മോസ്കോ: റഷ്യൻ ബാലിസ്റ്റിക് മിസൈൽ ആക്രമണങ്ങൾ ശക്തമായതോടെ പ്രതിരോധത്തിനായി കൂടുതൽ അമേരിക്കൻ നിർമ്മിത വ്യോമപ്രതിരോധ സാമഗ്രികളും വെടിക്കോപ്പുകളും അടിയന്തരമായി ലഭ്യമാക്കണമെന്ന് ആവശ്യപ്പെട്ട് യുഎസ് പ്രസിഡന്റ് ഡൊണാൾഡ് ട്രംപിനും യുഎസ് കോൺഗ്രസിനും യുക്രെയ്ൻ പ്രസിഡന്റ് വൊളോഡിമിർ സെലൻസ്കിയുടെ കത്ത്. അതേസമയം, യുക്രെയ്ന്റെ ദീർഘദൂര ഡ്രോൺ ആക്രമണങ്ങളെ ചെറുക്കാൻ ബാങ്ക് ജീവനക്കാരെപ്പോലും തോക്കെടുപ്പിച്ചു രംഗത്തിറക്കാൻ റഷ്യൻ പാർലമെന്റും പുതിയ ബില്ലിന് അനുമതി നൽകി. ഇരുരാജ്യങ്ങളും വ്യോമാക്രമണം ശക്തമാക്കിയതോടെ നാല് വർഷം പിന്നിട്ട യുദ്ധം കൂടുതൽ നാടകീയമായ തലത്തിലേക്ക് നീങ്ങുകയാണ്. 1,250 കിലോമീറ്റർ നീളമുള്ള യുദ്ധമുന്നണിയിൽ ഇരുവിഭാഗത്തിനും നിലവിൽ കാര്യമായ മുന്നേറ്റം നടത്താൻ കഴിഞ്ഞിട്ടില്ല.
യുക്രെയ്ൻ യുദ്ധത്തിൽ ഇതുവരെ ഏതാണ്ട് അഞ്ച് ലക്ഷത്തോളം റഷ്യൻ സൈനികർ കൊല്ലപ്പെട്ടതായി ബ്രിട്ടീഷ് രഹസ്യാന്വേഷണ ഏജൻസിയായ ജിസിഎച്ച്ക്യു (GCHQ) മേധാവി ആനി കീസ്റ്റ്-ബട്ലർ ബുധനാഴ്ച വ്യക്തമാക്കി. യുദ്ധഭൂമിയിൽ റഷ്യൻ പ്രസിഡന്റ് വ്ലാഡിമിർ പുടിൻ പിന്നോട്ട് പോവുകയാണെന്നും പുതിയ കണക്കുകൾ ഉദ്ധരിച്ച് അവർ കൂട്ടിച്ചേർത്തു.
സ്വന്തമായി നിർമ്മിക്കുന്ന ഡ്രോണുകൾ ഉപയോഗിച്ച് റഷ്യയിലെ എണ്ണപ്പാടങ്ങളും നിർമ്മാണശാലകളും യുക്രെയ്ൻ ലക്ഷ്യമിടുന്നുണ്ട്. ഇതിന് തിരിച്ചടിയായി കഴിഞ്ഞ വാരാന്ത്യത്തിൽ മാത്രം റഷ്യ 90 മിസൈലുകളും നൂറുകണക്കിന് ഡ്രോണുകളുമാണ് കീവിന് നേരെ തൊടുത്തുവിട്ടത്. നിലവിൽ 90 ശതമാനത്തിലധികം ഡ്രോണുകളും തകർക്കാൻ യുക്രെയ്ന് സാധിക്കുന്നുണ്ട്. ഗൾഫ് രാജ്യങ്ങൾ ഉൾപ്പെടെയുള്ള മധ്യപൂർവേഷ്വൻ രാജ്യങ്ങളിലും യുഎസ് സൈനിക താവളങ്ങളിലും വ്യോമപ്രതിരോധം ശക്തമാക്കാൻ യുക്രെയ്ൻ വിദഗ്ദ്ധർ സഹായിക്കുന്നുണ്ടെന്നും കത്തിൽ പറയുന്നു.
എന്നാൽ, സ്വന്തമായി മിസൈൽ പ്രതിരോധ സംവിധാനം നിർമ്മിക്കാൻ യുക്രെയ്ന് ശേഷിയില്ലാത്തതിനാൽ അമേരിക്കയെ മാത്രമാണ് രാജ്യം ആശ്രയിക്കുന്നത്. പശ്ചിമേഷ്യയിലെ (ഇറാൻ) യുദ്ധസാഹചര്യങ്ങൾ കാരണം അമേരിക്കയിൽ നിന്നുള്ള ആയുധ വിതരണം കുറഞ്ഞതായി സെലൻസ്കി ചൂണ്ടിക്കാട്ടി. “രാജ്യത്തിന്റെ നിലനിൽപ്പിനായി പോരാടുന്ന ഞങ്ങൾക്ക്, മിസൈലുകളില്ലാത്ത പേട്രിയറ്റ് (Patriot PAC-3) ബാറ്ററികൾ നോക്കിനിൽക്കേണ്ടി വരുന്നത് അങ്ങേയറ്റം വേദനാജനകമാണ്. വരാനിരിക്കുന്ന ഭീഷണികളെ ചെറുക്കാൻ നിലവിലെ ആയുധ വിതരണം ഒട്ടും തികയില്ല,” സെലൻസ്കി കത്തിൽ കുറിച്ചു. കത്തിൽ വാഷിംഗ്ടൺ ഇതുവരെ ഔദ്യോഗികമായി പ്രതികരിച്ചിട്ടില്ല. യൂറോപ്യൻ രാജ്യങ്ങളും കാനഡയും വാങ്ങി നൽകുന്ന യുഎസ് ആയുധങ്ങളാണ് യുക്രെയ്ന്റെ പ്രധാന കരുത്ത് എങ്കിലും ചുരുക്കം ചില നാറ്റോ (NATO) സഖ്യകക്ഷികൾ മാത്രമാണ് ഇതിനായി വലിയ തുക നിക്ഷേപിക്കുന്നത്.
റഷ്യയിലെ താഴത്തെ സഭയായ സ്റ്റേറ്റ് ഡുമ ചൊവ്വാഴ്ച പാസാക്കിയ അസാധാരണമായ ബില്ല് പ്രകാരം, രാജ്യത്തെ ബാങ്കുകളിൽ ഇലക്ട്രോണിക് ജാമിങ് സംവിധാനങ്ങൾ സ്ഥാപിക്കുകയും തിരഞ്ഞെടുക്കപ്പെടുന്ന ബാങ്ക് ജീവനക്കാർക്ക് ഡ്രോണുകൾ വെടിവെച്ചിടാനുള്ള പരിശീലനം നൽകുകയും ചെയ്യും. റഷ്യയിലെ എല്ലാ നഗരങ്ങളിലും ബാങ്കുകൾ ഉള്ളതിനാൽ ഇവയെ വ്യോമപ്രതിരോധത്തിന്റെ ഭാഗമാക്കുന്നത് സുരക്ഷാ വലയം വർദ്ധിപ്പിക്കാൻ സഹായിക്കുമെന്നാണ് റഷ്യയുടെ കണക്കുകൂട്ടൽ. റഷ്യൻ സെൻട്രൽ ബാങ്കും പ്രമുഖ പൊതുമേഖലാ ബാങ്കായ സ്ബെർബാങ്കും ഈ പദ്ധതിയുടെ പരിധിയിൽ വരും.
സ്റ്റേറ്റ് ഡുമയുടെ ഫിനാൻഷ്യൽ മാർക്കറ്റ് കമ്മിറ്റി ചെയർമാൻ അനറ്റോലി അക്സകോവ് വ്യക്തമാക്കിയത് പ്രകാരം, ബാങ്ക് ജീവനക്കാർക്ക് സുരക്ഷാ സേനയുടെ മറുപടിക്കായി കാത്തുനിൽക്കാതെ തന്നെ ഡ്രോണുകളുടെ സിഗ്നലുകൾ ജാം ചെയ്യാനും വ്യോമ-കര-നാവിക ഡ്രോണുകളെ തകർക്കാനുമുള്ള അനുവാദമുണ്ടാകും. ഓരോ ബാങ്കുകൾക്കും തങ്ങളുടെ ഏത് ജീവനക്കാരെയാണ് ഇതിനായി പരിശീലിപ്പിക്കേണ്ടതെന്ന് തീരുമാനിക്കാം. ഈ ബില്ലിന് ഇനി ഉപരിസഭയായ ഫെഡറേഷൻ കൗൺസിലിന്റെ അംഗീകാരവും പുടിന്റെ ഒപ്പും കൂടി വേണം.
ഭീമാകാരമായ റഷ്യൻ ഭൂപ്രദേശത്തെ യുക്രെയ്ന്റെ ആധുനിക ഡ്രോണുകളിൽ നിന്ന് സംരക്ഷിക്കാൻ മോസ്കോ ബുദ്ധിമുട്ടുന്നുണ്ടെന്നാണ് പാശ്ചാത്യ നിരീക്ഷകർ വിലയിരുത്തുന്നത്. അതുകൊണ്ടാണ് സൈനികേതര മേഖലകളിലേക്ക് ഈ പ്രതിരോധ ചുമതല വികേന്ദ്രീകരിക്കാൻ റഷ്യ നിർബന്ധിതരാകുന്നത്. റഷ്യൻ ജനതയെ യുദ്ധത്തിന്റെ ആഘാതങ്ങളിൽ നിന്ന് മാറ്റിനിർത്താൻ പുടിൻ ശ്രമിക്കുന്നതിനിടെ, സാധാരണക്കാരായ ജീവനക്കാരെ തോക്കെടുപ്പിക്കുന്നത് തിരിച്ചടിയായേക്കാം എന്നും വിലയിരുത്തലുകളുണ്ട്.
As the Russia-Ukraine war surpasses its four-year mark, British Intelligence reports that Russian casualties have crossed 500,000, indicating severe structural losses for Moscow. Amid intensifying Russian drone strikes, Ukrainian President Volodymyr Zelenskyy sent an urgent letter to US President Donald Trump, expressing frustration over the lack of ammunition for Patriot defense batteries, stating that “Patriot systems without missiles hurt.” Meanwhile, reports suggest Russian President Vladimir Putin is considering military draft measures for banking sector employees to counter personnel shortages, pushing the prolonged conflict into a more volatile phase.