വെടിനിർത്തൽ കരാറിന്റെ ലംഘനമാണെന്നും അദ്ദേഹം കുറ്റപ്പെടുത്തി.
ഹോർമുസ് കടലിടുക്കിൽ ഫ്രഞ്ച്, ബ്രിട്ടീഷ് കപ്പലുകളെ ലക്ഷ്യമിട്ട് ഇറാൻ നടത്തിയ വെടിവെപ്പ് ഒട്ടും ഗുണകരമല്ലെന്ന് ട്രംപ് പറഞ്ഞു. “ഇന്നലെ ഇറാൻ വെടിയുതിർക്കാൻ തീരുമാനിച്ചു, ഇത് വെടിനിർത്തൽ കരാറിന്റെ പൂർണ്ണമായ ലംഘനമാണ്. ഫ്രഞ്ച് കപ്പലിനെയും യുകെയിൽ നിന്നുള്ള ചരക്കു കപ്പലിനെയുമാണ് അവർ ലക്ഷ്യം വെച്ചത്. അത് ഒട്ടും ശരിയായില്ല” – ട്രംപ് കുറിച്ചു. യുഎസ് പ്രതിനിധികൾ നാളെ വൈകുന്നേരത്തോടെ ഇസ്ലാമാബാദിലെത്തി ചർച്ചകൾ തുടങ്ങുമെന്നും അദ്ദേഹം അറിയിച്ചു. എന്നാൽ ഈ ചർച്ചയിൽ ഇറാൻ പങ്കെടുക്കുമോ എന്ന കാര്യത്തിൽ ഇതുവരെ ഔദ്യോഗിക സ്ഥിരീകരണമുണ്ടായിട്ടില്ല.
ഹോർമുസ് കടലിടുക്ക് അടച്ചിടാനുള്ള ഇറാന്റെ തീരുമാനത്തെ ട്രംപ് പരിഹസിച്ചു. അമേരിക്കൻ ഉപരോധം കാരണം ഈ പാത നേരത്തെ തന്നെ അടഞ്ഞുകിടക്കുകയാണെന്നും, പുതിയ പ്രഖ്യാപനത്തിലൂടെ ഇറാൻ അമേരിക്കയെ സഹായിക്കുകയാണെന്നും അദ്ദേഹം പറഞ്ഞു. പാത അടഞ്ഞുകിടക്കുന്നത് വഴി ഇറാനു പ്രതിദിനം 500 മില്യൺ ഡോളറിന്റെ നഷ്ടമുണ്ടാകുന്നുണ്ട്, എന്നാൽ അമേരിക്കയ്ക്ക് ഇതിൽ യാതൊരു നഷ്ടവുമില്ലെന്നും അദ്ദേഹം അവകാശപ്പെട്ടു. പല കപ്പലുകളും അമേരിക്കയിലേക്ക് എണ്ണ നിറയ്ക്കാനായി പോകുകയാണെന്നും അദ്ദേഹം കൂട്ടിച്ചേർത്തു.
ഇറാൻ ഒരു ‘കൊലയാളി യന്ത്രം’ (Killing Machine) ആണെന്നും അതിനെ നശിപ്പിക്കേണ്ട സമയമായെന്നും ട്രംപ് ആക്രോശിച്ചു. “ഞങ്ങൾ ന്യായമായ ഒരു ഡീൽ വാഗ്ദാനം ചെയ്യുന്നു. അവർ അത് സ്വീകരിക്കുമെന്ന് പ്രതീക്ഷിക്കുന്നു. ഇല്ലെങ്കിൽ അമേരിക്ക ഇറാന്റെ എല്ലാ പവർ പ്ലാന്റുകളും പാലങ്ങളും തകർത്തു കളയും. ഇനി ‘മിസ്റ്റർ നൈസ് ഗൈ’ കളിയില്ല. കഴിഞ്ഞ 47 വർഷമായി മറ്റ് പ്രസിഡന്റുമാർ ചെയ്യാൻ മടിച്ച കാര്യം ചെയ്യാൻ അവസരം ലഭിക്കുന്നത് എന്റെ ബഹുമതിയായി ഞാൻ കാണുന്നു” – ട്രംപ് വ്യക്തമാക്കി.
ഇറാന്റെ സാമ്പത്തിക നിലയെ തകർക്കുന്നതിനൊപ്പം സൈനികമായി അവരെ പൂർണ്ണമായും നിഷ്ക്രിയമാക്കുക എന്നതാണ് ട്രംപിന്റെ ലക്ഷ്യം. ഇസ്ലാമാബാദിലെ ചർച്ചകൾ പരാജയപ്പെട്ടാൽ പശ്ചിമേഷ്യയിൽ ഒരു വൻ യുദ്ധത്തിന് അമേരിക്ക തുടക്കമിടുമെന്ന സൂചനയാണ് ട്രംപിന്റെ വാക്കുകൾ നൽകുന്നത്. ആണവ അവശിഷ്ടങ്ങൾ (Nuclear Dust) പിടിച്ചെടുക്കുമെന്ന മുൻ പ്രഖ്യാപനത്തിന് പിന്നാലെ വന്ന ഈ പുതിയ ഭീഷണി ആഗോളതലത്തിൽ വലിയ ആശങ്കകൾക്ക് കാരണമായിട്ടുണ്ട്. നയതന്ത്ര നീക്കങ്ങളേക്കാൾ കൂടുതൽ സൈനിക നീക്കങ്ങൾക്കാണ് ട്രംപ് മുൻഗണന നൽകുന്നതെന്ന് രാഷ്ട്രീയ നിരീക്ഷകർ വിലയിരുത്തുന്നു.
US President Donald Trump has issued a severe warning to Iran as US representatives head to Islamabad for the second round of talks. Trump threatened to destroy all of Iran’s power plants and bridges if they reject the proposed deal, labeling the recent firing in the Strait of Hormuz a total violation of the ceasefire. Terming Iran a “killing machine,” Trump stated that the time has come to finish what past presidents failed to do over the last 47 years