വണ്ടിപ്പെരിയാര്: കൊട്ടാരക്കര-ഡിണ്ടിഗല് ദേശീയപാതയില് പുല്ലുപാറയ്ക്ക് സമീപം കെ എസ് ആര് ടി സി ബസ് കൊക്കയിലേക്ക് മറിഞ്ഞ് നാലു പേര് മരിച്ചു. നിരവധി പേര്ക്ക് പരിക്കേറ്റിട്ടുണ്ട്. മാവേലിക്കരയില് നിന്ന് തഞ്ചാവൂരിലേക്ക് വിനോദയാത്ര പോയി തിരികെവരികയായിരുന്ന സംഘം സഞ്ചരിച്ച ബസ്സാണ് അപകടത്തില് പെട്ടത്. 34 യാത്രക്കാരും രണ്ട് ഡ്രൈവര്മാരും ഒരു കണ്ടക്ടറുമാണ് ബസ്സിലുണ്ടായിരുന്നത്.
തിങ്കളാഴ്ച രാവിലെ 6.15 ഓടെയാണ് സംഭവം.30 അടി താഴ്ചയിലേക്കാണ് ബസ് മറിഞ്ഞത്. മരങ്ങളില് തട്ടിനിന്നതിനാലാണ് വലിയ അത്യാഹിതം ഒഴിവായത്. ദേശീയപാതയില് കുട്ടിക്കാനത്തിനും മുണ്ടക്കയത്തിനും ഇടയില് പുല്ലുപാറയ്ക്ക് സമീപമാണ് ബസ് കൊക്കയിലേക്ക് മറിഞ്ഞത്. ബസ്സിന്റെ ബ്രേക്ക് നഷ്ടപ്പെട്ടതാണ് അപകടകാരണം. ബ്രേക്ക് നഷ്ടപ്പെട്ട വിവരം ഡ്രൈവര് പറഞ്ഞ ഉടന് ബസ് മറിയുകയായിരുന്നു.
നിയന്ത്രണം വിട്ട ബസ് 30 അടി താഴ്ചയിലേക്ക് മറിഞ്ഞു. പിന്നീട് ബസ് മരങ്ങളില് തട്ടി നിന്നു. പരിക്കേറ്റവരെ അടുത്തുള്ള ആശുപത്രിയിലേക്ക് കൊണ്ടുപോയി. രണ്ട് പേരുടെ നില ഗുരുതരമാണ്. പീരുമേടില് നിന്നും മുണ്ടക്കയത്ത് നിന്നും ഫയര് ഫോഴ്സ് സംഘം സ്ഥലത്തെത്തി രക്ഷാപ്രവര്ത്തനം നടത്തി. പോലീസ് സംഘവും മോട്ടോര് വാഹന വകുപ്പിന്റെ സംഘവും സ്ഥലത്തെത്തി.
മാവേലിക്കര സ്വദേശികളായ രണ്ട് പുരുഷന്മാരും സ്ത്രീയുമാണ് മരിച്ചതെന്നാണ് വിവരം. മാവേലിക്കരയില് നിന്ന് കെഎസ്ആര്ടിസി ബസ് വാടകക്കെടുത്ത് തഞ്ചാവൂര് ക്ഷേത്രത്തിലേക്ക് പോയ സംഘമാണ് അപകടത്തില് പെട്ടത്. ബസില് 34 യാത്രക്കാരും മൂന്ന് ജീവനക്കാരുമാണ് ഉണ്ടായത്. രാവിലെ 6.15 ഓടെയായിരുന്നു അപകടം.അപകടത്തില് ബസിനടിയില്പെട്ടവരാണ് മരിച്ചതെന്നാണ് വിവരം.
മറ്റുള്ളവര് പരുക്കേറ്റ് വിവിധ ആശുപത്രികളില് ചികിത്സയില് കഴിയുന്നത്. കുട്ടിക്കാനത്തിനും മുണ്ടക്കയത്തിനും ഇടയില് കൊടും വളവുകള് നിറഞ്ഞ റോഡില് ഒരു ഭാഗം കൊക്കയാണ്. ബ്രേക്ക് പൊട്ടി വാഹനം റോഡിന്റെ ബാരിക്കേഡ് തകര്ത്ത് താഴ്ചയിലേക്ക് പോവുകയായിരുന്നു.