PLUS ONE ADMISSION 📚 പ്ലസ് വൺ പ്രവേശനത്തിൽ മാനേജ്‌മെന്റ്, അൺ എയ്ഡഡ് സീറ്റുകളിൽ കോമ്പിനേഷൻ മാറ്റത്തിന് അനുമതി

തിരുവനന്തപുരം: എയ്ഡഡ് സ്കൂളുകളിലെ മാനേജ്‌മെന്റ് ക്വാട്ടയിലും അൺഎയ്ഡഡ് സ്കൂളുകളിലും മുഖ്യഘട്ടത്തിൽ പ്ലസ് വൺ പ്രവേശനം നേടിയവർക്ക് ആവശ്യമെങ്കിൽ കോമ്പിനേഷൻ (വിഷയം) മാറാൻ അവസരം. കുട്ടികൾക്കു തമ്മിൽ വിഷയം മാറുന്നതിനും (മ്യൂച്വൽ) അനുമതിയുണ്ട്. രക്ഷിതാക്കളുടെ അറിവോടെയാകണം അപേക്ഷിക്കേണ്ടത്. പ്രവേശനത്തിന്റെ ആദ്യഘട്ടത്തിൽ ഇങ്ങനെ മാറ്റം അനുവദിക്കുന്നത് ആദ്യമായാണ്.

മാനേജ്‌മെന്റിന്റെ അനുമതിയോടെ ഈ രീതിയിലെ മാറ്റം അനുവദിക്കാമെന്നാണ് ഹയർസെക്കൻഡറി ജോയിന്റ് ഡയറക്ടറുടെ (അക്കാദമിക്) ഉത്തരവിൽ പറയുന്നത്. നിലവിൽ ചേർന്നിട്ടുള്ള ക്വാട്ടയിലെ സീറ്റുകളിലേക്കു മാത്രമായിരിക്കും മാറാൻ കഴിയുക. കമ്യൂണിറ്റി ക്വാട്ടയിലെ കോമ്പിനേഷൻ മാറ്റത്തിനുള്ള ഉത്തരവ് നേരത്തേ പുറത്തിറങ്ങിയിരുന്നു.

കമ്യൂണിറ്റി ക്വാട്ടയിലെ സപ്ലിമെന്ററി അലോട്‌മെന്റ് തിങ്കളാഴ്ച പ്രസിദ്ധീകരിക്കും. അന്നുമുതൽ 27 വരെ സ്കൂളിൽ ചേരാം. സ്പോർട്‌സ് ക്വാട്ടയിലെ സപ്ലിമെന്ററി അലോട്‌മെന്റിന് ശനിയാഴ്ച വരെ അപേക്ഷിക്കാം. അലോട്‌മെന്റ് 25-നാണ്. 26-ന് വൈകീട്ടുവരെയാണ് പ്രവേശനത്തിനുള്ള സമയപരിധി. മാനേജ്‌മെന്റ് ക്വാട്ടയിലെ സപ്ലിമെന്ററി അലോട്‌മെന്റ് പ്രവേശനം 27-ന് വൈകീട്ട് പൂർത്തിയാക്കണം.

അൺഎയ്ഡഡ് ക്വാട്ടയിലെ പ്രവേശനം ജൂലായ് 16-വരെ തുടരാം. ഏകജാലകം വഴിയുള്ള ആദ്യസപ്ലിമെന്ററി അലോട്‌മെന്റിനായി ഒരോ സ്കൂളിലും ഒഴിവുള്ള സീറ്റുകളുടെ വിവരങ്ങൾ 28-ന് ഹയർസെക്കൻഡറി വകുപ്പ് പ്രവേശന വെബ്സൈറ്റിൽ പ്രസിദ്ധീകരിക്കും.

സേ പരീക്ഷയിലൂടെ പത്താംക്ലാസ് യോഗ്യത നേടിയവർക്ക് സപ്ലിമെന്ററി അലോട്‌മെന്റിൽ പരിഗണിക്കപ്പെടുന്നതിന് അപേക്ഷിക്കാം. മുൻപ് അപേക്ഷിച്ചിട്ടും അലോട്‌മെന്റ് ലഭിക്കാത്തവർ സീറ്റൊഴിവനുസരിച്ച് പുതിയ ഓപ്ഷനുകൾ ചേർത്ത് അപേക്ഷ പുതുക്കണം. മൂന്ന് സപ്ലിമെന്ററി അലോട്‌മെന്റുകളുണ്ട്.