CRIME 🔫 കോട്ടയത്ത് ബാറിനുമുന്നില്‍ വെടിവെപ്പ്,അന്വേഷണാരംഭിച്ച് പോലീസ്

കോട്ടയം:ബാറിന് മുന്നില്‍ എയര്‍ ഗണ്ണുപയോഗിച്ച് ് ബൈക്കിലെത്തിയ യുവാവ് വെടിവെച്ചു. വെള്ളിയാഴ്ച രാത്രി ഏഴരയോടെ കോതനല്ലൂരിന് സമീപമുള്ള ബാറിന് മുന്നിലാണ് സംഭവം. തോക്കുമായി ഇരുചക്ര വാഹനത്തില്‍ എത്തിയ യുവാവിനോട് ഇവിടെ നിന്നവര്‍ തോക്ക് ഉപയോഗിച്ച് വെടിവെയ്ക്കാന്‍ ആകുമോ എന്ന് ചോദിച്ചു. ഉടന്‍തന്നെ യുവാവ് തോക്ക് നിലത്തേക്ക് ചൂണ്ടി വെടി ഉതിര്‍ക്കുകയായിരുന്നു.

തുടര്‍ന്ന് ഇയാള്‍ ഇവിടെ നിന്ന് ബൈക്കില്‍ കയറി പോയി. സംഭവമറിഞ്ഞ് സ്ഥലത്തെത്തിയ പോലീസ് സി.സി.ടി.വി. ദൃശ്യങ്ങള്‍ പരിശോധനക്കായി ശേഖരിച്ചു.യുവാവിനായി അന്വേഷണം ഊര്‍ജ്ജിതമാക്കി.

മൂന്നുമാസം മുമ്പ് കൊച്ചി കുണ്ടന്നൂരിലെ ബാറില്‍ വെടിവെപ്പുണ്ടായിരുന്നു.ബാറിനുള്ളില്‍ വെടിവെപ്പു നടത്തിയത് റോജന്‍ എന്നയാളാണെന്ന് കണ്ടെത്തിയിരുന്നു.ഇയാള്‍ക്കെതിരെ കേസെടുത്ത് നടത്തിയ പരിശോധനയില്‍ റോജന്‍ ഉപയോഗിച്ച തോക്ക് കൂടെയുണ്ടായിരുന്ന അഭിഭാഷകന്റേതാണെന്ന് കണ്ടെത്തി. അഭിഭാഷകനായ ഹാരോള്‍ഡിന് 2025 വരെ തോക്ക് ലൈസന്‍സ് ഉണ്ടെന്ന് സ്ഥിരീകരിച്ചു. പ്രതികളുടെ അറസ്റ്റ് രേഖപ്പെടുത്തി ബാറിലെത്തിച്ച് തെളിവെടുപ്പ് നടത്തിയിരുന്നു.

റോജന് ഇയാള്‍ക്ക് മറ്റൊരു കേസില്‍ വെടിവെപ്പിന് തൊട്ടുമുമ്പുള്ള ദിവസമായിരുന്നു ജാമ്യം ലഭിച്ചത്. ഇതേ തുടര്‍ന്നുള്ള ആഘോഷത്തിന്റെ ഭാഗമായാണ് ഇയാള്‍ അഭിഭാഷകനൊപ്പം രണ്ട് മണിയോടെ ഓജീസ് കാന്താരി ബാറിലെത്തിയത്. ഇവര്‍ നാല് മണിയോടെ ബാറില്‍ നിന്ന് മടങ്ങവെയാണ് വെടിയുതിര്‍ത്തത്.

ബാറുടമകള്‍ പരാതി നല്‍കാന്‍ വൈകുകയായിരുന്നു. വൈകുന്നേരം ഏഴുമണിയോടെ പരാതി ലഭിച്ച ശേഷമാണ് മരട് പൊലീസ് സ്ഥലത്തെത്തി പരിശോധന നടത്തിയത്. ചുമരില്‍ വെടിയുണ്ട പതിച്ചതിന്റെ അടയാളം കണ്ടെത്തിയിരുന്നു.പ്രകോപനങ്ങളൊന്നുമില്ലാതെ രണ്ടംഗ സംഘത്തിലെ ഒരാള്‍ വെടിയുതിര്‍ക്കുകയായിരുന്നുവെന്നാണ് ഹോട്ടല്‍ അധികൃതര്‍ നല്‍കിയ വിവരം. അതേസമയം പരാതി നല്‍കാന്‍ വൈകിയതും പൊലീസ് പരിശോധിക്കും. ഈ ബാര്‍ ഹോട്ടലിലെയും സമീപത്തെയും സിസിടിവി ദൃശ്യങ്ങളില്‍ നിന്നാണ് പൊലീസ് പ്രതിയെ തിരിച്ചറിഞ്ഞത്.

അപരിചിതരായ രണ്ടു പേര്‍ ഒന്നാം നിലയിലെ ബാറില്‍ നിന്ന് ഇറങ്ങിയ ശേഷം താഴത്തെ നിലയില്‍വച്ച് മുകളിലേക്ക് വെടിയുതിര്‍ക്കുകയായിരുന്നു. ഇതിനുശേഷം, ഇവരെത്തിയ വാഹനത്തില്‍ തന്നെ മടങ്ങുകയായിരുന്നുവെന്നും ബാര്‍ ജീവനക്കാര്‍ പൊലീസിന് മൊഴി നല്‍കി.