ജയ്പുർ: ഐപിഎൽ ടീമായ രാജസ്ഥാൻ റോയൽസിന്റെ മലയാളി ക്യാപ്റ്റൻ സഞ്ജു സാംസണെ ഇന്ത്യ ലോകകപ്പ് ടീമിൽ ഉൾപ്പെടുത്തണമെന്ന് മുൻ ക്രിക്കറ്റ് താരം അമോൽ മജുംദാർ. ഈ വർഷം ഇന്ത്യയിൽ നടക്കുന്ന ഏകദിന ലോകകപ്പിൽ സഞ്ജുവിനെയും കളിപ്പിക്കണമെന്നാണ് അമോൽ മജുംദാറിന്റെ നിലപാട്.
‘‘ലോകകപ്പ് വരികയാണ്. പ്രതിഭ കൊണ്ട് കളി മാറ്റാൻ ശേഷിയുള്ള സഞ്ജു സാംസൺ ഇവിടെയുണ്ട്. സഞ്ജുവിന് തുടർച്ചയായി അവസരങ്ങൾ നൽകുകയാണു ചെയ്യേണ്ടത്.’’– ഒരു സ്പോർട്സ് മാധ്യമത്തോടു മജുംദാർ പറഞ്ഞു.
‘‘സഞ്ജുവിന് കൂടുതൽ അവസരങ്ങൾ ഒരുക്കി പിന്തുണയ്ക്കണം. കുറച്ചു പരമ്പരകളിൽ അദ്ദേഹം പരാജയപ്പെട്ടെന്നതു ശരിയാണ്. എന്നാൽ സഞ്ജുവിന്റെ കഴിവിനെക്കുറിച്ചു നമുക്കെല്ലാം അറിയാം.
എന്റെ ടീമിൽ ഉറപ്പായും സഞ്ജുവിന് ഇടം ഉണ്ടാകുമായിരുന്നു.’’– മജുംദാർ വ്യക്തമാക്കി. ഐപിഎല്ലിൽ ഗുജറാത്ത് ടൈറ്റൻസിനെതിരെ രാജസ്ഥാൻ റോയൽസ് മൂന്ന് വിക്കറ്റുകൾക്കു വിജയിച്ചപ്പോൾ അർധ സെഞ്ചറിയുമായി മുന്നിൽനിന്നു നയിച്ചത് ക്യാപ്റ്റൻ സഞ്ജു സാംസണാണ്.
ഗുജറാത്തിന്റെ ഹോം ഗ്രൗണ്ടിൽ നടന്ന പോരാട്ടത്തിൽ ആദ്യം ബാറ്റു ചെയ്ത ടൈറ്റൻസ് ഏഴു വിക്കറ്റ് നഷ്ടത്തിൽ 177 റൺസാണു നേടിയത്. മറുപടി ബാറ്റിങ്ങിൽ 32 പന്തുകൾ നേരിട്ട സഞ്ജു 60 റൺസെടുത്തു പുറത്തായി. നാലു പന്തുകൾ ബാക്കി നിൽക്കെ ഏഴു വിക്കറ്റ് നഷ്ടത്തിൽ രാജസ്ഥാൻ വിജയത്തിലെത്തി. ബുധനാഴ്ച ലക്നൗവിനെതിരെയാണ് രാജസ്ഥാന്റെ അടുത്ത മത്സരം.
