തിരുവനന്തപുരം: കോർപ്പറേഷനിൽ ബി.ജെ.പി. കൗൺസിലർ ആർ. സുഗതന്റെ രാജി ആവശ്യപ്പെട്ട് എൽ.ഡി.എഫ്. നടത്തിയ പ്രതിഷേധം വലിയ സംഘർഷത്തിൽ കലാശിച്ചു. പ്രതിഷേധത്തിനിടയിൽ മേയർ വി.വി. രാജേഷിനെ സി.പി.എം. കൗൺസിലർമാർ തടഞ്ഞുവെക്കാൻ ശ്രമിച്ചെങ്കിലും, കനത്ത പ്രതിഷേധങ്ങൾക്കിടയിലൂടെയും അദ്ദേഹം തന്റെ ഓഫീസിലേക്ക് പ്രവേശിച്ചു. സി.പി.എം., ബി.ജെ.പി. പ്രവർത്തകർ തമ്മിൽ കോർപ്പറേഷൻ പരിസരത്ത് ഉന്തും തള്ളും ഉണ്ടായതോടെ സ്ഥിതിഗതികൾ ശാന്തമാക്കാൻ പോലീസ് ഇടപെടുകയായിരുന്നു. സംഘർഷത്തിൽ കൗൺസിലർമാർക്കും ഒരു വനിതാ പോലീസ് ഉദ്യോഗസ്ഥയ്ക്കും പരിക്കേറ്റതായാണ് വിവരങ്ങൾ.
കോർപ്പറേഷനിൽ ജനാധിപത്യപരമായ സമരമാണ് തങ്ങളുടെ ഭാഗത്തുനിന്നുണ്ടായതെന്ന് സി.പി.എം. പാർലമെന്ററി പാർട്ടി ലീഡർ എസ്.പി. ദീപക് പ്രതികരിച്ചു. എന്നാൽ ബലം പ്രയോഗിച്ചുള്ള ഇത്തരം സമര മുറകൾ ഒട്ടും അംഗീകരിക്കാൻ കഴിയില്ലെന്ന് മേയർ വി.വി. രാജേഷ് വ്യക്തമാക്കി. സി.പി.എം. കൗൺസിലർമാരുടെ ഭാഗത്തുനിന്ന് അനാവശ്യമായ പ്രകോപനമാണുണ്ടായതെന്നും, രാവിലെ മുതൽ മേയറെ കാണാൻ എത്തിയ പൊതുജനങ്ങളെ അവർ തടഞ്ഞതായും ബി.ജെ.പി. ആരോപിച്ചു. സമരക്കാർ ബി.ജെ.പി.യുടെ വനിതാ കൗൺസിലർമാരെ ആക്രമിച്ചതായും, സംഘർഷത്തിൽ തന്റെ കാലിന് പരിക്കേറ്റതായും മേയർ വി.വി. രാജേഷ് കൂട്ടിച്ചേർത്തു.
English Summary
An LDF protest demanding the resignation of BJP councillor R. Sugathan escalated into violence at the Thiruvananthapuram Corporation, where CPM councillors blocked Mayor V.V. Rajesh. Despite the unrest and subsequent scuffles between CPM and BJP workers, the Mayor managed to enter his office, though several councillors and a woman police officer sustained injuries.