കൊച്ചി: എറണാകുളം ഗെസ്റ്റ് ഹൗസില്നിന്നു മാധ്യമങ്ങളെ പുറത്താക്കി കേന്ദ്രമന്ത്രി സുരേഷ് ഗോപി. കഴിഞ്ഞ ദിവസം ജബര്പൂര് വിഷയത്തില് ചോദ്യം ഉന്നയിച്ച മാധ്യമപ്രവര്ത്തകരോടു ക്ഷുഭിതനായതിനെ കുറിച്ച് ഇന്നു മാധ്യമപ്രവര്ത്തര് ചോദിച്ചപ്പോള് സുരേഷ് ഗോപി പ്രതികരിക്കാന് വിസമ്മതിച്ചു.
ഇതേ തുടര്ന്ന് മാധ്യമങ്ങളെ അവിടെനിന്നു പുറത്താക്കണമെന്ന് ആവശ്യപ്പെടുകയായിരുന്നു. മാധ്യമങ്ങള് ചോദ്യം ചോദിക്കുന്നത് കേന്ദ്രമന്ത്രിക്ക് അസൗകര്യം ഉണ്ടാക്കുന്നെന്നും അതിനാല് പുറത്തുപോകണമെന്നും ഗസ്റ്റ് ഹൗസ് ഉദ്യോഗസ്ഥര് വഴി മാധ്യമപ്രവര്ത്തകരെ അറിയിക്കുകയായിരുന്നു. താന് പുറത്തിറങ്ങുമ്പോള് ഗസ്റ്റ് ഹൗസ് വളപ്പില് ഒരു മാധ്യമപ്രവര്ത്തകന് പോലും ഉണ്ടാവരുതെന്ന് സുരേഷ് ഗോപി നിര്ദേശിച്ചതായി ഗസ്റ്റ് ഹൗസ് ഉദ്യോഗസ്ഥര് പറഞ്ഞു.
കേന്ദ്രമന്ത്രിമാരും സംസ്ഥാന മന്ത്രിമാരും അടക്കമുള്ളവര് കൊച്ചിയില് എത്തുമ്പോള് സാധാരണ താമസിക്കാറുള്ളത് എറണാകുളം ഗെസ്റ്റ് ഹൗസിലാണ്. ഇവിടെയെത്തുന്നവരുമായി മാധ്യമപ്രവര്ത്തകര് കൂടിക്കാഴ്ച നടത്താറുമുണ്ട്. ശനിയാഴ്ച രാവിലെ എത്തിയ സുരേഷ് ഗോപിയോടും പതിവു പോലെ പ്രതികരണം തേടിയെങ്കിലും മിണ്ടാതെ അദ്ദേഹം മുറിയിലേക്കു പോയി. ഇതിനു ശേഷമാണ് മാധ്യമങ്ങളെ ഗസ്റ്റ് ഹൗസിന്റെ ലോബിയില് നിന്നു പുറത്താക്കണമെന്ന് ഗണ്മാന് വഴി റിസപ്ഷനിസ്റ്റിനെ അറിയിച്ചത്.
വെള്ളിയാഴ്ച, ജബല്പുരില് വൈദികരെ മര്ദിച്ചതുമായി ബന്ധപ്പെട്ട വിഷയത്തില് പ്രതികരണം തേടിയ മാധ്യമപ്രവര്ത്തകരോടാണ് സുരേഷ് ഗോപി ക്ഷുഭിതനായി സംസാരിച്ചത്.’എന്റെ നാവ് പോസ്റ്റ്മോര്ട്ടം ചെയ്തോളൂ. മനസ്സ് പോസ്റ്റ്മോര്ട്ടം ചെയ്യരുത്. ജബല്പൂരില് ഉണ്ടായ ആക്രമണം അത് അങ്ങോട്ടും ഇങ്ങോട്ടും നടക്കുന്ന സംഭവമാണ്.
കേരളത്തില് പാലാ ബിഷപ്പിനെ കൊലപ്പെടുത്താന് ചിലര് ശ്രമിച്ചില്ലേ. കേസെടുത്ത് അകത്ത് ഇടാന് നോക്കിയില്ലേ. നിങ്ങള് ആരാ, ആരോടാ ചോദിക്കുന്നേ? വളരെ സൂക്ഷിച്ച് സംസാരിക്കണം, മാധ്യമം ആരാ ഇവിടെ? ഇവിടെ ജനങ്ങളാണ് വലുത്. ബി കെയര് ഫുള്, സൗകര്യമില്ല പറയാന്, ” എന്നാണ് സുരേഷ് ?ഗോപി പറഞ്ഞത്.
ചോദ്യം പ്രസക്തമാണല്ലോ എന്ന് മാധ്യമപ്രവര്ത്തകര് പറഞ്ഞപ്പോള് സൗകര്യമില്ല പറയാനെന്നും ജബല്പൂരില് സംഭവിച്ചതിന് നിയമപരമായ നടപടിയെടുക്കുമെന്നും അദ്ദേഹം ദേഷ്യത്തോടെ പറഞ്ഞു. ഈ മറുപടിയാണല്ലോ പറയേണ്ടതെന്ന് മാധ്യമപ്രവര്ത്തകരുടെ മറുപടിക്ക് പിന്നാലെ സുരേഷ് ഗോപി പ്രകോപിതനായി. അതങ്ങ് ബ്രിട്ടാസിന്റെ വീട്ടില് കൊണ്ട് വെച്ചാല് മതി, എന്നും സുരേഷ് ഗോപി പറഞ്ഞു. കഴിഞ്ഞ ദിവസം രാജ്യസഭയില്
വഖഫ് ബില് ചര്ച്ചയ്ക്കിടെ, ജോണ് ബ്രിട്ടാസ് എംപിയുമായി സുരേഷ് ഗോപി വാക്പോര് വാര്ത്തകളില് ഇടം പിടിച്ചിരുന്നു.