ഫ്രാൻസിസ്കോ: ഇന്ത്യൻ കോൺസുലേറ്റിന് തീയിട്ടതായി ചൊവ്വാഴ്ച പ്രാദേശിക ചാനലായ ദിയ ടിവി റിപ്പോർട്ട് ചെയ്തു. ഞായറാഴ്ച പുലർച്ചെ 1:30 നും 2:30 നും ഇടയ്ക്കുള്ള സമയത്താണ് സംഭവം നടന്നത്. അഞ്ച് മാസത്തിനിടെ കോൺസുലേറ്റിന് നേരെ നടന്ന രണ്ടാമത്തെ അക്രമണമാണിത്. ഖാലിസ്ഥാൻ അനുകൂലികളാണ് ആക്രമണം നടത്തിയത്. മാർച്ചിലും ഇന്ത്യൻ കോൺസുലേറ്റിന് നേരെ ഖാലിസ്ഥാൻ അനുകൂലികൾ അക്രമണം നടത്തിയിരുന്നു.
ഖാലിസ്ഥാനി അനുകൂലികൾ പുറത്തുവിട്ട തീപിടിത്തത്തിന്റെ വീഡിയോയും ടിവി ചാനൽ പങ്കുവെച്ചു.
എന്നാൽ ഇന്ത്യാ ടുഡേയ്ക്ക് വീഡിയോയുടെ ആധികാരികത സ്വതന്ത്രമായി പരിശോധിക്കാൻ കഴിഞ്ഞില്ല. അതേസമയം, പരിക്കുകളൊന്നും ഇതുവരെ റിപ്പോർട്ട് ചെയ്തിട്ടില്ല. സാൻ ഫ്രാൻസിസ്കോ അഗ്നിശമന സേന ഉടൻ തന്നെ തീ നിയന്ത്രണ വിധേയമാക്കി. നശീകരണത്തെയും തീകൊളുത്താനുള്ള ശ്രമത്തെയും യുഎസ് ശക്തമായി അപലപിക്കുന്നുവെന്ന് സംഭവത്തോട് പ്രതികരിച്ച് യുഎസ് സ്റ്റേറ്റ് ഡിപ്പാർട്ട്മെന്റ് വക്താവ് മാത്യു മില്ലർ പറഞ്ഞു.
“യുഎസിലെ നയതന്ത്ര കേന്ദ്രങ്ങൾക്കോ വിദേശ നയതന്ത്രജ്ഞർക്കോ എതിരായ നശീകരണമോ അക്രമമോ ക്രിമിനൽ കുറ്റമാണ്.-” അദ്ദേഹം കൂട്ടിച്ചേർത്തു.
മാർച്ചിലെ കോൺസുലേറ്റ് അക്രമണം
മാർച്ചിൽ, പഞ്ചാബ് പോലീസ് ഇന്ത്യയിൽ അമൃത്പാൽ സിംഗിനായി രാജ്യവ്യാപകമായി തിരച്ചിൽ ആരംഭിച്ചതിനെ തുടർന്ന് ഖാലിസ്ഥാനി അനുകൂലികൾ സാൻഫ്രാൻസിസ്കോയിലെ ഇന്ത്യൻ കോൺസുലേറ്റ് തകർത്തു. അക്രമണത്തിനിടെ പഞ്ചാബി സംഗീതം മുഴങ്ങിക്കുകയും വൻ ജനക്കൂട്ടം ഇന്ത്യൻ കോൺസുലേറ്റിനെ ആക്രമിക്കുന്നതിന്റെ വീഡിയോകൾ പുറത്തുവിടുകയും ചെയ്തു.
സാൻ ഫ്രാൻസിസ്കോ കെട്ടിടത്തിന്റെ പുറം ഭിത്തിയിൽ “ഫ്രീ അമൃത്പാൽ” എന്ന് എഴുതിയ ഒരു വലിയ ഗ്രാഫിറ്റി സ്പ്രേ പെയിന്റും ചെയ്തു. ഖാലിസ്ഥാൻ അനുകൂല മുദ്രാവാക്യം വിളിച്ച പ്രതിഷേധക്കാർ സുരക്ഷാ സംവിധാനങ്ങൾ തകർത്ത് കോൺസുലേറ്റിനുള്ളിൽ രണ്ട് ഖാലിസ്ഥാനി ബാനറുകൾ സ്ഥാപിച്ചു. ഇരുമ്പ് ദണ്ഡ് ഉപയോഗിച്ച് വാതിലും ജനലും തകർത്തു.