ഹൈദരാബാദ്:തെന്നിന്ത്യയില്‍ നിരവധി ആരാധകരുള്ള നടിയാണ് സാമന്ത അക്കിനേനി. കഴിഞ്ഞ കുറച്ച് നാളുകളായി താരത്തിന്റെ വിവാഹമോചന വാര്‍ത്തകള്‍ വലിയ ചര്‍ച്ചയായിരുന്നു. ഇപ്പോഴിതാ ഇതിനെല്ലാം പിന്നാലെ സാമന്ത നായികയാകുന്ന ചിത്രം പ്രഖ്യാപിച്ചിരിക്കുകയാണ്.
ശന്തരുബന്‍ ആണ് സാമന്തയുടെ ചിത്രം സംവിധാനം ചെയ്യുന്നത്. സാമന്ത നായികയാകുന്ന പുതിയ ചിത്രം തെലുങ്കിലും തമിഴിലുമായിട്ടുമാണ് എത്തുക. നായിക വേഷത്തിന് പ്രാധാന്യമുള്ള ചിത്രമായിരിക്കും ഇതെന്നാണ് പ്രതീക്ഷിക്കപ്പെടുന്നത്. ശന്തരുബന്‍ സംവിധാനം ചെയ്യുന്ന ചിത്രത്തിന്റെ പ്രമേയം സംബന്ധിച്ച കാര്യങ്ങള്‍ പുറത്തുവിട്ടിട്ടില്ല.
ഡ്രീം വാര്യര്‍ പിക്‌ചേഴ്‌സാണ് ചിത്രം നിര്‍മിക്കുന്നത്. വിണ്ണൈത്താണ്ടി വരുവായ എന്ന ചിത്രത്തില്‍ അതിഥി താരമായിട്ടാണ് സാമന്ത ആദ്യമായി വെള്ളിത്തിരിയിലെത്തുന്നത്. യാ മായ ചേസവേയെന്ന ചിത്രം തെലുങ്കില്‍ വന്‍ ഹിറ്റായതോടെ നായികയെന്ന നിലയില്‍ സാമന്തയ്ക്ക് തിരക്കേറി.
മനം, അഞ്ചാന്‍, കത്തി, തെരി, ജനത ഗാരേജ്, മേഴ്‌സല്‍, മജിലി, നീതാനെ എന്‍ പൊന്‍വസന്തം, ഓട്ടോനഗര്‍ സൂര്യ, 10 എന്‍ഡ്രതുക്കുള്ള തുടങ്ങി ഒട്ടേറെ ഹിറ്റുകളിലാണ് സാമന്ത നായികയായത്. സാമന്ത നായികയായിട്ട് നാല്‍പ്പത്തിലധികം ചിത്രങ്ങളില്‍ ഇതിനകം അഭിനയിച്ചിട്ടുണ്ട്.
ഏറെ നാളത്തെ അഭ്യൂഹങ്ങള്‍ക്കും ഗോസിപ്പുകള്‍ക്കും വിരാമമിട്ടാണ് സാമന്തയും നാഗചൈതന്യയും വിവാഹമോചിതരാകുന്നു എന്ന വിവരം പുറത്ത് വന്നത്. സാമന്ത തന്നെയാണ് തന്റെ ഇന്‍സ്റ്റാഗ്രാമിലൂടെ ഔദ്യോഗികമായി ഈ വിവരം അറിയിച്ചത്. സാമന്തയുമായി അസ്വാരസ്യങ്ങള്‍ തുടങ്ങിയതിന് പിന്നാലെ ഹൈദരാബാദിലെ ഒരു ഹോട്ടലില്‍ ആയിരുന്നു നാഗചൈതന്യയുടെ താമസം എന്ന് അടുത്തിടെ റിപ്പോര്‍ട്ടുകളുണ്ടായിരുന്നു.
എന്നാല്‍ ഇപ്പോഴിതാ വിവാഹമോചന വാര്‍ത്ത പുറത്തു വിട്ടതോടെ നാഗചൈതന്യ പുതിയ വീട്ടിലേയ്ക്ക് മാറുകയാണ് എന്നാണ് പുതിയ വിവരം. നടന്‍ ഹൈദരബാദില്‍ തന്നെ പുതിയ ഒരു വില്ല വാങ്ങിയിട്ടുണ്ട് എന്നും വൈകാതെ അങ്ങോട്ടേക്ക് താമസം മാറും. നിലവില്‍ പുതിയ വില്ലയുടെ നവീകരണ പ്രവര്‍ത്തനങ്ങള്‍ നടന്നു കൊണ്ടിരിക്കുകയാണ്.
നേരത്തെ സാമന്തയും നാഗചൈതന്യയും ഹൈദരബാദിലെ ഗാച്ചിബൗലി എന്ന സ്ഥലത്ത് സ്വന്തമായി വീട് വാങ്ങി താമസിക്കുകയായിരുന്നു. വിവാഹമോചിതരാവാം എന്ന് രണ്ട് പേരും ഒന്നിച്ച് തീരുമാനം എടുത്തതോടെ സാമന്ത സ്വന്തം വീട്ടിലേക്കും നാഗചൈതന്യ ഹോട്ടലിലേക്കും താമസം മാറുകയായിരുന്നു.
അതിനിടയില്‍ ഫാമിലി മാന്‍ 2 എന്ന വെബ് സീരീസ് വന്‍ വിജയമായതിന് ശേഷം സാമന്ത മുംബൈയിലേക്ക് ചേക്കേറുകയാണെന്ന വാര്‍ത്തകളും ഉണ്ടായിരുന്നു. ഷൂട്ടിംഗ് ആവശ്യങ്ങള്‍ക്ക് വേണ്ടി നടി മുംബൈയില്‍ ഒരു ഫ്‌ളാറ്റ് എടുക്കുകയും ചെയ്തിരുന്നു. എന്നാല്‍ എന്നന്നേക്കുമായി മുംബൈയിലേക്ക് ഒരു മാറ്റം ഉണ്ടാവില്ല എന്നാണ് നടി പറയുന്നത്.
തന്റെ വീട് ഹൈദരബാദില്‍ ആണെന്നും ഇവിടെ തന്നെ തുടരാനാണ് തീരുമാനം എന്നും സമാന്ത വ്യക്തമാക്കിയിരുന്നു. ഒക്ടോബര്‍ 2ന് ആണ് വിവാഹമോചന വാര്‍ത്ത താരങ്ങള്‍ ഔദ്യോഗിക സ്ഥിരീകരിച്ചത്. 2017ല്‍ വിവാഹിതരായ ഇവര്‍ നീണ്ട നാല് വര്‍ഷത്തെ വിവാഹ ജീവിതത്തിന് ശേഷമാണ് വേര്‍പിരിയാന്‍ തീരുമാനിച്ചത്.
