കൊച്ചി: കൊച്ചിയില് നടിയെ ആക്രമിച്ച കേസ് അന്വേഷിക്കുന്ന ഉദ്യോഗസ്ഥനെ അപായപ്പെടുത്താന് ഗൂഢാലോചന നടത്തിയ കേസിലെ പ്രതി ദിലീപിനെതിരെ നിര്ണായക തെളിവ് കണ്ടെത്തിയെന്ന് ക്രൈംബ്രാഞ്ച്. കേസിലെ വിചാരണക്ക് ശേഷം അന്വേഷണ ഉദ്യോഗസ്ഥരെ വധിക്കാം എന്ന് ദിലീപ് പറയുന്ന ഓഡിയോ ക്ലിപ്പ് അന്വേഷണ സംഘത്തിന് ലഭിച്ചു. ഈ തെളിവ് ഇന്ന് കോടതിയില് സമര്പ്പിക്കും.
അതേസമയം, കേസില് ദിലീപ് ഉള്പ്പെടെയുള്ള പ്രതികളുടെ മുന്കൂര് ജാമ്യഹര്ജി അടിയന്തരമായി പരിഗണിക്കണമെന്ന പ്രോസിക്യൂഷന് ഹര്ജി ഹൈക്കോടതി ഫയലില് സ്വീകരിച്ചു. പ്രതികളെ കസ്റ്റഡിയില് ചോദ്യം ചെയ്യാന് ലക്ഷ്യമിട്ടാണ് ഹര്ജി. കേസ് ഇന്ന് 1.45 പരിഗണിക്കും. ഇന്ന് രാവിലെ ഡയറക്ടര് ജനറല് ഓഫ് പ്രോസിക്യൂഷന്റെ ചേംബറില് കേസ് കൈകാര്യം ചെയ്യുന്ന അഭിഭാഷകരുടെ പ്രത്യേക യോഗം ചേര്ന്നിരുന്നു. ഇതിന് പിന്നാലെയാണ് ഈ അപ്രതീക്ഷിത നീക്കം.
കേസില് ദിലീപ് അടക്കമുള്ള പ്രതികളുടെ ജാമ്യാപേക്ഷാ ഹര്ജി പരിഗണിക്കല് ബുധനാഴ്ചത്തേക്ക് മാറ്റിയിരുന്നു. പ്രോസിക്യൂഷന്റെ ആവശ്യപ്രകാരമാണ് ഹര്ജി മാറ്റിവച്ചത്. എന്നാല് വീണ്ടും പ്രോസിക്യൂഷന് തന്നെയാണ് ഇന്ന് ജാമ്യഹര്ജി പരിഗണിക്കാന് ആവശ്യപ്പെടുന്നത്. ഈ നീക്കത്തിന് പിന്നിലെ കാരണമെന്തെന്ന് വ്യക്തമല്ല.
കേസില് പ്രതികളുടെ നിസ്സഹകരണം ഹൈക്കോടതിയെ അറിയിക്കാന് പ്രോസിക്യൂഷന് തീരുമാനിച്ചിരുന്നു. പ്രതികള് ഫോണുകള് കൈമാറാത്ത കാര്യവും കോടതിയെ അറിയിച്ചു. ഫോണുകള് ഹാജരാക്കാന് അന്വേഷണ സംഘം നോട്ടീസ് നല്കിയിരുന്നു. എന്നാല്, ദിലീപ് അടക്കമുള്ള പ്രതികള് ഇതിനു തയ്യാറായിരുന്നില്ല. ദിലീപ് അടക്കമുള്ള പ്രതികള് മൊബൈല് ഫോണുകള് ഒളിപ്പിച്ചെന്നും ഇത് കണ്ടെത്താന് കൂടുതല് ചോദ്യം ചെയ്യേണ്ടതുണ്ടെന്നുമുള്ള നിലപാടിലാണ് അന്വേഷണസംഘം. ഗൂഢാലോചനക്കേസെടുത്തതിനു പിന്നാലെ ദിലീപ്, സഹോദരന് അനൂപ്, സഹായി അപ്പു എന്നിവര് തങ്ങള് ഉപയോഗിച്ചിരുന്ന ഫോണ് മാറ്റിയെന്നും ഇത് തെളിവ് നശിപ്പിക്കാനാണെന്നുമാണ് ക്രൈം ബ്രാഞ്ച് നിലപാട്.
എന്നാല് കേസ് കെട്ടിച്ചമച്ചതാണെന്നും, ഫോണ് ഹാജരാക്കാനാകില്ലെന്ന് ദിലീപ് മറുപടി നല്കി. അന്വേഷണസംഘത്തിന്റെ ആവശ്യം അംഗീകരിക്കാനാകില്ല. നിലവിലുള്ള കേസുമായി ബന്ധപ്പെട്ട തെളിവുകള് ഫോണില് ഇല്ല. ഫോണ് ശാസ്ത്രീയ പരിശോധനയ്ക്ക് അയച്ചു. പരിശോധനാ ഫലം കോടതിയില് നല്കാമെന്നും ദിലീപ് വ്യക്തമാക്കി.