ഗാങ്ടോക്ക് / കോട്ടയം: വടക്കുകിഴക്കൻ സംസ്ഥാനമായ സിക്കിമിലെ നാംചി ജില്ലയിൽ നിർമ്മാണത്തിലിരുന്ന വൻ ജലവൈദ്യുത പദ്ധതിയുടെ തുരങ്കം തകർന്നുണ്ടായ അപകടത്തിൽ രാജ്യത്തെ നടുക്കി മരണസംഖ്യ ഇരുപതിലേക്ക് ഉയർന്നു. തിങ്കളാഴ്ച ഉച്ചയ്ക്ക് ഒരു മണിയോടെയുണ്ടായ ദുരന്തത്തിൽ കോട്ടയം പാമ്പാടി കൂരോത്തുപറമ്പിൽ (മണ്ണാർകാട് ഇല്ലിവളവ് സ്വദേശി) അനീഷ് മോഹനെ (43) ആണ് കാണാതായത്. കേന്ദ്ര ഊർജ്ജ മന്ത്രാലയത്തിന് കീഴിലുള്ള നാഷണൽ ഹൈഡ്രോ പവർ കോർപ്പറേഷന്റെ (NHPC) സിക്കിം യൂണിറ്റിൽ റിമോട്ട് സെൻസിംഗ് വിഭാഗം മാനേജരും സീനിയർ ജിയോളജിസ്റ്റുമായി പ്രവർത്തിക്കുകയായിരുന്നു ഇദ്ദേഹം.
തെക്കൻ സിക്കിമിലെ സമർഡൂങ്ങിൽ ടീസ്റ്റ ജലവൈദ്യുത പദ്ധതിക്കായി മല തുരന്ന് നിർമ്മിക്കുന്ന കൂറ്റൻ തുരങ്കമാണ് തകർന്നുവീണത്. അണക്കെട്ടിൽ നിന്ന് വൈദ്യുതി ഉൽപ്പാദിപ്പിക്കുന്ന പവർ ഹൗസിലേക്ക് വലിയ അളവിൽ വെള്ളമെത്തിക്കാൻ ഭൂമിക്കടിയിലൂടെ പാറ തുരക്കുന്നതിനിടെയാണ് നാടിനെ നടുക്കിയ ദുരന്തമുണ്ടായത്. പ്രാഥമിക വിവരങ്ങൾ അനുസരിച്ച്, പാറ തുരക്കുന്നതിനിടയിൽ ഭൂമിക്കടിയിൽ രൂപപ്പെട്ട മാരകമായ മീഥൈൻ വാതകത്തിന്റെ ചോർച്ചയെത്തുടർന്നുണ്ടായ വൻ സ്ഫോടനമാണ് തുരങ്കം തകരാൻ ഇടയാക്കിയത്. സ്ഫോടനത്തിന് തൊട്ടുപിന്നാലെ കവാടത്തിലേക്ക് കുന്നിടിഞ്ഞ് വീഴുകയായിരുന്നു.
അപകടം നടക്കുന്ന സമയത്ത് എൻ.എച്ച്.പി.സി മാനേജരായ അനീഷ് മോഹനും മറ്റ് ഉയർന്ന ഉദ്യോഗസ്ഥരും നിർമ്മാണ തൊഴിലാളികളും അടക്കം 25-ലധികം പേർ തുരങ്കത്തിനുള്ളിൽ കൃത്യനിർവ്വഹണത്തിലുണ്ടായിരുന്നു. അപകടത്തിന് പിന്നാലെ തുരങ്കത്തിനുള്ളിൽ മാരകമായ മീഥൈൻ വാതകം വൻതോതിൽ പടർന്നത് രക്ഷാപ്രവർത്തനത്തിന് കനത്ത വെല്ലുവിളിയാണ് ഉയർത്തുന്നത്. ഓക്സിജൻ ലഭ്യത കുറഞ്ഞതും കനത്ത പുകപടലങ്ങളും കാരണം ദുരന്തനിവാരണ സേനയ്ക്ക് ആദ്യ മണിക്കൂറുകളിൽ ഉള്ളിലേക്ക് പ്രവേശിക്കാൻ സാധിച്ചില്ല. മൈനിങ് അപകടങ്ങളിൽ രക്ഷാപ്രവർത്തനം നടത്തി പരിചയസമ്പന്നരായ പശ്ചിമ ബംഗാളിൽ നിന്നുള്ള പ്രത്യേക വിദഗ്ദ്ധ സംഘം നിലവിൽ സ്ഥലത്തെത്തിയിട്ടുണ്ട്.
2010 മുതൽ എൻ.എച്ച്.പി.സിയിൽ ഉദ്യോഗസ്ഥനായ അനീഷ് മോഹൻ മിടുക്കനായ ജിയോളജിസ്റ്റായാണ് അറിയപ്പെട്ടിരുന്നത്. തിങ്കളാഴ്ച രാത്രിയോടെയാണ് അപകട വിവരം കോട്ടയത്തുള്ള ബന്ധുക്കൾ അറിയുന്നത്. നിലവിൽ അനീഷിന്റെ പ്രായമായ മാതാപിതാക്കൾ മാത്രമാണ് പാമ്പാടിയിലെ വീട്ടിലുള്ളത്. വിവരമറിഞ്ഞ് ഡൽഹിയിലായിരുന്ന അനീഷിന്റെ ഭാര്യ സംഗീത ഉടൻ തന്നെ സിക്കിമിലേക്ക് തിരിച്ചു. കൂടാതെ ദുബായിലായിരുന്ന അനീഷിന്റെ സഹോദരനും അടിയന്തരമായി ഡൽഹിയിലെത്തി സിക്കിമിലേക്ക് തിരിച്ചിട്ടുണ്ട്. കാണാതായവർക്കായി സൈന്യത്തിന്റെ സഹായത്തോടെ അത്യാധുനിക ഉപകരണങ്ങൾ ഉപയോഗിച്ചാണ് തിരച്ചിൽ തുടരുന്നത്.
ദുരന്തത്തിന്റെ പശ്ചാത്തലത്തിൽ സിക്കിം സർക്കാർ അപകടത്തെക്കുറിച്ച് അന്വേഷിക്കാൻ ഉന്നതതല വിദഗ്ദ്ധ സമിതിയെ നിയോഗിച്ചിട്ടുണ്ട്. ഭാവിയിൽ ഇത്തരം പദ്ധതികളിൽ സുരക്ഷ ഉറപ്പാക്കുന്നതിനായി മീഥൈൻ വാതകച്ചോർച്ചയുടെ കൃത്യമായ കാരണം സമിതി വിലയിരുത്തും. അപകടത്തിൽ മരിച്ചവരുടെ ആശ്രിതർക്ക് സിക്കിം സർക്കാർ 4 ലക്ഷം രൂപ വീതവും പരിക്കേറ്റ് ചികിത്സയിൽ കഴിയുന്നവർക്ക് 50,000 രൂപ വീതവും അടിയന്തര ധനസഹായം പ്രഖ്യാപിച്ചു. കാണാതായ മലയാളി ഉൾപ്പെടെയുള്ളവർക്കായി പ്രാർത്ഥനയോടെ കാത്തിരിക്കുകയാണ് നാട്.
English Summary
The death toll in the tragic tunnel collapse in the Namchi district of Sikkim has risen to 20, while five people, including a Hydro-Geologist from Kottayam, Kerala, remain missing. The missing Malayali has been identified as Aneesh Mohan (43) from Pampady, Kottayam, who has been serving as the Remote Sensing Manager at the National Hydroelectric Power Corporation (NHPC) Sikkim unit since 2010. The disaster occurred on Monday afternoon at the Teesta Hydroelectric Project tunnel in Samardung, South Sikkim, following a massive methane gas leak explosion while drilling through rocks. Rescue operations are severely hampered by the toxic gas layout, prompts the deployment of mining rescue experts from West Bengal. Meanwhile, the Sikkim government announced an ex-gratia of ₹4 lakh for the families of the deceased.