കോഴിക്കോട്∙ അതിതീവ്ര മഴയുടെ പശ്ചാത്തലത്തിൽ അഞ്ച് ജില്ലകളിലെ വിദ്യാഭ്യാസ സ്ഥാപനങ്ങൾക്കു അതതു ജില്ലകളിലെ കലക്ടർമാർ അവധി പ്രഖ്യാപിച്ചു. വെള്ളിയാഴ്ച വരെ സംസ്ഥാനത്ത് അതിതീവ്ര മഴയ്ക്കു സാധ്യതയെന്നു കേന്ദ്ര കാലാവസ്ഥ വകുപ്പ് പ്രവചിച്ചിരുന്നു. ആലപ്പുഴ, കോട്ടയം, ഇടുക്കി, എറണാകുളം, തൃശൂർ, പാലക്കാട്, മലപ്പുറം, കോഴിക്കോട്, വയനാട്, കണ്ണൂർ ജില്ലകളിൽ ഇന്നു റെഡ് അലർട്ടാണ്.
കോഴിക്കോട് ജില്ലയിൽ അതിതീവ്ര മഴയുടെ പശ്ചാത്തലത്തിൽ പ്രഫഷനൽ കോളജ് ഉൾപ്പെടയുള്ള ജില്ലയിലെ എല്ലാ വിദ്യാഭ്യാസ സ്ഥാപനങ്ങൾക്കും ബുധനാഴ്ച അവധി.
തൃശൂർ ജില്ലയില് റെഡ് അലര്ട്ട് നിലനില്ക്കുന്നതിനാലും ശക്തമായ മഴ തുടരുന്നതിനാലും അങ്കണവാടികള് അടക്കം നഴ്സറി തലം മുതല് പ്രഫഷനല് കോളജുകള് ഉള്പ്പെടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും ബുധനാഴ്ച അവധിയായിരിക്കുമെന്ന് ജില്ലാ കലക്ടർ അറിയിച്ചു. പരീക്ഷകള് നേരത്തേ നിശ്ചയിച്ചതു പ്രകാരം നടക്കും.
ആലപ്പുഴ ജില്ലയിൽ പ്രഫഷനൽ കോളജുകളും അങ്കണവാടികളും ഉൾപ്പെടെ എല്ലാ വിദ്യാഭ്യാസ സ്ഥാപനങ്ങൾക്കും ബുധനാഴ്ച അവധി പ്രഖ്യാപിച്ചു.
എറണാകുളം ജില്ലയിൽ റെഡ് അലർട്ട് നിലനിൽക്കുന്ന സാഹചര്യത്തിൽ ജില്ലയിലെ പ്രഫഷണൽ കോളജുകൾ ഉൾപ്പെടെയുള്ള വിദ്യാഭ്യാസ സ്ഥാപനങ്ങൾക്ക് ബുധനാഴ്ച്ച അവധി ആയിരിക്കുമെന്ന് കലക്ടർ രേണുരാജ് അറിയിച്ചു.
കോട്ടയം ജില്ലയിൽ അതിതീവ്രമഴയ്ക്കുള്ള സാധ്യതയെത്തുടർന്ന് റെഡ് അലേർട്ട് പ്രഖ്യാപിച്ച സാഹചര്യത്തിൽ ജില്ലയിലെ പ്രഫഷനൽ കോളജുകൾ, അങ്കണവാടികൾ ഉൾപ്പെടെയുള്ള മുഴുവൻ വിദ്യാഭ്യാസ സ്ഥാപനങ്ങൾക്കും ബുധനാഴ്ച അവധി പ്രഖ്യാപിച്ച് ജില്ലാ കലക്ടർ പി.കെ. ജയശ്രീ ഉത്തരവായി.
മഹാത്മാഗാന്ധി സർവ്വകലാശാല നാളെ (03.08.2022) നടത്തുവാൻ നിശ്ചയിച്ചിരിക്കുന്ന എല്ലാ പരീക്ഷകളും മാറ്റി വച്ചതായി പരീക്ഷാ കൺട്രോളർ അറിയിച്ചു. പുതിയ തീയതി പിന്നീട്.
തൃശ്ശൂരില് കഴിഞ്ഞ 24 മണിക്കൂറില് 153.6മില്ലി മീറ്റര് മഴയാണ് പെയ്തത്.ജലനിരപ്പ് ഉയരുന്ന സാഹചര്യത്തില് മണലി, കുറുമാലി, കരുവന്നൂര് പുഴകളുടെ തീരങ്ങളില് താമസിക്കുന്ന ജനങ്ങളെ മാറ്റിപാര്പ്പിക്കാനുള്ള നടപടികള് തുടങ്ങി. രാത്രിയാവുന്നതിന് മുമ്പ് ജനങ്ങളെ ക്യാംപുകളിലേക്ക് മാറ്റാനാണ് നിര്ദ്ദേശം നല്കിയിരിക്കുന്നത്. ചാലക്കുടിയിലേക്ക് രക്ഷാപ്രവര്ത്തനങ്ങള്ക്കായി മത്സ്യത്തൊഴിലാളികളുടെ മൂന്ന് ബോട്ടുകളില് 12 പേരടങ്ങുന്ന സംഘത്തോട് പുറപ്പെടാന് ഫിഷറീസ് വകുപ്പിന്റെ നിര്ദേശം നല്കി. ഒരു ബോട്ടില് നാല് പേര് വീതമാണ് പോകുന്നത്. ആലപ്പുഴയിലെ കനത്ത മഴയുടെ പശ്ചാത്തലത്തില് ജില്ലയിലെ കളക്ടറേറ്റിലും താലൂക്ക് തലത്തിലും കണ്ട്രോള് റൂമുകള് തുറന്നു.
മഴ ശക്തമായതിനാല് അണകെട്ടുകളിലെയും നദികളിലെയും ജലനിരപ്പ് ഉയരുന്നതിനാല് എല്ലാവരും ജാഗ്രത പാലിക്കണമെന്ന് മുഖ്യമന്ത്രി പിണറായി വിജയന് അറിയിച്ചു. കേന്ദ്ര ജല കമ്മീഷന് ഇന്നു രാവിലെ എട്ട് മണിക്ക് നല്കിയ മുന്നറിയിപ്പു പ്രകാരം നെയ്യാര്, കരമന, പമ്പ, മണിമല എന്നീ നദികളില് ജലത്തിന്റെ സുരക്ഷിത അളവ് പരിധി കവിഞ്ഞിരിക്കുകയാണ്. അച്ചന്കോവില്, കാളിയാര്, തൊടുപുഴ, മീനച്ചില് എന്നീ നദികളില് മുന്നറിയിപ്പ് പരിധിയും കടന്നിട്ടുണ്ട്. ഈ സാഹചര്യത്തില് എല്ലാവരും ജാഗ്രത പാലിക്കണമെന്ന് മുഖ്യമന്ത്രി പറഞ്ഞു.