തിരുവനന്തപുരം: മതത്തിന്റെ പേരിൽ വോട്ട് ചോദിച്ചെന്ന് ആരോപിച്ച് കഴക്കൂട്ടത്തെ ബിജെപി സ്ഥാനാർത്ഥി ശോഭാ സുരേന്ദ്രനെതിരെ പരാതി. എൽഡിഎഫ് സ്ഥാനാർത്ഥി കടകംപള്ളി സുരേന്ദ്രനെ വ്യക്തിഹത്യ ചെയ്യാൻ ശ്രമിച്ചെന്നും ആരോപണമുണ്ട്. ശോഭയുടെ പൂതന പരാമർശമാണ് പരാതിക്ക് ഇടയാക്കിയത്.
വിശ്വാസികളെ ദ്രോഹിക്കാൻ വന്ന പൂതനയാണ് കടകംപള്ളി സുരേന്ദ്രൻ. കഴക്കൂട്ടത്തെ വിശ്വാസികൾ കൃഷ്ണന്മാരായി മാറുമെന്നായിരുന്നു ശോഭയുടെ പരാമർശം. കടകംപള്ളിയുടെ ഖേദപ്രകടനം വീണിടത്തുകിടന്ന് ഉരുളലാണെന്നും ശോഭ പറഞ്ഞു. ശോഭയ്ക്കെതിരെ ഡിവൈഎഫ്ഐ നേതാവ് ബിഎസ് സജിയാണ് പരാതി നൽകിയത്.
ശോഭയുടെ പരാമർശം ജനം വിലയിരുത്തുമെന്നായിരുന്നു കടകംപള്ളി സുരേന്ദ്രന്റെ മറുപടി. താൻ തൊഴിലാളി വർഗത്തിൽ വളർന്നുവന്ന നേതാവാണ്. സ്ത്രീകളേയും പ്രതിയോഗികളേയും ബഹുമാനിക്കാനാണ് പഠിച്ചിട്ടുള്ളതെന്നും അദ്ദേഹം പറഞ്ഞു. മന്ത്രിക്കെതിരെയുള്ള പരാമർശം തിരുത്തില്ലെന്ന് ശോഭ വ്യക്തമാക്കിയിരുന്നു.
