TRAIN 🛤️ഫോണ്‍ വിളിച്ച് ട്രാക്കിലൂടെ നടന്നു,അര്‍ദ്ധരാത്രിയില്‍ ട്രെയിന്‍ തട്ടി ചോരവാര്‍ന്ന് ട്രാക്കിനുസമീപം,തലച്ചുമടായി ആശുപത്രിയിലെത്തിച്ച യുവാക്കള്‍ക്ക് കയ്യടി,ജീവിതത്തിലേക്ക് മടങ്ങിയെത്തിയത് അതിരമ്പുഴ സ്വദേശി

കോട്ടയം: റെയില്‍വേട്രാക്കിലൂടെ ഫോണ്‍ വിളിച്ചു നടക്കുന്നതിനിടെ ട്രെയിന്‍ തട്ടി പരുക്കേറ്റ യുവാവിന് രക്ഷകരായി യുവാക്കള്‍.അയല്‍വാസിയായ സുഹൃത്തുക്കളുടെ വിളികേട്ട് ഓടിയെത്തിയ യുവാക്കളും സുഹൃത്തുക്കളും ചേര്‍ന്ന് അരകിലോമീറ്ററോളം ചുമന്നാണ് വാഹനം ലഭിയ്ക്കുന്ന സ്ഥലത്തെത്തിച്ചത്.കോട്ടയം മെഡിക്കല്‍ കോളേജ് ആശുപത്രിയിലെത്തിച്ച യുവാവിന്റെ ആരോഗ്യനില തൃപ്തികരണമാണ്.

സംഭവമിങ്ങനെ

അതിരമ്പുഴ മുണ്ടകപ്പാടം സ്വദേശിയായ അഖില്‍ പി.എസ് (25)ഫോണ്‍ വിളിച്ച് വീടിനടുത്തുള്ള റെയില്‍വേട്രാക്കിലൂടെ നടന്നു നീങ്ങുകയായിരുന്നു.ഇതിനിടയിലാണ് ട്രാക്കിലൂടെ കടന്നുപോയ ട്രെയിന്‍ അഖിലിനെ തട്ടിയത്.തലയ്ക്ക് പരുക്കേറ്റ് ചോരവാര്‍ന്ന് അഖില്‍ ട്രാക്കിനടുത്ത് കിടന്നു.രാത്രി പത്തരയോടെയായിരുന്നു സംഭവം

അഖില്‍ ഫോണ്‍ വിളിച്ച് ട്രാക്കിനടുത്തേക്ക് പോകുന്നത് കണ്ടെങ്കിലും തിരിച്ചുവരുന്നത് 12 മണിയായിട്ടും കാണാഞ്ഞതിനേത്തുടര്‍ന്ന് അഖിലിന്റെ സുഹൃത്തുക്കളായ നിധിന്‍ രാജുവും ബിബിന്‍ ബാബുവും തെരഞ്ഞുപോയി.തുടര്‍ന്നാണ് ട്രാക്കില്‍ ചോരയൊലിച്ചുകിടക്കുന്ന അഖിലിനെ കണ്ടത്.

ചോരയൊലിപ്പിച്ച് ബോധരഹിതനായി കിടക്കുന്ന അഖിലിനെ കണ്ടപ്പോള്‍ ആദ്യമൊന്ന് ഭയന്നു.ഇവര്‍ വിളിച്ചതിനേത്തുടര്‍ന്ന് ഉടന്‍ സ്ഥലത്തെത്തിയ ഹരീഷ് മനോജ്,ഷിജന്‍ മാത്യു,ബിബിന്‍ പി.ഡി.ടിജു എന്നിവര്‍ ചേര്‍ന്ന് അഖിലിനെ തലച്ചുമടായി അരക്കിലോമീറ്ററോളം ചുമന്ന് ട്രാക്കിനു പുറത്തെത്തിച്ചു.അടുത്തുള്ള വീട്ടിലെ കാറില്‍ ആശുപത്രിയിലേക്കും.

കോട്ടയം മെഡിക്കല്‍ കോളേജിലെത്തിച്ച് അഖിലിന് അടിയന്തിര ചികിത്സ നല്‍കി.തലയിലുണ്ടായ പരുക്കില്‍ ഏറെ രക്തം വാര്‍ന്നുപോയി എങ്കിലും ഈ സമയത്തെങ്കിലും എത്തിയ്ക്കാന്‍ കഴിഞ്ഞതിനാല്‍ ജീവന്‍ രക്ഷിയ്ക്കാനായി.ഫോണ്‍ വിളിയ്ക്കാന്‍ പോയി കാണാതായ അഖിലിനെ തിരഞ്ഞുപോയ സുഹൃത്തുക്കളും അടിയന്തിര ഘട്ടത്തില്‍ സഹായഹസ്തവുമായെത്തിയ യുവാക്കളുമാണ് ഒരു വിലപ്പെട്ട ജീവന്‍ രക്ഷിച്ചത്.