കട്ടപ്പന: പാലാ ബിഷപ്പിന്റെ വിവാദ പരാമര്ശത്തില് സര്ക്കാരിനെ പിന്തുണച്ച് സുരേഷ് ഗോപി എം.പി. സര്ക്കാറിന്റെ ഭാഗത്ത് നിന്നും ചെയ്യാന് പറ്റുന്ന കാര്യങ്ങള് ചെയ്യുന്നുണ്ട്. എല്ലാ കാര്യത്തിനും മുഖ്യമന്ത്രി നേരിട്ട് മറുപടി പറയേണ്ട ആവശ്യം ഇല്ല. സര്ക്കാര് തീരുമാനം രാജ്യ താല്പര്യത്തിന് വിരുദ്ധം ആണെങ്കില് അപ്പോള് പ്രതികരിക്കാമെന്നും സുരേഷ് ഗോപി കട്ടപ്പനയില് പറഞ്ഞു. നേരത്തെ വിവാദ പരാമര്ശം നടത്തിയ പാലാ ബിഷപ്പ് മാര് ജോസഫ് കല്ലറങ്ങാട്ടിനെ നേരില് സന്ദര്ശിച്ച് സുരേഷ് ഗോപി പിന്തുണ നല്കിയിരുന്നു.
പാലാ ബിഷപ്പ് മാര് ജോസഫ് കല്ലറങ്ങാട്ടിന്റെ വചന സന്ദേശത്തിലെ നാര്ക്കോട്ടിക് ജിഹാദ് എന്ന പരാമര്ശം വന് വിവാദങ്ങള്ക്കാണ് വഴിവച്ചത്. ഈ പശ്ചാത്തലത്തിലാണ് സുരേഷ് ഗോപി എംപി ബിഷപ്പുമായി കൂടിക്കാഴ്ച നടത്തിയത്. നാര്കോട്ടിക്, ലവ് ജിഹാദുകള്ക്ക് കത്തോലിക്ക പെണ്കുട്ടികളെ ഇര ആക്കുന്നു എന്ന് പാലാ ബിഷപ്പ് മാര് ജോസഫ് കല്ലറങ്ങാട്ടിന്റെ വചന സന്ദേശത്തില് പറഞ്ഞു. ഈ ജിഹാദിന് സഹായം നല്കുന്ന ഒരു വിഭാഗം കേരളത്തില് പ്രവര്ത്തിക്കുന്നുണ്ടെന്നും ആയുധം ഉപയോഗിക്കാനാവാത്ത സ്ഥലങ്ങളില് ഇത്തരം മാര്ഗ്ഗങ്ങള് ഉപയോഗിക്കുന്നുവെന്നും ബിഷപ്പ് മാര് ജോസഫ് കല്ലറങ്ങാട്ട് പറയുന്നു.
ബിഷപ്പിന്റെ വാക്കുകള് ‘മുസ്ലീംങ്ങള് അല്ലാത്തവര് ഇല്ലാതാകണമെന്നാണ് ജിഹാദി ഗ്രൂപ്പുകളുടെ ലക്ഷ്യം. ഇതര മതസ്ഥരായ യുവതികള് ഐഎസ് ക്യാമ്പില് എങ്ങനെ എത്തിയെന്ന് പരിശോധിച്ചാല് ഇക്കാര്യങ്ങള് മനസിലാകും. കത്തോലിക്ക യുവാക്കളില് മയക്ക് മരുന്ന് ഉപയോഗം വ്യാപകമാക്കാന് പ്രത്യേകം ശ്രമങ്ങള് നടക്കുന്നുണ്ട് ‘.
ലവ് ജിഹാദില്ലെന്ന് സ്ഥാപിക്കാന് ശ്രമിക്കുന്നത് കണ്ണടച്ച് ഇരുട്ടാക്കുന്നതിന് തുല്യമാണെന്നും ഇത്തരക്കാര്ക്ക് നിഷിപ്ത താത്പര്യം ഉണ്ടെന്നും പാലാ ബിഷപ്പ് പറയുന്നു. മുസ്ലീം ആശയങ്ങള് അടിച്ചേല്പ്പിക്കാന് പല തരത്തില് ശ്രമം നടത്തുന്നുണ്ടെന്നും ഹലാല് വിവാദം ഇതിന്റെ ഭാഗമാണെന്നും അദ്ദേഹം പറഞ്ഞു. കത്തോലിക്ക കുടുംബങ്ങള് കരുതിയിരിക്കണമെന്നും ബിഷപ്പ് മുന്നറിയിപ്പ് നല്കി.