ന്യൂഡൽഹി: രാജ്യത്ത് ഏറ്റവും ഉയർന്ന സൈബർ കുറ്റകൃത്യ നിരക്കുള്ള സംസ്ഥാനമായി തെലങ്കാന മാറിയെന്ന് ദേശീയ ക്രൈം റെക്കോർഡ്സ് ബ്യൂറോയുടെ (എൻ.സി.ആർ.ബി) ഏറ്റവും പുതിയ കണക്കുകൾ. രാജ്യത്തെ സൈബർ തട്ടിപ്പുകൾ പ്രധാനമായും ദക്ഷിണേന്ത്യൻ സംസ്ഥാനങ്ങളിൽ കേന്ദ്രീകരിക്കുന്നതായും റിപ്പോർട്ട് സൂചിപ്പിക്കുന്നു. തെലങ്കാനയ്ക്ക് പുറമെ കർണാടകയും കേന്ദ്രഭരണ പ്രദേശങ്ങളിൽ പുതുച്ചേരിയും സൈബർ കുറ്റകൃത്യങ്ങളുടെ പട്ടികയിൽ മുൻനിരയിലാണ്.
എൻ.സി.ആർ.ബിയുടെ 2022-ലെ മധ്യവർഷ കണക്കുകൾ പ്രകാരം, തെലങ്കാനയിലെ സൈബർ കുറ്റകൃത്യ നിരക്ക് 40.3 ശതമാനമാണ്. ഇത് രാജ്യത്തിന്റെ ശരാശരി നിരക്കായ 4.8 ശതമാനത്തിന്റെ പത്തിരട്ടിയാണ്. മറ്റു പ്രധാന സംസ്ഥാനങ്ങളിലെ കുറ്റകൃത്യ നിരക്കുകളും റിപ്പോർട്ടിൽ വ്യക്തമാക്കുന്നു. മഹാരാഷ്ട്രയിൽ 6.6 ശതമാനമാണ് നിരക്ക്. 1257 ലക്ഷം ജനസംഖ്യയുള്ള സംസ്ഥാനത്ത് 2022-ൽ 8,249 സാമ്പത്തിക തട്ടിപ്പ് കേസുകളാണ് റിപ്പോർട്ട് ചെയ്തത്. ആന്ധ്രാപ്രദേശിൽ 4.4 ശതമാനവും, അസമിൽ 4.9 ശതമാനവും, ഉത്തർപ്രദേശ്, ഒഡീഷ എന്നിവിടങ്ങളിൽ 4.3 ശതമാനം വീതവും, ഉത്തരാഖണ്ഡിൽ 4.8 ശതമാനവുമാണ് നിരക്ക്.
കേന്ദ്രഭരണ പ്രദേശങ്ങളിൽ ഡൽഹി 3.2 ശതമാനം നിരക്കുമായി സൈബർ തട്ടിപ്പുകളുടെ പ്രധാന കേന്ദ്രമായി മാറിയിട്ടുണ്ട്. പുതുച്ചേരിയിലെ നിരക്ക് 3.9 ശതമാനമാണ്. ഡൽഹി പോലീസിന്റെ ഔദ്യോഗിക കണക്കുകൾ പ്രകാരം തലസ്ഥാന നഗരിയിൽ സൈബർ തട്ടിപ്പുകളിലൂടെ വൻ സാമ്പത്തിക നഷ്ടമാണ് ഉണ്ടാകുന്നത്. 2024-ൽ 1,591 സൈബർ തട്ടിപ്പുകളിലായി 817 കോടി രൂപയും, 2023-ൽ 1,347 കേസുകളിലായി 183 കോടി രൂപയും ഡൽഹി നിവാസികൾക്ക് നഷ്ടമായി. 2022-ൽ 1,545 കേസുകളിൽ 231 കോടിയും, 2021-ൽ 1,630 കേസുകളിൽ 91 കോടി രൂപയും നഷ്ടപ്പെട്ടു. 2017-ൽ 454 കേസുകൾ റിപ്പോർട്ട് ചെയ്ത സ്ഥാനത്ത് 2024 ആയപ്പോഴേക്കും കേസുകളുടെ എണ്ണത്തിൽ ഏകദേശം മൂന്നിരട്ടി വർധനവുണ്ടായി.