മുംബൈ: ഇന്ത്യയുടെ വിസ്തൃതമായ ആകാശം ഇന്ന് രാത്രി തികച്ചും വിസ്മയകരവും അപൂര്വവുമായ ഒരു പ്രതിഭാസത്തിന് സാക്ഷ്യം വഹിക്കാന് ഒരുങ്ങുകയാണ്. ഭൂമിയിലേക്ക് സൂര്യനിൽ നിന്നും അതിശക്തമായ സൗരക്കാറ്റ് ആഞ്ഞടിക്കുന്ന പശ്ചാത്തലത്തിലാണ് ഈ ആഗോള പ്രതിഭാസത്തിന് ശാസ്ത്രലോകം കാത്തിരിക്കുന്നത്. സാധാരണയായി ഭൂമിയുടെ ധ്രുവപ്രദേശങ്ങളില് മാത്രം കണ്ടുവരാറുള്ള ‘അറോറ’ അഥവാ വടക്കന് വെളിച്ചം ഇത്തവണ ഇന്ത്യയിലും ദൃശ്യമായേക്കുമെന്നാണ് ശാസ്ത്രജ്ഞർ നൽകുന്ന സൂചന. ഇന്ന് അര്ദ്ധരാത്രിക്ക് തൊട്ടുമുന്പായിട്ടാണ് ഈ അപൂര്വ ആകാശവിസ്മയം ഇന്ത്യയിൽ ദൃശ്യമാകാൻ സാധ്യത കൽപ്പിക്കപ്പെടുന്നത്. കഴിഞ്ഞ കുറച്ചു ദിവസങ്ങളായി സൂര്യന്റെ ഉപരിതലത്തിൽ രൂപപ്പെട്ടുവന്ന കടുത്ത ഊര്ജ്ജപ്രവാഹമാണ് ഇപ്പോള് ഭൂമിയുടെ അന്തരീക്ഷത്തിലേക്ക് അതിവേഗം എത്തിച്ചേരുന്നത്.
കഴിഞ്ഞ ജൂണ് ആറിന് സൂര്യനിലുണ്ടായ ശക്തമായ സ്ഫോടനത്തെ തുടര്ന്നാണ് ഈ പ്രത്യേക ഊർജ്ജപ്രവാഹം ബഹിരാകാശത്തേക്ക് തള്ളപ്പെട്ടത്. മണിക്കൂറില് ഏതാണ്ട് 1400 കിലോമീറ്റര് വേഗതയിലാണ് ഒരു കോടി ടണ്ണോളം വരുന്ന കാന്തിക പ്ലാസ്മ അന്ന് പുറന്തള്ളപ്പെട്ടത്. ബഹിരാകാശത്തിലൂടെയുള്ള രണ്ട് ദിവസത്തെ സുദീർഘമായ യാത്രയ്ക്ക് ശേഷമാണ് ഈ പ്ലാസ്മ മേഘങ്ങള് ഇന്ന് ഭൂമിയുടെ അന്തരീക്ഷത്തിലേക്ക് പതിക്കുന്നത്. യു.എസിലെ പ്രശസ്തമായ സ്പേസ് വെതർ പ്രെഡിക്ഷൻ സെന്റർ ഇതിനോടകം തന്നെ ഭൂമിയില് ശക്തമായ ജിയോമാഗ്നറ്റിക് കൊടുങ്കാറ്റ് ഉണ്ടാകുമെന്ന കടുത്ത മുന്നറിയിപ്പ് നല്കിയിട്ടുണ്ട്. ഈ കടുത്ത ഊർജ്ജപ്രവാഹം ഭൂമിയിലെ ആശയവിനിമയ സംവിധാനങ്ങളെയും സാറ്റലൈറ്റുകളെയും നേരിയ തോതിൽ ബാധിച്ചേക്കുമെന്നും ആശങ്കയുണ്ട്.
ചില പ്രത്യേക സമയങ്ങളില് ഈ ഭൗമകാന്തിക കൊടുങ്കാറ്റ് അതിതീവ്രമായ ജി.4 വിഭാഗത്തിലേക്ക് വരെ ഉയർന്നേക്കാം എന്നാണ് പുതിയ റിപ്പോർട്ട്. ഇന്ന് രാത്രി 11:30 നും നാളെ പുലര്ച്ചെ 2:30 നും ഇടയിലാണ് ഈ സൌരക്കാറ്റ് അതിന്റെ പൂര്ണ്ണ ശക്തിയിലെത്തുക. സൂര്യനില് നിന്നുള്ള മാരക ഊര്ജ്ജപ്രവാഹം ഭൂമിയുടെ കാന്തികവലയത്തില് തട്ടി ഉണ്ടാകുന്ന താല്ക്കാലിക വ്യതിയാനങ്ങളെയാണ് ജിയോമാഗ്നറ്റിക് കൊടുങ്കാറ്റ് എന്ന് വിളിക്കുന്നത്. ഇതിന്റെ ആഘാത ഫലമായി ഇന്ത്യയുടെ വടക്കൻ ആകാശത്തും അതിമനോഹരമായ അറോറ ദൃശ്യമാകാനുള്ള കടുത്ത സാധ്യതയുണ്ട്. ലഡാക്കിന്റെ തണുത്തുറഞ്ഞ വിജനമായ മലനിരകള്ക്ക് മുകളില് ആകാശം ഒരു വലിയ അത്ഭുതക്കാഴ്ചയ്ക്ക് വഴിമാറുമോ എന്നാണ് ശാസ്ത്രലോകം ഇപ്പോൾ ഉറ്റുനോക്കുന്നത്.
നമ്മുടെ രാജ്യത്തിന്റെ ചരിത്രത്തില് ഇതിനുമുമ്പ് ഒരേയൊരു തവണ മാത്രമാണ് ഇത്തരമൊരു അപൂർവ്വ പ്രതിഭാസം നഗ്നനേത്രങ്ങളാൽ റിപ്പോര്ട്ട് ചെയ്യപ്പെട്ടിട്ടുള്ളത്. സൂര്യനില് നിന്നുള്ള ചാര്ജ്ജ് ചെയ്യപ്പെട്ട കാന്തിക കണങ്ങള് ഭൂമിയുടെ അന്തരീക്ഷത്തിലെ വിവിധ വാതകങ്ങളുമായി കൂട്ടിയിടിക്കുമ്പോഴാണ് ഈ വെളിച്ചം ഉണ്ടാകുന്നത്. പച്ച, പര്പ്പിള്, ചുവപ്പ് നിറങ്ങളിലുള്ള മനോഹരമായ വെളിച്ചം ഇതോടെ ആകാശത്ത് വലിയ അലകളായി പ്രത്യക്ഷപ്പെടാൻ തുടങ്ങും. ഭൂമിശാസ്ത്രപരമായി ധ്രുവപ്രദേശങ്ങളില് നിന്നും ഏറെ അകലെ സ്ഥിതി ചെയ്യുന്ന ഇന്ത്യയിൽ സാധാരണയായി ഈ കാഴ്ച ഒട്ടും ലഭിക്കാറില്ല. എന്നാൽ മുൻപ് 2024 മെയ് മാസത്തില് ഉണ്ടായ അതിതീവ്രമായ ജി.5 സൗരക്കാറ്റിനെ തുടര്ന്ന് ഇന്ത്യയില് ആദ്യമായി അറോറ ദൃശ്യമായിരുന്നു.
ഇന്ന് രാത്രി അന്തരീക്ഷത്തിൽ പ്രതീക്ഷിക്കുന്നത് ജി-3 തീവ്രതയാണെങ്കിലും ലഡാക്കില് ഈ അത്ഭുത കാഴ്ച സാധ്യമാകുമെന്നാണ് ശാസ്ത്രജ്ഞർ കരുതുന്നത്. ഇന്ത്യയില് ലഡാക്കിലെ ഹാന്ലെയിലുള്ള ഇന്ത്യന് അസ്ട്രോണമിക്കല് ഒബ്സര്വേറ്ററിയിലാണ് ഈ പ്രതിഭാസം ദൃശ്യമാകാന് ഏറ്റവും കൂടുതൽ സാധ്യതയുള്ളത്. സമുദ്രനിരപ്പിൽ നിന്നും ഏതാണ്ട് 4500 മീറ്റർ ഉയരത്തിൽ സ്ഥിതി ചെയ്യുന്ന ഇവിടെ അന്തരീക്ഷം വളരെ സുതാര്യവുമാണ്. ഇതിനുമുമ്പ് ഇതേവർഷം 2026 ജനുവരി 19-നാണ് ഹാന്ലെയിലെ ആകാശത്ത് അറോറയുടെ ചുവപ്പ് വെളിച്ചം ശാസ്ത്രജ്ഞര് ക്യാമറകളിൽ സ്ഥിരീകരിച്ചത്. ഹാന്ലെയ്ക്ക് പുറമെ നുബ്ര വാലി, പാംഗോങ് തടാകം, കാശ്മീരിന്റെ ചില ഭാഗങ്ങൾ എന്നിവടങ്ങളിലും നേരിയ തോതിൽ ഇത് ദൃശ്യമായേക്കാം.
എന്നാൽ ഇന്ത്യയിലെ ഡൽഹി, മുംബൈ, ബംഗളൂരു, കൊൽക്കത്ത, ചെന്നൈ തുടങ്ങിയ വൻനഗരങ്ങളിൽ ഉള്ളവർക്ക് ഈ കാഴ്ച കാണാനാകില്ല. നഗരങ്ങളിലെ കടുത്ത പ്രകാശമലിനീകരണവും പുകമഞ്ഞും കാരണം ആകാശത്ത് ഈ മാറ്റം ഉണ്ടായാൽ പോലും അത് വ്യക്തമാകില്ല എന്നതാണ് യാഥാർത്ഥ്യം. ലഡാക്കിലുള്ളവർക്ക് ഇന്ന് അർദ്ധരാത്രിക്ക് ശേഷം വടക്ക് ദിശയിലേക്ക് നോക്കിയാൽ ഈ അപൂർവ്വ പ്രതിഭാസം കാണാൻ സാധിച്ചേക്കും. സാധാരണ മൊബൈൽ ക്യാമറകൾക്ക് പകരം ലോങ്-എക്സ്പോഷർ കാമറകളുടെ സഹായത്തോടെ മാത്രമേ ഈ വെളിച്ചം കൃത്യമായി പകർത്തുവാൻ സാധിക്കുകയുള്ളൂ. നക്ഷത്രനിരീക്ഷണത്തിൽ താല്പര്യമുള്ള നിരവധി ആളുകൾ ഇതിനോടകം തന്നെ ഈ കാഴ്ചയ്ക്കായി ലഡാക്കിലെ മലനിരകളിൽ ക്യാമ്പ് ചെയ്യുന്നുണ്ട്.
ഇന്ത്യയ്ക്ക് പുറമെ ലോകത്തിന്റെ മറ്റ് പല ഭാഗങ്ങളിലും ഇന്ന് രാത്രി വടക്കൻ വെളിച്ചം വളരെ വ്യക്തമായി കാണാം. വടക്കേ അമേരിക്കയിലെ മിനിയാപൊളിസ്, സീറ്റിൽ, ബാംഗൂർ, കാനഡയിലെ ഒന്റാറിയോ എന്നിവിടങ്ങളിലും ഈ കാഴ്ച ലഭ്യമാകും. യൂറോപ്പിലെ സ്കോട്ട്ലൻഡ്, സ്കാൻഡിനേവിയൻ രാജ്യങ്ങൾ, വടക്കൻ ജർമ്മനി, പോളണ്ട്, ഐസ്ലൻഡ് എന്നിവിടങ്ങളിലും ഇത് ദൃശ്യമാകും. തെക്കേ അർദ്ധഗോളത്തിൽ ടാസ്മാനിയ, ന്യൂസിലൻഡിന്റെ തെക്കൻ ദ്വീപുകൾ, അർജന്റീന, ചിലി എന്നിവിടങ്ങളിൽ ഇതിന്റെ ദ്രുവീയ പ്രതിരൂപം കാണാം. ‘അറോറ ഓസ്ട്രേലിസ്’ എന്നറിയപ്പെടുന്ന ഈ തെക്കൻ വെളിച്ചവും സൗരക്കാറ്റിന്റെ തീവ്രതയനുസരിച്ച് കൂടുതൽ മനോഹരമായി ദൃശ്യമാകും.
English Summary
India’s night sky is poised to witness a rare aurora phenomenon triggered by a powerful geomagnetic storm heading towards Earth. Resulting from a massive solar flare on June 6, magnetic plasma travelling at 1400 km/h is expected to hit Earth’s atmosphere tonight. While light pollution rules out views in major cities, high-altitude regions like Hanle in Ladakh offer a prime location to capture these rare red and purple lights using long-exposure cameras.