അടിമാലി: കഞ്ചാവ് പിടികൂടിയ സംഭവത്തില് കടന്നുകളഞ്ഞ പ്രതിക്കുവേണ്ടി തിരച്ചിലിനെത്തിയ പൊലീസ് ഉദ്യോഗസ്ഥനെ ആക്രമിച്ച സംഭവത്തില് മൂന്നംഗ സംഘത്തെ പോലിസ് അറസ്റ്റ് ചെയ്തു. ഇരുനൂറേക്കര് വാഴശേരില് അക്ഷയ് (25), മില്ലുംപടി സ്വദേശികളായ കുന്നുംപുറത്ത് ജസ്റ്റിന് (23), പുല്ലുകുന്നേല് രാഹുല് (24) എന്നിവരെയാണ് അടിമാലി പൊലീസ് അറസ്റ്റ് ചെയ്തത്. ദേശീയപാതയില് ആയിരമേക്കര് കത്തിപ്പാറയ്ക്കു സമീപമാണ് സംഭവം.
സിവില് പൊലീസ് ഓഫിസറായ അനൂപിനെയാണു സംഘം ആക്രമിച്ചത്. ഹെല്മറ്റ് കൊണ്ട് അടിക്കുകയായിരുന്നുവെന്നു പൊലീസ് പറഞ്ഞു. അനൂപ് അടിമാലി താലൂക്കാശുപത്രിയില് ചികിത്സ തേടി. ഞായറാഴ്ച വൈകിട്ട് രണ്ടംഗ സംഘം സഞ്ചരിച്ചിരുന്ന കാറില് നിന്ന് ഒന്നേകാല് കിലോ കഞ്ചാവ് പൊലീസ് കണ്ടെത്തിയിരുന്നു. സംഭവത്തില് റെജി ജോസഫ് എന്നയാളെ പിടികൂടി. ഒപ്പമുണ്ടായിരുന്ന മനു മണി ഓടിപ്പോയി. ഇയാളെ പിടികൂടുന്നതിനായി മഫ്തിയില് എത്തിയപ്പോഴാണ് അനൂപിനെ സംഘം ആക്രമിച്ചത്.