ന്യൂഡല്ഹി: ദേശീയ തലസ്ഥാനത്തെ വായു മലിനീകരണം നിയന്ത്രിക്കാൻ ഡൽഹി സർക്കാർ കർശന നടപടികൾ പ്രഖ്യാപിച്ചു. മലിനീകരണ നിയന്ത്രണ (PUC) സർട്ടിഫിക്കറ്റ് ഇല്ലാത്ത വാഹനങ്ങൾക്ക് ഇന്ധനം നിഷേധിക്കുകയും നഗരത്തിന് പുറത്ത് നിന്നുള്ള നോൺ-BS6 വാഹനങ്ങൾക്ക് (BS6 അല്ലാത്ത) പ്രവേശനം നിയന്ത്രിക്കുകയും ചെയ്യും.
പരിസ്ഥിതി മന്ത്രി മൻജിന്ദർ സിങ് സിർസയാണ് വ്യാഴാഴ്ച മുതൽ പ്രാബല്യത്തിൽ വരുന്ന ഈ നടപടികൾ പ്രഖ്യാപിച്ചത്. ഡൽഹിയിൽ ഗുരുതരമായ അവസ്ഥയിൽ വായു നിലവാരം തുടരുന്നതിനിടയിലാണ് ഈ നടപടികൾ.
വ്യാഴാഴ്ച മുതൽ ഡൽഹിക്ക് പുറത്ത് നിന്ന് വരുന്ന BS6 വാഹനങ്ങൾക്ക് മാത്രമേ നഗരത്തിലേക്ക് പ്രവേശനം അനുവദിക്കൂ. മലിനീകരണ നിയന്ത്രണ (PUC) സർട്ടിഫിക്കറ്റ് ഇല്ലാത്ത വാഹനങ്ങൾക്ക് പമ്പുകളിൽനിന്ന് ഇന്ധനം നിറക്കാൻ അനുമതിയുണ്ടാകില്ല.
ഡൽഹിക്ക് പുറത്ത് നിന്നുള്ള മറ്റ് പഴയ വാഹനങ്ങൾക്കെല്ലാം ദേശീയ തലസ്ഥാനത്തേക്ക് പ്രവേശിക്കുന്നതിന് നിയന്ത്രണമുണ്ടാകും. അനുയോജ്യമായ വാഹനങ്ങളുള്ള താമസക്കാർക്ക് നഗരത്തിനകത്ത് സാധാരണ യാത്രയും ഇന്ധനം നിറയ്ക്കലും തുടരാം. പ്രവേശന കവാടങ്ങളിലും പമ്പുകളിലും കർശനമായ പരിശോധന ഉണ്ടാകും.
PUC നിയമം പാലിക്കാൻ വാഹന ഉടമകൾക്ക് ഒരു ദിവസം സമയം നൽകിയിട്ടുണ്ടെന്ന് പരിസ്ഥിതി മന്ത്രി മൻജിന്ദർ സിങ് സിർസ പറഞ്ഞു. സാധുവായ PUC സർട്ടിഫിക്കറ്റ് ഇല്ലാത്ത വാഹനങ്ങൾക്ക് ഇന്ധനം നൽകില്ലെന്ന് അദ്ദേഹം വ്യക്തമാക്കി. PUC ലംഘനങ്ങൾക്ക് പിഴ ചുമത്തുന്നതിലൂടെ സർക്കാർ കർശനമായ പരിശോധന ആരംഭിച്ചിട്ടുണ്ട്.
മലിനീകരണം കുറയ്ക്കാനായി പൊതുഗതാഗതത്തിൽ സർക്കാർ ശ്രദ്ധ കേന്ദ്രീകരിക്കുന്നുണ്ടെന്നും ഡൽഹിയിൽ 7,500 ഇലക്ട്രിക് ബസുകൾ വിന്യസിക്കാൻ പദ്ധതിയിട്ടിട്ടുണ്ടെന്നും സിർസ പറഞ്ഞു. ഫലപ്രദമായ മലിനീകരണ നിയന്ത്രണ നടപടികൾ നിർദേശിക്കാൻ കമ്മിറ്റിയും രൂപീകരിച്ചിട്ടുണ്ട്.
കഴിഞ്ഞ കുറച്ച് ദിവസങ്ങളായി ഡൽഹിയിലേയും ദേശീയ തലസ്ഥാന മേഖലയിലേയും അധികൃതർ ഗ്രേഡഡ് റെസ്പോൺസ് ആക്ഷൻ പ്ലാനിൽ (GRAP-4) ഏറ്റവും കർശനമായ മലിനീകരണ നിയന്ത്രണ നടപടികൾ സ്വീകരിച്ചിട്ടുണ്ട്. വായുവിന്റെ നിലവാരം ഗുരുതരമായ രീതിയിൽ അതിവേഗം വഷളായതിനെ തുടർന്നാണിത്.
ഇത് അടിയന്തര നടപടികൾക്ക് കാരണമായി. ഹെവി വാഹനങ്ങളുടെ പ്രവേശനം നിയന്ത്രിക്കുക, വർക്ക്-ഫ്രം-ഹോം നിർദേശങ്ങളോടെ ഓഫീസ് ഹാജർ കുറയ്ക്കുക, സ്കൂൾ ക്ലാസുകൾ ഹൈബ്രിഡ് അല്ലെങ്കിൽ ഓൺലൈൻ മോഡുകളിലേക്ക് മാറ്റുക എന്നിവ ഇതിൽ ഉൾപ്പെടുന്നു.