തിരുവനന്തപുരം: കേന്ദ്രസര്ക്കാരിന്റെ തൊഴിലാളി വിരുദ്ധ നയങ്ങള്ക്കെതിരെ ട്രേഡ് യൂണിയന് സംയുക്ത സമരസമിതിയുടെ നേതൃത്വത്തില് ആരംഭിച്ച പണിമുടക്കില് കേരളത്തിലെ ജനജീവിതം സ്തംഭിച്ചു. ബസ്, ടാക്സി, ഓട്ടോ തൊഴിലാളികള് പണിമുടക്കില് പങ്കെടുക്കുന്നതിനാല് സംസ്ഥാനം പൂര്ണമായും നിശ്ചലമായി.
കൊച്ചി ബിപിസിഎല്ലില് സമരാനുകൂലികള് ജീവനക്കാരുടെ വാഹനം തടഞ്ഞു. ബിപിസിഎല്ലിലെ പണിമുടക്ക് നേരത്തെ ഹൈക്കോടതി നിരോധിച്ചിരുന്നു. കൊച്ചിയില് മെട്രോ ഒഴികെയുള്ള ഗതാഗത സംവിധാനങ്ങള് ഏതാണ്ട് സ്തംഭിച്ച അവസ്ഥയാണ്. അതിനിടെ കേന്ദ്രപൊതുമേഖലാ സ്ഥാപനമായ ബിഇഎംഎല് ദേശീയ പണിമുടക്ക് നിരോധിച്ചു. പ്രതിരോധ സ്ഥാപനങ്ങളില് പണിമുടക്ക് പാടില്ലെന്ന ഓര്ഡിനന്സിന്റെ അടിസ്ഥാനത്തിലാണ് നടപടി.
സംസ്ഥാനത്ത് സര്ക്കാര് ഓഫീസുകളുടെ പ്രവര്ത്തനവും താളംതെറ്റി. പ്രതിപക്ഷ പാര്ട്ടികള് ഭരിക്കുന്ന സംസ്ഥാനങ്ങളില് പണിമുടക്ക് ഏതാണ്ട് പൂര്ണ്ണമാണ്.പണിമുടക്കില് നിന്ന് വിട്ടുനിന്നതോടെ പാലക്കാട് കഞ്ചിക്കോട്ടെ കമ്പനിക്ക് മുന്നില് തൊഴിലാളികള് പ്രതിഷേധം നടത്തുകയാണ്. കഞ്ചിക്കോട് ഇന്ഫ്രാ പാര്ക്കില് ജോലിക്കെത്തിയ തൊഴിലാളികളെ സിഐടിയു പ്രവര്ത്തകര് തിരിച്ചയച്ചു. മലപ്പുറം എടവണ്ണപ്പാറയില് തുറന്ന കടയ്ക്ക് മുന്നില് സമരക്കാരുടെ പ്രതിഷേധമുണ്ടായി. എടവണ്ണപ്പാറയിലെ ഫാമിലി ഷോപ്പിനെതിരെയാണ് സമരക്കാര് പ്രതിഷേധിക്കുന്നത്.
മലപ്പുറം മഞ്ചേരിയിലും തിരുവനന്തപുരം പ്രാവച്ചമ്പലത്തും സമരക്കാര് വാഹനങ്ങള് തടഞ്ഞു. എടവണ്ണപ്പാറയില് കടകള് ബലമായി അടപ്പിച്ചു. ഇവിടെ പോലീസ് എത്തി. ഡല്ഹിയിലെ കേരള ഹൗസിലും പണിമുടക്കുണ്ട്. ഇവിടെ അത്യാവശ്യ വിഭാഗത്തിലുള്ളവര് മാത്രമാണ് ജോലിക്കെത്തിയത്.
പാല്, പത്രം, ആശുപത്രി, കോവിഡ് പ്രതിരോധ പ്രവര്ത്തനങ്ങള്, വിനോദ സഞ്ചാരികളുടെ യാത്രയെ പണിമുടക്കില് നിന്നും ഒഴിവാക്കിയിട്ടുണ്ട്. എന്നാല് സഞ്ചാരികളുടെ എണ്ണത്തില് കാര്യമായ കുറവുണ്ട്. ബിഎംഎസ് ഒഴികെ 22 തൊഴിലാളി സംഘടനകളാണ് പണിമുടക്കില് പങ്കെടുക്കുന്നത്. പൊതുമേഖല ബാങ്കുകളുടെ സ്വകാര്യവത്കരണത്തിനെതിരെ ബാങ്കിംഗ് സംഘടനകളും പണിമുടക്കില് പങ്കെടുക്കുന്നുണ്ട്.
തൊഴിലാളികളുടെ അവകാശം നിഷേധിക്കുന്ന തൊഴില് നിയമങ്ങള് പിന്വലിക്കുക, അസംഘടിതമേഖലയിലെ തൊഴിലാളികള്ക്ക് സാമൂഹ്യസുരക്ഷാ പദ്ധതി നടപ്പാക്കുക, തൊഴിലുറപ്പ് പദ്ധതി വിഹിതം കൂട്ടുക, കൂടുതല് കാര്ഷിക ഉത്പന്നങ്ങള്ക്ക് താങ്ങുവില ഉറപ്പാക്കുക, നിലവിലുള്ളവയ്ക്ക് താങ്ങുവില കൂട്ടുക, കര്ഷകസംഘടനകള് വിവിധ ആവശ്യങ്ങളുന്നയിച്ച് പുറത്തിറക്കിയ അവകാശപത്രിക അംഗീകരിക്കുക, അവശ്യപ്രതിരോധസേവനനിയമം പിന്വലിക്കുക, കോവിഡ് കാലപ്രതിസന്ധിയില് നട്ടം തിരിയുന്ന ആദായനികുതിയില്ലാത്ത പാവപ്പെട്ടവര്ക്ക് പ്രതിമാസം 7500 രൂപ നല്കുക എന്നിവയാണ് സമരക്കാരുടെ പ്രധാന ആവശ്യങ്ങള്.
എന്നാല് മുംബൈ, ഡല്ഹി, ചെന്നൈ ഉള്പ്പടെയുള്ള മഹാനഗരങ്ങളില് ജനജീവിതം സാധാരണ നിലയിലാണ്. കഴിഞ്ഞ രണ്ട് ദിവസം പണിമുടക്കിയ സാഹചര്യത്തില് പണിമുടക്ക് ശക്തമായി നടപ്പാക്കേണ്ടതില്ലെന്നാണ് മത്സ്യ തൊഴിലാളി യൂണിയനുകളുടെ തീരുമാനം. 29-ാം തീയതി വൈകിട്ട് ആറ് വരെയാണ് പണിമുടക്ക്.