തിരുവനന്തപുരം: സംസ്ഥാനത്ത് 2026 മാർച്ചിൽ നടക്കാനിരിക്കുന്ന എസ്എസ്എൽസി, ഹയർ സെക്കൻഡറി, വൊക്കേഷണൽ ഹയർ സെക്കൻഡറി പരീക്ഷകൾക്കായുള്ള എല്ലാ തയ്യാറെടുപ്പുകളും പൂർത്തിയായതായി പൊതുവിദ്യാഭ്യാസ വകുപ്പ് അറിയിച്ചു. പശ്ചിമേഷ്യയിലെ യുദ്ധസാഹചര്യം കണക്കിലെടുത്ത് ഗൾഫിലെ എസ്എസ്എൽസി പ്ലസ്ടു പരീക്ഷകൾ മാറ്റിവെച്ചിട്ടുണ്ട്.
എസ്.എസ്.എൽ.സി പരീക്ഷ 2026
ഈ വർഷം എസ്എസ്എൽസി പരീക്ഷയ്ക്കായി ആകെ 4,18,516 വിദ്യാർഥികളാണ് രജിസ്റ്റർ ചെയ്തിരിക്കുന്നത്.
- പരീക്ഷാ കേന്ദ്രങ്ങൾ: കേരളത്തിൽ- 3031, ഗൾഫ് മേഖലയിൽ- 7, ലക്ഷദ്വീപിൽ- 9 എന്നിങ്ങനെയാണ് കേന്ദ്രങ്ങൾ.
- ക്രമീകരണങ്ങൾ: ചോദ്യപേപ്പറുകൾ ഇതിനകം ജില്ലാ വിദ്യാഭ്യാസ ഓഫീസുകളിൽ എത്തിച്ചു സുരക്ഷിതമായി ട്രഷറി/ബാങ്ക് ലോക്കറുകളിലേക്ക് മാറ്റി. 26,000 അധ്യാപകർ ഇൻവിജിലേഷൻ ഡ്യൂട്ടിയിലുണ്ടാകും.
- മൂല്യനിർണ്ണയം: ഏപ്രിൽ 7 മുതൽ 28 വരെ 72 ക്യാമ്പുകളിലായി നടക്കും.
- ഫലം: മെയ് മൂന്നാം വാരത്തിനുള്ളിൽ ഫലപ്രഖ്യാപനം ഉണ്ടാകും.
പ്ലസ് വൺ, പ്ലസ് ടു പരീക്ഷകൾ
ഹയർ സെക്കൻഡറി ഒന്നാം വർഷ പരീക്ഷകൾ മാർച്ച് 5-നും രണ്ടാം വർഷ പരീക്ഷകൾ മാർച്ച് 6-നും ആരംഭിക്കും.
- വിദ്യാർത്ഥികൾ: 4,52,437 പേർ രണ്ടാം വർഷ പരീക്ഷയും, 4,11,025 പേർ ഒന്നാം വർഷ പരീക്ഷയും എഴുതുന്നു. 3,41,222 വിദ്യാർഥികൾ ഇംപ്രൂവ്മെന്റ് പരീക്ഷയ്ക്കായി രജിസ്റ്റർ ചെയ്തിട്ടുണ്ട്.
- പരീക്ഷാ കേന്ദ്രങ്ങൾ: കേരളം, ഗൾഫ്, ലക്ഷദ്വീപ്, മാഹി എന്നിവിടങ്ങളിലായി ആകെ 1984 കേന്ദ്രങ്ങൾ.
- മൂല്യനിർണ്ണയം: ഏപ്രിൽ 6 മുതൽ 89 ക്യാമ്പുകളിലായി നടക്കും.
- ഫലം: മെയ് 22-ഓടെ ഫലം പ്രഖ്യാപിക്കാനാണ് ലക്ഷ്യമിടുന്നത്.
വൊക്കേഷണൽ ഹയർ സെക്കൻഡറി (VHSE)
ഒന്നാം വർഷത്തിൽ 26,829 വിദ്യാർഥികളും രണ്ടാം വർഷത്തിൽ 26,826 വിദ്യാർഥികളുമാണ് പരീക്ഷ എഴുതുന്നത്. 389 കേന്ദ്രങ്ങളിലായി നടക്കുന്ന പരീക്ഷയുടെ മൂല്യനിർണ്ണയം ഏപ്രിൽ 6-ന് 8 ക്യാമ്പുകളിലായി ആരംഭിക്കും.
പ്ലസ് വൺ പ്രവേശന നടപടികൾ
എസ്എസ്എൽസി ഫലം വന്നതിന്റെ തൊട്ടടുത്ത ദിവസം തന്നെ പ്ലസ് വൺ ഓൺലൈൻ അപേക്ഷകൾ സ്വീകരിച്ചു തുടങ്ങും.
- മൂന്ന് പ്രധാന അലോട്ട്മെന്റുകളിലൂടെ ഭൂരിഭാഗം പ്രവേശനവും പൂർത്തിയാക്കും.
- യോഗ്യത നേടിയ എല്ലാ വിദ്യാർത്ഥികൾക്കും ഉപരിപഠനത്തിന് ആവശ്യമായ സീറ്റുകൾ ഉറപ്പാക്കും.
- മുഖ്യഘട്ടത്തിന് ശേഷം ഒഴിവുള്ള സീറ്റുകളിലേക്ക് സപ്ലിമെന്ററി അലോട്ട്മെന്റുകൾ നടത്തും.
ഗൾഫ് മേഖലയിലെ പരീക്ഷകൾ
പശ്ചിമേഷ്യയിലെ യുദ്ധസാഹചര്യം പരിഗണിച്ച് ഗൾഫ് മേഖലയിലെ മാർച്ച് 5,6, 7 തീയതികളിലെ പരീക്ഷകൾ മാറ്റിവെച്ചു. പുതുക്കിയ തീയതി പിന്നീട് അറിയിക്കും. യുദ്ധം കാരണം പരീക്ഷ എഴുതാൻ കഴിയാത്ത വിദ്യാർഥികൾക്ക് അനുകൂലമായ നിലപാട് സ്വീകരിക്കുമെന്നും ഹെഡ്മാസ്റ്റർ/പ്രിൻസിപ്പൽ വഴി അപേക്ഷ നൽകണമെന്നും വിദ്യാഭ്യാസ വകുപ്പ് അറിയിച്ചു.