കൊച്ചി:ലിജോ ജോസ് പെല്ലിശേരി – മമ്മൂട്ടി ചിത്രം നൻപകൽ നേരത്തിനെ പ്രശംസിച്ച് രംഗത്തെത്തിയിരിക്കുകയാണ് സംവിധായകൻ സത്യൻ അന്തിക്കാട്. ഉച്ചമയക്കത്തിലെ സ്വപ്നം പോലൊരു സിനിമയെന്നാണ് സത്യൻ അന്തിക്കാട് ചിത്രത്തെ വിശേഷിപ്പിച്ചിരിക്കുന്നത്. എത്ര മനോഹരമായാണ് ജെയിംസിന്റേയും സുന്ദരത്തിന്റേയും കഥ ലിജോ പറഞ്ഞതെന്നും അദ്ദേഹം ഫെയ്സ്ബുക്ക് കുറിപ്പിലൂടെ കുറിച്ചു. മമ്മൂട്ടി എന്ന അതുല്യനടന്റെ വിസ്മയിപ്പിക്കുന്ന പ്രകടനം വീണ്ടും കാണാൻ സാധിച്ചതിന്റെ സന്തോഷവും അദ്ദേഹം പങ്കുവച്ചു. കഴിഞ്ഞ ദിവസം ചിത്രത്തിന്റെ ഷൂട്ടിങ് ഇടവേളയിൽ ലൊക്കേഷനിൽ നിലത്തു കിടന്നുറങ്ങുന്ന മമ്മൂട്ടിയുടെ ചിത്രം സോഷ്യൽ മീഡിയയിൽ വൈറലായിരുന്നു.
ചിത്രം പുറത്തിറങ്ങി ദിവസങ്ങൾ കഴിഞ്ഞിട്ടും ചിത്രത്തേക്കുറിച്ചും ചിത്രത്തിലെ മമ്മൂട്ടിയുടെ പ്രകടനത്തേക്കുറിച്ചുമുള്ള സിനിമ കണ്ട പ്രേക്ഷകർ വീണ്ടും വീണ്ടും വാതോരാതെ പറയുകയാണ്. പുഴു എന്ന ചിത്രത്തിൽ അഭിനയച്ച ലക്സി എന്ന നായക്കുട്ടിയാണ് നൻപകൽ നേരത്ത് മയക്കത്തിലും അഭിനയിച്ചിരിക്കുന്നത്. സെവള എന്നാണ് നൻപകൽ നേരത്ത് മയക്കത്തിലെ നായക്കുട്ടിയുടെ പേര്. ചിത്രത്തിലെ ലക്സിയുടെ അഭിനയവും ശ്രദ്ധേയമായിരുന്നു. രമ്യ പാണ്ഡ്യൻ, രമ്യ സുവി എന്നിവരും ചിത്രത്തിൽ കേന്ദ്ര കഥാപാത്രങ്ങളായെത്തിയിരുന്നു.
സിനിമ പ്രേക്ഷകരും നിരൂപകരും ഒരുപോലെ പ്രശംസിച്ച ചിത്രം കൂടിയാണ് നൻപകൽ നേരത്ത് മയക്കം. കേരളത്തിൽ ഐഎഫ്എഫ്കെയിലായിരുന്നു ചിത്രം ആദ്യമായി പ്രദർശിപ്പിച്ചത്. മമ്മൂട്ടിക്കമ്പനി ആദ്യം നിർമ്മിച്ച ചിത്രം കൂടിയായിരുന്നു ഇത്. അശോകൻ, കൈനകരി തങ്കരാജ്, സുരേഷ് ബാബു, ചേതൻ ജയലാൽ, രാജേഷ് ശർമ തുടങ്ങിയവരും ചിത്രത്തിൽ മറ്റു പ്രധാന വേഷങ്ങളിലെത്തി. ബി. ഉണ്ണികൃഷ്ണൻ ചിത്രം ക്രിസ്റ്റഫർ, ജിയോ ബേബി ചിത്രം കാതൽ എന്നിവയാണ് മമ്മൂട്ടിയുടേതായി അണിയറയിൽ ഒരുങ്ങുന്ന മറ്റു ചിത്രങ്ങൾ.
ഫെയ്സ്ബുക്ക് കുറിപ്പിന്റെ പൂർണരൂപം
“നൻപകൽ നേരത്ത് മയക്കം” കണ്ടു. ഉച്ചമയക്കത്തിലെ സ്വപ്നം പോലൊരു സിനിമ. എത്ര മനോഹരമായാണ് ജെയിംസിന്റേയും സുന്ദരത്തിന്റേയും കഥ ലിജോ പറഞ്ഞത്. പണ്ട് ‘മഴവിൽക്കാവടി’യുടെ ലൊക്കേഷൻ തേടി നടന്ന കാലത്ത് പഴനിയിലെ ഗ്രാമങ്ങൾ ഞാൻ കണ്ടിട്ടുണ്ട്. ചോളവയലുകളും ഗ്രാമവാസികൾ ഇടതിങ്ങിപ്പാർക്കുന്ന കൊച്ചു വീടുകളും, രാപകലില്ലാതെ അലയടിക്കുന്ന തമിഴ്പാട്ടുകളും….
ആ ഗ്രാമഭംഗി മുഴുവൻ ലിജോ ഒപ്പിയെടുത്തിരിക്കുന്നു. മമ്മൂട്ടി എന്ന അതുല്യനടന്റെ വിസ്മയിപ്പിക്കുന്ന പ്രകടനം വീണ്ടും കാണാൻ സാധിച്ചു. ജെയിംസിന്റെ നാടകവണ്ടി ഗ്രാമം വിട്ടുപോകുമ്പോൾ പിന്നാലെയോടുന്ന സുന്ദരത്തിന്റെ വളർത്തുനായയുടെ ചിത്രം ഇപ്പോഴും ഒരു നൊമ്പരമായി മനസ്സിൽ! ലിജോ ജോസ് പെല്ലിശ്ശേരിക്കും ടീമിനും മനസ്സു നിറഞ്ഞ സ്നേഹം