IPL🏏ബട്‌ലര്‍ ആഞ്ഞടിച്ചു സഞ്ജുവും,രാജസ്ഥാന് മികച്ച സ്‌കോര്‍

ജയ്പുർ: രാജസ്ഥാന്റെ തട്ടകമായ സവായ് മാൻസിങ് സ്റ്റേഡിയത്തിൽ ഇംഗ്ലിഷ് ഓപ്പണർ ജോസ് ബട്‍ലർ വീണ്ടും ട്രാക്കിലായി; ഒപ്പം രാജസ്ഥാനും. നായകൻ സഞ്ജു സാംസണിന്റെ ഉറച്ച പിന്തുണയോടെ തകർത്തടിച്ച ജോസ് ബട്‍ലറിന്റെ മികവിൽ, സൺറൈസേഴ്സ് ഹൈദരാബാദിനെതിരായ ഐപിഎൽ പോരാട്ടത്തിൽ 215 റൺസിന്റെ കൂറ്റൻ വിജയലക്ഷ്യമുയർത്തി രാജസ്ഥാൻ റോയൽസ്. ടോസ് നേടി ബാറ്റിങ് തിരഞ്ഞെടുത്ത രാജസ്ഥാൻ നിശ്ചിത 20 ഓവറിൽ രണ്ടു വിക്കറ്റ് മാത്രം നഷ്ടത്തിലാണ് 214 റൺസെടുത്തത്.

ഇടവേളയ്ക്കു ശേഷം ഫോമിലേക്കു തിരിച്ചെത്തിയ ബട്‍ലർ, സെഞ്ചറി നഷ്ടത്തിന്റെ വേദനയിലും ‘റോയലാ’യാണ് മടങ്ങിയത്. 59 പന്തുകൾ നേരിട്ട ബട്‍ലർ 95 റൺസെടുത്ത് പുറത്തായി. 10 ഫോറും നാലു സിക്സും ഉൾപ്പെടുന്നതാണ് ബട്‍ലറിന്റെ ഇന്നിങ്സ്. ഈ സീസണിൽ ബട്‍ലറിന്റെ ഉയർന്ന വ്യക്തിഗത സ്കോർ കൂടിയാണിത്.

ഉറച്ച പിന്തുണയുമായി കൂട്ടുനിന്ന ക്യാപ്റ്റൻ സഞ്ജു സാംസണും രാജസ്ഥാനായി അർധസെഞ്ചറി നേടി. 38 പന്തുകൾ നേരിട്ട സഞ്ജു നാലു ഫോറും അഞ്ചു സിക്സും സഹിതം 66 റൺസുമായി പുറത്താകാതെ നിന്നു. ഈ സീസണിൽ സഞ്ജുവിന്റെ മൂന്നാം അർധസെഞ്ചറിയും സീസണിലെ ഉയർന്ന സ്കോറുമാണിത്. ബട്‍ലറിന്റെ അഞ്ചാം അർധസെഞ്ചറിയും. ഓപ്പണർ യശസ്വി ജയ്സ്വാൾ 35 റൺസെടുത്ത് പുറത്തായി. 18 പന്തിൽ അഞ്ച് ഫോറും രണ്ടു സിക്സും ഉൾപ്പെടുന്നതാണ് ജയ്സ്വാളിന്റെ ഇന്നിങ്സ്.

രണ്ടാം വിക്കറ്റിൽ സഞ്ജുവും ബട്‍ലറും ചേർന്ന് അടിച്ചുകൂട്ടിയ സെഞ്ചറി കൂട്ടുകെട്ടാണ് രാജസ്ഥാൻ ഇന്നിങ്സിന്റെ നട്ടെല്ല്. 81 പന്തുകൾ ക്രീസിൽ നിന്ന ഇരുവരും അടിച്ചുകൂട്ടിയത് 138 റൺസാണ്. ഓപ്പണിങ് വിക്കറ്റിൽ ബട്‍ലർ – ജയ്സ്വാൾ സഖ്യം വെറും 30 പന്തിൽനിന്ന് 54 റൺസ് അടിച്ചുകൂട്ടിയതിനു പിന്നാലെയായിരുന്നു ഇവരുടെ ഐതിഹാസിക കൂട്ടുകെട്ട്. സൺറൈസേഴ്സിനായി ഭുവനേശ്വർ കുമാറും മാർക്കോ ജാൻസനും നാല് ഓവറിൽ 44 റൺസ് വീതം വിട്ടുകൊടുത്ത് ഓരോ വിക്കറ്റ് വീഴ്ത്തി. മയാങ്ക് മാർക്കണ്ഡെ നാല് ഓവറിൽ 51 റൺസ് വഴങ്ങി.

ഇംഗ്ലിഷ് താരം ജോ റൂട്ട് രാജസ്ഥാൻ റോയൽസിനായി അരങ്ങേറ്റത്തിന് ഇറങ്ങിയെങ്കിലും ആദ്യ മത്സരത്തിൽ ബാറ്റിങ്ങിന് അവസരം ലഭിച്ചില്ല. ദേവ്ദത്ത് പടിക്കൽ, റിയാൻ പരാഗ് എന്നിവർക്ക് ഇന്ന് അവസരം ലഭിച്ചില്ല.

ഇന്ത്യൻ പ്രീമിയർ ലീഗിൽ പ്ലേ ഓഫ് പ്രതീക്ഷകൾ സജീവമാക്കാനാണ് രാജസ്ഥാൻ റോയൽസിന്റെ ശ്രമം. സീസണിന്റെ ആദ്യ പകുതിയിൽ പോയിന്റ് പട്ടികയിൽ ഒന്നാം സ്ഥാനത്തുണ്ടായിരുന്ന രാജസ്ഥാൻ ഇപ്പോൾ നാലാമതാണ്. അഞ്ച് വിജയവും അത്ര തന്നെ തോൽവികളുമുള്ള റോയൽസിന് 10 പോയിന്റാണുള്ളത്. പട്ടികയില്‍ രാജസ്ഥാന് തൊട്ടുപിന്നിലുള്ള ആർസിബി, മുംബൈ ഇന്ത്യൻസ്, പഞ്ചാബ് കിങ്സ് ടീമുകൾക്കും പത്തുപോയിന്റ് വീതമുണ്ട്. അതുകൊണ്ടുതന്നെ അവസാന സ്ഥാനക്കാരായ സൺറൈസേഴ്സിനെതിരെ ജയിച്ചു തിരിച്ചുവരാനാണ് സഞ്ജുവിന്റെയും സംഘത്തിന്റേയും ശ്രമം. അവസാനം കളിച്ച അഞ്ച് മത്സരങ്ങളിൽ ഒന്നിൽ മാത്രമാണു റോയൽസിനു വിജയിക്കാൻ സാധിച്ചത്.