ബാര്‍ബഡോസ്: വെസ്റ്റ് ഇന്‍ഡീസിനെതിരായ ഏകദിനപരമ്പരയിലെ ആദ്യ മത്സരത്തില്‍ ടോസ് നേടിയ ഇന്ത്യ ഫീല്‍ഡിങ് തിരഞ്ഞെടുത്തു. മലയാളി താരം സഞ്ജു സാംസണ്‍ ടീമിലിടം കണ്ടെത്തിയില്ല. ഇന്ത്യയ്ക്ക് വേണ്ടി പേസ് ബൗളര്‍ മുകേഷ് കുമാര്‍ അരങ്ങേറ്റം കുറിയ്ക്കും.
രോഹിത് ശര്‍മ നയിക്കുന്ന ടീമില്‍ ബാറ്റര്‍മാരായി ശുഭ്മാന്‍ ഗില്‍, വിരാട് കോലി, സൂര്യകുമാര്‍ യാദവ് എന്നിവരുണ്ട്. വിക്കറ്റ് കീപ്പറായി ഇഷാന്‍ കിഷന്‍ കളിക്കും. ഹാര്‍ദിക് പാണ്ഡ്യ, രവീന്ദ്ര ജഡേജ, ശാര്‍ദൂല്‍ ഠാക്കൂര്‍ എന്നിവര്‍ ഓള്‍ റൗണ്ടര്‍മാരാണ്. മുകേഷ് കുമാര്‍, ഉമ്രാന്‍ മാലിക്, കുല്‍ദീപ് യാദവ് എന്നിവരാണ് ബൗളിങ് നിരയിലുള്ളത്. ഉമ്രാന്‍ മാലിക് അപ്രതീക്ഷിതമായാണ് ടീമിലിടം നേടിയത്.
വിന്‍ഡീസിനെതിരേ തുടര്‍ച്ചയായ 13-ാം പരമ്പരവിജയം ലക്ഷ്യമിട്ടാണ് ഇന്ത്യ ഇറങ്ങുന്നത്. ഇന്ത്യയ്ക്കെതിരേ വിന്‍ഡീസ് അവസാനമായി പരമ്പര ജയിച്ചത് 2006-ലാണ്. വിന്‍ഡീസ് നിരയെ വിക്കറ്റ് കീപ്പര്‍ ബാറ്ററായ ഷായ് ഹോപ്പാണ് നയിക്കുന്നത്. കൈല്‍ മായേഴ്‌സ്, ഷിംറോണ്‍ ഹെറ്റ്‌മെയര്‍, ബ്രാന്‍ഡണ്‍ കിങ്, റോവ്മാന്‍ പവല്‍ തുടങ്ങിയ പ്രമുഖര്‍ ടീമിലുണ്ട്.
ടീം ഇന്ത്യ: രോഹിത് ശര്‍മ, ശുഭ്മാന്‍ ഗില്‍, വിരാട് കോലി, ഇഷാന്‍ കിഷന്‍, ഹാര്‍ദിക് പാണ്ഡ്യ, സൂര്യകുമാര്‍ യാദവ്, രവീന്ദ്ര ജഡേജ, ശാര്‍ദൂല്‍ ഠാക്കൂര്‍, കുല്‍ദീപ് യാദവ്, ഉമ്രാന്‍ മാലിക്, മുകേഷ് കുമാര്‍.
ടീം വെസ്റ്റ് ഇന്‍ഡീസ്: ഷായ് ഹോപ്പ്, കൈല്‍ മായേഴ്‌സ്, ബ്രാന്‍ഡണ്‍ കിങ്, അലിക് അതനാസെ, ഷിംറോണ്‍ ഹെറ്റ്‌മെയര്‍, റൊമാരിയോ ഷെപ്പേര്‍ഡ്, യാന്നിക് കാരിയ, റോവ്മാന്‍ പവല്‍, ഡൊമിനിക്ക് ഡ്രേക്ക്‌സ്, ജെയ്ഡന്‍ സീല്‍സ്, ഗുഡുകേഷ് മോട്ടി.
