തിരുവനന്തപുരം: സംസ്ഥാനത്തെ പ്ലസ് വണ്‍ പ്രവേശനത്തിനുളള ആദ്യ അലോട്ട്‌മെന്റ് ഇന്ന് പ്രസിദ്ധീകരിക്കും. നാളെ മുതല്‍ ഒക്ടോബര്‍ ഒന്ന് വരെ സര്‍ട്ടിഫിക്കറ്റുകളുമായി നേരിട്ടെത്തി പ്രവേശനം നേടാം. പ്രവേശന നടപടികളില്‍ കൊറോണ മാനദണ്ഡം കൃത്യമായി പാലിക്കണമെന്നാണ് നിര്‍ദേശം.
ഒരു വിദ്യാര്‍ത്ഥിയുടെ പ്രവേശന നടപടികള്‍ പൂര്‍ത്തീകരിക്കുന്നതിനായി 15 മിനിറ്റാണ് അനുവദിച്ചിട്ടുള്ളത്. ഒന്നാമത്തെ ഓപ്ഷന്‍ ലഭിച്ചവര്‍ ഫീസടച്ച് സ്ഥിര പ്രവേശനം നേടണം. മറ്റ് ഓപ്ഷനുകള്‍ ലഭിക്കുന്നവര്‍ക്ക് താല്‍ക്കാലിക പ്രവേശനമോ സ്ഥിര പ്രവേശനമോ നേടാം.
ഒന്നാം സപ്ലിമെന്ററി അലോട്ട്‌മെന്റിനായി ആകെ ഉണ്ടായിരുന്ന 44,281 ഒഴിവുകളില്‍ ലഭിച്ച 1,09,320 അപേക്ഷകളില്‍ 1,07,915 അപേക്ഷകളാണ് അലോട്ട്‌മെന്റിനായി പരിഗണിച്ചത്. നാളെ രാവിലെ ഒന്‍പത് മുതല്‍ ഒക്ടോബര്‍ ഒന്ന് വരെ സര്‍ട്ടിഫിക്കറ്റുകളുമായി നേരിട്ടെത്തി പ്രവേശനം നേടാം.
താല്‍ക്കാലികക്കാര്‍ക്ക് വേണ്ടിവന്നാല്‍ ഉയര്‍ന്ന ഓപ്ഷനുകളില്‍ ചിലത് റദ്ദാക്കാം. അതേസമയം, ആദ്യം അനുവദിക്കപ്പെട്ട പ്രവേശന സമയത്ത് ഹാജരാകാന്‍ സാധിക്കാത്തവര്‍ക്ക് സ്‌കൂള്‍ പ്രിന്‍സിപ്പല്‍ നിര്‍ദേശിക്കുന്ന മറ്റൊരു സമയത്ത് പ്രവേശനം നേടാമെന്നും വിദ്യാഭ്യാസ വകുപ്പ് അറിയിച്ചു.
സ്‌കൂളുകള്‍ തുറക്കുന്നത് സംബന്ധിച്ച് ഉന്നത തല യോഗം ചേരും ഇത് വിലയിരുത്തിയ ശേഷം മാത്രമേ നടപടി സ്വീകരിക്കുവെന്നും ഉന്നത വിദ്യാഭ്യാസ മന്ത്രി ആ ബിന്ദു പറഞ്ഞു. ഓക്ടോബര്‍ നാല് മുതല്‍ സംസ്ഥാനത്തെ അവസാന വര്‍ഷ കോളേജ് വിദ്യാര്‍ത്ഥികള്‍ക്ക് ക്ലാസ് ആരംഭിക്കുന്നതിനുള്ള നടപടിക്രമങ്ങള്‍ പൂര്‍ത്തിയാക്കി വരികയാണ്. വിദ്യാര്‍ത്ഥികളുടെ ക്ലാസ് ആരംഭിച്ച ശേഷം മറ്റ് വിദ്യാര്‍ത്ഥികളുടേയും ക്ലാസ് ആരംഭിക്കുന്നതില്‍ തീരുമാനമെടുക്കും. കോളേജ് തുറക്കുന്നതിന് മുന്നോടിയായി വിദ്യാര്‍ത്ഥികള്‍ക്ക് ഒരു ഡോസ് വാക്സിനെങ്കിലും ഉറപ്പ് വരുത്തും.
കോളേജുകള്‍ കേന്ദ്രീകരിച്ച് വാക്സിന്‍ ഡ്രൈവ് നടത്താനും തീരുമാനിച്ചിട്ടുണ്ട്. കേളേജുകളിലെ 90 ശതമാനം വിദ്യാര്‍ത്ഥികള്‍ക്കും ഒരു ഡോസ് വാക്സിനെങ്കിലും പൂര്‍ത്തിയായതായാണ് മനസ്സിലാക്കുന്നത്. അടുത്ത മാസം ആദ്യം അവസാന വര്‍ഷ വിദ്യാര്‍ത്ഥികളുടെ പഠനം പുനരാരംഭിച്ചതിന് ശേഷം പരിശോധിക്കും. ഓക്ടോബര്‍ 18ന് മുഴുവന്‍ ക്ലാസ്സുകളും തുറക്കുന്ന കാര്യത്തില്‍ അതിനുശേഷം മാത്രമേ തീരുമാനിക്കൂവെന്നും മന്ത്രി കൂട്ടിച്ചേര്‍ത്തു.
