കൊൽക്കത്ത: 580 വർഷത്തിനിടയിലെ ഏറ്റവും ദൈർഘ്യമേറിയ ഭാഗിക ചന്ദ്രഗ്രഹണം നവംബർ 19ന് ദൃശ്യമാകും. വടക്കുകിഴക്കൻ സംസ്ഥാനങ്ങളായ അരുണാചൽ പ്രദേശിലേയും അസമിലേയും ചില മേഖലകളിൽ ഈ അപൂർവ ചന്ദ്രഗ്രഹണം കാണാനാകുമെന്ന് എംപി ബിർള പ്ലാനിറ്റോറിയം റിസർച്ച് ആൻഡ് അക്കാദമിക് ഡയറക്ടർ ദേബിപ്രൊസാദ് ദുരൈ പറഞ്ഞു.
നവംബർ 19ന് ഉച്ചയ്ക്ക് 12.48ന് ആരംഭിക്കുന്ന ചന്ദ്രഗ്രഹണം വൈകീട്ട് 4.17ന് അവസാനിക്കും. മൂന്ന് മണിക്കൂർ 28 മിനിറ്റ് 24 സെക്കൻഡ് നീളുന്ന ഈ അപൂർവ്വ പ്രതിഭാസം കഴിഞ്ഞ 580 വർഷത്തിനിടയിലെ ഏറ്റവും ദൈർഘ്യമേറിയ ഭാഗിക ചന്ദ്രഗ്രഹണമാണെന്നും ദേബിപ്രൊസാദ് ദുരൈ വ്യക്തമാക്കി.ഭാഗിക ചന്ദ്രഗ്രഹണ വേളയിൽ രക്തത്തിന്റെ നിറത്തിലാണ് ചന്ദ്രൻ കാണപ്പെടുക. ഉച്ചയ്ക്ക് 2.34നാണ് പരമാവധി ഭാഗിക ചന്ദ്രഗ്രഹണം ഭൂമിയിൽ നിന്ന് കാണാനാവുക. ഈ സമയം ഭൂമിയുടെ നിഴൽ 97 ശതമാനവും ചന്ദ്രനെ മറയ്ക്കും.
ഇത്രയും ദൈർഘ്യമേറിയ ഭാഗിക ചന്ദ്രഗ്രഹണം ഏറ്റവും ഒടുവിൽ നടന്നത് 1440 ഫെബ്രുവരി 18നാണ്. നവംബർ 19ന് ശേഷം ഇനി ഈ അപൂർവ്വ പ്രതിഭാസം 2669 ഫെബ്രുവരി എട്ടിനാണ് ദൃശ്യമാകുകയെന്നും ദുരൈ പറഞ്ഞു.ഇന്ത്യയിലെ വടക്കുകിഴക്കൻ സംസ്ഥാനങ്ങൾക്ക് പുറമേ നോർത്ത് അമേരിക്ക, സൗത്ത് അമേരിക്ക, കിഴക്കൻ ഏഷ്യൻ, ഓസ്ട്രേലിയ, പസഫിക് മേഖലകളിൽ ഭാഗിക ചന്ദ്രഗ്രഹണം നന്നായി കാണാനാകും.