തിരുവനന്തപുരം: വീട്ടില്‍ അതിക്രമിച്ച് കയറി യുവതിയെ ആക്രമിച്ച് സ്വര്‍ണവും പണവും കവര്‍ന്ന കേസില്‍ മൂന്നു പേര്‍ അറസ്റ്റില്‍. മലയിന്‍കീഴ് സ്വദേശികളായ ഹേമന്ദ് (27), വിന്ധ്യന്‍ (34), കരമന നെടുങ്കാട് സ്വദേശി വിനോദ് (38) എന്നിവരാണ് അറസ്റ്റിലായത്. തിരുവനന്തപുരം മരുതൂര്‍ക്കടവില്‍ താമസിക്കുന്ന യുവതിയെയാണ് സംഘം വീട്ടില്‍ അതിക്രമിച്ച് കയറി ആക്രമിക്കുകയും വീട്ടുപകരണങ്ങള്‍ തല്ലി തകര്‍ക്കുകയും സ്വര്‍ണവും പണവും കവരുകയും ചെയ്തത്.
കഴിഞ്ഞ 21നായിരുന്നു കേസിനാസ്പദമായ സംഭവം. അതിക്രമത്തിന് ഇരയായ യുവതിയുടെ സുഹൃത്തിന്റെ ഭര്‍ത്താവാണ് പിടിയിലായ ഹേമന്ദ്. ഇയാള്‍ നിരവധി കേസുകളിലെ പ്രതിയാണെന്ന വിവരം ഭാര്യവീട്ടുകാരെ അറിയിച്ചുവെന്ന് ആരോപിച്ചായിരുന്നു അക്രമം നടത്തിയത്. ആക്രമണ വിവരം പുറത്ത് പറയാതിരിക്കാനായി യുവതിക്കെതിരെ ലൈംഗിക അതിക്രമം നടത്തി അത് മൊബൈലില്‍ ചിത്രീകരിച്ചതായും പോലീസ് പറഞ്ഞു.
ഫോര്‍ട്ട് പോലീസും കന്റോണ്‍മെന്റ് പോലീസും സംയുക്തമായി നടത്തിയ അന്വേഷണത്തിലാണ് മൂന്നംഗ സംഘം പിടിയിലായത്. ഫോര്‍ട്ട് അസി. കമ്മീഷണര്‍ പ്രതാപന്‍ നായരുടെ നേതൃത്വത്തിലുള്ള പ്രത്യേക സംഘമാണ് കേസ് അന്വേഷിച്ചത്.
