MDMA 💉കൊച്ചിയിൽ വീടെടുത്ത് മയക്കുമരുന്ന് വില്പന; എം.ഡി.എം.എ.യുമായി യുവാവും യുവതിയും പിടിയിൽ

കൊച്ചി: നഗരത്തില്‍ വീടെടുത്ത് താമസിച്ച് മയക്കുമരുന്ന് വില്‍പ്പന നടത്തിവന്ന യുവാവും യുവതിയും പിടിയില്‍. പാലക്കാട് തൃത്താല കക്കാട്ടില്‍ വീട്ടില്‍ സി.എസ്. ഷനൂബ് (44), ഇടുക്കി ചിന്നാര്‍ ഏലപ്പാറ മണലിപ്പാറ വീട്ടില്‍ വിനീത കുമാരി (38) എന്നിവരാണ് 10.88 ഗ്രാം എം.ഡി.എം.എ.യുമായി പിടിയിലായത്.

എളമക്കര, കറുകപ്പള്ളി മാമംഗലം റോഡിലെ വീട്ടില്‍ താമസമാക്കിയ ഇവര്‍ സംസ്ഥാനത്തിനകത്തുനിന്നും പുറത്തുനിന്നും മയക്കുമരുന്ന് എറണാകുളത്ത് എത്തിച്ചാണ് വിറ്റിരുന്നത്. കൊച്ചി സിറ്റി പോലീസ് ഡാന്‍സാഫ് സംഘമാണ് ഇവരെ പിടിച്ചത്.

ഇവര്‍ താമസിച്ച വീട്ടില്‍ പതിവായി യുവാക്കളും യുവതികളും വന്നുപോകുന്നതായി പോലീസിന് രഹസ്യവിവരം ലഭിച്ചിരുന്നു. തുടര്‍ന്ന് സൈബര്‍ സെല്ലിന്റെ സഹായത്തോടെ ഇവരെ നിരന്തരമായി നിരീക്ഷിച്ചുവരുകയായിരുന്നു. വെള്ളിയാഴ്ച പ്രതികള്‍ മലപ്പുറത്തു നിന്ന് മയക്കുമരുന്ന് കൊണ്ടുവരാന്‍ പോകുന്നു എന്ന് മനസ്സിലാക്കിയതോടെയാണ് പോലീസ് വീട് പരിശോധിച്ച് മയക്കുമരുന്ന് കണ്ടെത്തി അറസ്റ്റ് ചെയ്തത്.

എളമക്കര സ്റ്റേഷന്‍ ഇന്‍സ്പെക്ടര്‍ എസ്.ആര്‍. സനീഷ്, എസ്.ഐ.മാരായ സുബൈര്‍, ഫൈസല്‍, സിവില്‍ പോലീസ് ഓഫീസര്‍മാരായ രാജേഷ്, അമൃത തുടങ്ങിയവര്‍ ചേര്‍ന്നാണ് പ്രതികളെ പിടികൂടിയത്.

മൂവാറ്റുപുഴ: പ്ലൈവുഡ് കമ്പനിയുടെ മറവില്‍ എം.ഡി.എം.എ. അടക്കമുള്ള മയക്കുമരുന്നുകളുടെ കച്ചവടം നടത്തിവന്ന ഏഴു പേരെ എക്‌സൈസ് സംഘം പിടികൂടി. മൂവാറ്റുപുഴ മുളവൂര്‍ പൊന്നിരിക്കപ്പറമ്പില്‍ പ്രവര്‍ത്തിക്കുന്ന ഡെക്ക് വുഡ് ഇന്ത്യ ട്രേഡിങ് കമ്പനി എന്ന സ്ഥാപനത്തിന്റെ മറവില്‍ മയക്കുമരുന്ന് വിപണനവും ഉപഭോഗവും നടത്തിവന്നവരാണ് പിടിയിലായത്.

മുളവൂര്‍ സ്വദേശികളായ മുതിരക്കാലായില്‍ ആസിഫ് അലി, ചിറയത്ത് ഇബ്രാഹിം ബാദുഷ, കരോട്ടുപറമ്പില്‍ സലിം മുഹമ്മദ് (ഡെക്കോ), പുത്തന്‍വീട്ടില്‍ അന്‍വര്‍ സാദിഖ്, അറയ്ക്കക്കുടിയില്‍ മുഹമ്മദ് അല്‍ത്താഫ്, മേക്കപ്പടിക്കല്‍ മുഹമ്മദ് അസ്ലം (അസ്ലംകുട്ടി), പേഴുംകാട്ടില്‍ അനസ് എന്നിവരാണ് അറസ്റ്റിലായത്. ഇവരില്‍നിന്ന് രാസലഹരിയായ എം.ഡി.എം.എ.യും കഞ്ചാവും പിടിച്ചെടുത്തു.

എക്‌സൈസ് റേഞ്ച് ഇന്‍സ്‌പെക്ടര്‍ സുനില്‍ ആന്റോയുടെ നേതൃത്വത്തില്‍ ശനിയാഴ്ച രാത്രി നടത്തിയ പരിശോധനയിലാണ് സംഘം പിടിയിലായത്. പ്ലൈവുഡ് ബിസിനസിന്റെ മറവില്‍ ബെംഗളൂരുവില്‍ നിന്നാണ് ഇവര്‍ എം.ഡി.എം.എ. കൊണ്ടുവന്നിരുന്നത്. കഞ്ചാവും ഇതോടൊപ്പം മറ്റിടങ്ങളില്‍നിന്ന് എത്തിച്ചിരുന്നു.

മൂവാറ്റുപുഴ, കോതമംഗലം, പെരുമ്പാവൂര്‍ മേഖലകളിലെ സ്ഥാപനങ്ങള്‍ കേന്ദ്രീകരിച്ചും അല്ലാതെയും വിദ്യാര്‍ഥികള്‍ക്കും യുവാക്കള്‍ക്കുമാണ് ഇവര്‍ വില്‍പ്പന നടത്തിയിരുന്നത്. സ്ഥാപനത്തിലെത്തി മയക്കുമരുന്ന് ഉപയോഗിക്കുന്നതിനുള്ള സൗകര്യങ്ങളും ഏര്‍പ്പെടുത്തിയിരുന്നു. ആവശ്യക്കാര്‍ക്ക് ഇവിടെയത്തുന്നവര്‍ വഴിയാണ് വിതരണം ചെയ്തിരുന്നത്. കാരിയര്‍മാരായി പ്രവര്‍ത്തിക്കുന്നവരും ഏറെപ്പേരുണ്ടെന്നാണ് കണ്ടെത്തല്‍. പ്രതികളുടെ കൂട്ടാളികളെക്കുറിച്ച് എക്‌സൈസ് അന്വേഷിച്ചുവരുകയാണ്.

കുറച്ചു ദിവസങ്ങളായി പ്രതികള്‍ എക്‌സൈസ് ഷാഡോ സംഘത്തിന്റെ നിരീക്ഷണത്തിലായിരുന്നു. പ്രിവന്റീവ് ഓഫീസര്‍ പി.പി. ഹസൈനാര്‍, സിവില്‍ എക്‌സൈസ് ഓഫീസര്‍മാരായ പി.ബി. ലിബു, എം.എം. ഷെബീര്‍, കെ.ഇ. ജോമോന്‍, പി.എന്‍. അജി, കെ.എസ്. ബബീന എന്നിവരടങ്ങുന്ന എക്‌സൈസ് സംഘമാണ് പ്രതികളെ പിടികൂടിയത്.