തിരുവനന്തപുരം: സംസ്ഥാനത്ത് വീണ്ടും മഴയെത്തുന്നു. അടുത്ത ദിവസങ്ങളില് കേരളത്തില് മഴ കനക്കും എന്നാണ് മുന്നറിയിപ്പ്. തെക്കന്, മധ്യ കേരളത്തിലായിരിക്കും കൂടുതല് മഴയ്ക്ക് സാധ്യത. ഈ പശ്ചാത്തലത്തില് മൂന്ന് ദിവസത്തേക്കുള്ള മഴ മുന്നറിയിപ്പുകള് പുറപ്പെടുവിച്ചിട്ടുണ്ട്. ആന്ധ്രപ്രദേശിന് മുകളിലായി ഒരു ന്യൂനമര്ദ്ദം രൂപപ്പെടാനും ആഗോള മഴ പാത്തി സജീവമാകാനും സാധ്യതയുണ്ട് എന്നാണ് വിലയിരുത്തല്.
നാളെ മൂന്ന് ജില്ലകളില് യെല്ലോ അലര്ട്ടായിരിക്കും. ഇടുക്കി, പാലക്കാട്, മലപ്പുറം ജില്ലകളില് ആണ് നാളെ യെല്ലോ അലര്ട്ട് പ്രഖ്യാപിച്ചിരിക്കുന്നത്. മറ്റന്നാള് പത്തനംതിട്ട, ഇടുക്കി, പാലക്കാട്, മലപ്പുറം, വയനാട് ജില്ലകളിലും തിങ്കളാഴ്ച പത്തനംതിട്ട, ഇടുക്കി, പാലക്കാട് ജില്ലകളിലും യെല്ലോ അലര്ട്ട് ആയിരിക്കും എന്നാണ് മുന്നറിയിപ്പില് വ്യക്തമാക്കുന്നത്. ഇവിടെ ഒറ്റപ്പെട്ടയിടങ്ങളില് ശക്തമായ മഴയ്ക്ക് സാധ്യത എന്നാണ് മുന്നറിയിപ്പ്.
24 മണിക്കൂറില് 64.5 മില്ലി മീറ്റര് മുതല് 115.5 മില്ലി മീറ്റര് വരെ മഴ ലഭിക്കുന്ന സാഹചര്യത്തെയാണ് ശക്തമായ മഴ എന്നത് കൊണ്ട് അര്ത്ഥമാക്കുന്നത്. കണ്ണൂര്, കാസര്ഗോഡ് തീരങ്ങളില് ഇന്ന് രാത്രി 11.30 വരെ 1.4 മുതല് 1.6 മീറ്റര് വരെ ഉയര്ന്ന തിരമാലയ്ക്കും കള്ളക്കടല് പ്രതിഭാസത്തിനും സാധ്യതയുണ്ട് എന്നാണ് ദേശീയ സമുദ്രസ്ഥിതിപഠന ഗവേഷണ കേന്ദ്രം മുന്നറിയിപ്പ് നല്കിയിരിക്കുന്നത്.
അതേസമയം കേരള – കര്ണാടക – ലക്ഷദ്വീപ് തീരങ്ങളില് മത്സ്യബന്ധനത്തിന് തടസമില്ല. 12-ാം തിയതി വരെ മധ്യ പടിഞ്ഞാറന് അറബിക്കടല്, അതിനോട് ചേര്ന്ന മധ്യ കിഴക്കന് അറബിക്കടല് എന്നിവിടങ്ങളില് മണിക്കൂറില് 45 മുതല് 55 കിലോമീറ്റര് വരെയും ചില അവസരങ്ങളില് മണിക്കൂറില് 65 കിലോമീറ്റര് വരെയും വേഗതയില് ശക്തമായ കാറ്റിന് സാധ്യതയുണ്ട്.
നാളെയും മറ്റന്നാളും ഗള്ഫ് ഓഫ് മാന്നാര്, തെക്കന് തമിഴ്നാട് തീരം, അതിനോട് ചേര്ന്ന കന്യാകുമാരി പ്രദേശം, മധ്യ കിഴക്കന് അറബിക്കടല്, മധ്യ കിഴക്കന് ബംഗാള് ഉള്ക്കടലിനോട് ചേര്ന്ന മധ്യ പടിഞ്ഞാറന് ബംഗാള് ഉള്ക്കടല്, വടക്കു പടിഞ്ഞാറന് ബംഗാള് ഉള്ക്കടല്, തെക്കു പടിഞ്ഞാറന് ബംഗാള് ഉള്ക്കടല്, അതിനോട് ചേര്ന്ന തെക്കു കിഴക്കന് ബംഗാള് ഉള്ക്കടല് എന്നിവിടങ്ങളില് മണിക്കൂറില് 35 മുതല് 45 കിലോമീറ്റര് വരെയും ചില അവസരങ്ങളില് മണിക്കൂറില് 55 കിലോമീറ്റര് വരെയും വേഗതയില് ശക്തമായ കാറ്റിനും മോശം കാലാവസ്ഥയ്ക്കും സാധ്യതയുണ്ട്.
തുടര്ച്ചയായി മഴ കിട്ടിയ പ്രദേശങ്ങളിലുള്ളവരും മലയോര മേഖലകളില് ഉള്ളവരും ജാഗ്രത തുടരണം. ഉരുള്പൊട്ടല്, മണ്ണിടിച്ചില്, വെള്ളപ്പൊക്ക സാധ്യതകളും മുന്നില് കണ്ട് ആവശ്യമെങ്കില് സുരക്ഷിത സ്ഥാനത്തേക്ക് മാറണം.